បរទេស ៖ នៅក្នុងសប្តាហ៍នេះ មន្ទីរប៉ង់តាហ្គោន បានប្រកាសផ្តល់កុងត្រាជាផ្លូវការមួយក្នុងទំហំប្រមាណជា ១២,៥ពាន់លានដុល្លារអាម៉េរិក ទៅឲ្យកម្មវិធី Joint Strike Fighters​ (JSF) ដើម្បីអាចផលិតយន្តហោះចម្បាំងជំនាន់ទី៥របស់អាម៉េរិក យ៉ាងហោចណាស់ជិត៣០០គ្រឿងបន្ថែមទៀតពីលើកញ្ចប់ដែលមានស្រាប់ ខណៈដែលក្រុមហ៊ុនអ្នកជំនាញផលិតអាវុធ Lockheen Martin គឺជាអ្នកទទួលខុសត្រូវមុនគេចំពោះកិច្ចការងារនេះ។ ដោយឡែក រោងចក្រផលិតដែលស្ថិតនៅទីក្រុងFort Worthរដ្ឋ Texas នឹងចាប់ផ្តើមផលិត F-35 តាមផែនការ ហើយនឹងចាប់ផ្តើមចែកចាយយន្តហោះដែលរួចរាល់ចាប់ពីឆ្នាំក្រោយ។

ប្រភពដដែលបានឲ្យដឹងទៀតថា កុងត្រាទាំងនោះគឺមានរួមបញ្ចូលទាំងការសម្រេចចិត្តចុងក្រោយចំពោះតម្លៃ និងលក្ខខណ្ឌរបស់កញ្ចប់ទី១៨នៃការផលិតយន្តហោះចម្បាំង F-35 ដែលមានចំនួនសរុប១៤៨គ្រឿង ក៏ដូចជាការអនុញ្ញាតឲ្យចាប់ផ្តើមផលិតយន្តហោះចម្បាំងសម្រាប់កញ្ចប់ទី១៩ ដែលក្នុងនោះមានចំនួន១៤៨គ្រឿងដូចគ្នា។ ដូច្នេះ កុងត្រាដែលត្រូវបានប្រកាសកាលពីថ្ងៃចន្ទសប្តាហ៍នេះធ្វើឡើងបន្ទាប់ពីប៉ង់តាហ្គោនទើបតែបានប្រកាសផ្តល់កុងត្រាតម្លៃ ១១,៨ពាន់លានដុល្លារកាលពីខែធ្នូ ឆ្នាំ២០២៤។ ការប្រកាសថ្មីនេះនឹងធ្វើឲ្យតម្លៃវិនិយោគសរុបសម្រាប់ផលិត F-35 បានកើនឡើងទៅដល់ ២៤,៣ពាន់លានដុល្លារ។

គួរឲ្យដឹងដែរថា បច្ចុប្បន្ននេះយន្តហោះចម្បាំងជំនាន់ទី៥ របស់សហរដ្ឋអាម៉េរិកមួយប្រភេទនេះត្រូវបានដាក់ឲ្យប្រើប្រាស់នៅតាមបណ្តាប្រទេសសម្ព័ន្ធមិត្ត និងអតិថិជនរបស់ខ្លួនប្រមាណជា១២ប្រទេសរួចមកហើយ បូករួមទាំងសហរដ្ឋអាម៉េរិកខ្លួនឯងផង កូរ៉េខាងត្បូង និងអ៊ីស្រាអ៊ែល សរុបប្រមាណជា ១២៣០គ្រឿង។

JSF Program គឺជាកម្មវិធីអភិវឌ្ឍនិងបញ្ជាទិញសព្វាវុធប្រភេទយន្តហោះចម្បាំងដែលបង្កើតឡើងដោយមានការចូលរួមជាដៃគូពីសំណាក់ប្រជាជាតិនៅលោកខាងលិចសំខាន់ៗមួយចំនួនក្នុងនោះមានទាំងអាមេរិកអង់គ្លេសអ៊ីតាលីហូឡង់កាណាដាអូស្ត្រាលីដាណឺម៉ាកនរវេសនិងតួគីផងដែរ។

ទោះបីជាអាមេរិកមិនបានបញ្ជាក់អំពីមូលហេតុអ្វីដែលពួកគេចាំបាច់ត្រូវបង្កើនចំនួនផលិតដ៏ច្រើនបែបនេះប៉ុន្តែគេមើលឃើញថាមានចំណុចសំខាន់មួយចំនួនដែលទាមទារឲ្យមានការអភិវឌ្ឍនិងផលិតយន្តហោះចម្បាំងប្រភេទនេះកាន់តែច្រើនឡើង។

លោកខាងលិចមានជំនឿចិត្តលើបច្ចេកវិទ្យាផលិតរបស់អាមេរិក​ (Lockheed Martin)និងដើម្បីប្រកួតប្រជែងជាមួយនឹងប្រទេសដែលពួកគេចាត់ទុកជាការគម្រាមកំហែងធំៗដល់សន្តិសុខជាតិដែលមានដូចជាចិននិងរុស្សីជាដើម។

ប៉ុន្តែខណៈដែលបច្ចេកវិទ្យាជំនាន់ទី៤ដែលធ្លាប់ត្រូវបានប្រើប្រាស់ដូចជានៅអ៊ុយក្រែនទៅហើយនោះហាក់ដូចជាមិនទាន់មានប្រសិទ្ធភាពគ្រប់គ្រាន់ដូច្នេះការជម្រុញឲ្យមានការអភិវឌ្ឍជំនាន់ថ្មីទី៥នេះគឺជារឿងចាំបាច់បំផុត។

ចុងក្រោយនេះបើប្រៀបធៀបទៅនឹងយន្តហោះម៉ូដេល F-15EX បច្ចេកវិទ្យានិងមុខងាររបស់ F-35 មានភាពទំនើបជាងប៉ុន្តែមានតម្លៃធូរថ្លៃឬប្រមាណប្រហែលជា៨០លានដុល្លារប៉ុណ្ណោះក្នុងមួយគ្រឿង។