សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ស្ថានភាពវិស័យសំណង់ និងអចលនទ្រព្យក្នុងប្រទេសកម្ពុជា នាឆ្នាំ២០២៤កន្លងទៅនេះ មានសញ្ញាវិជ្ជមានឡើងវិញ ក្នុងនោះ ការផ្ដល់ឥណទានក្នុងវិស័យសំណង់ និងអចលនទ្រព្យ បានកើនឡើងទំហំទឹកប្រាក់ ១៣,៥១ ពាន់លានដុល្លារអាមេរិក។ នេះបើតាមរបាយការណ៍របស់ធនាគារជាតិនៃកម្ពុជាចេញផ្សាយកាលពីចុងខែធ្នូ ឆ្នាំ២០២៤កន្លងទៅនេះ ។
ក្នុងរបាយការណ៍ដែលគិតត្រឹមខែតុលា ឆ្នាំ២០២៤ បានបង្ហាញថា ឥណទានក្នុងវិស័យសំណង់មានទំហំទឹកប្រាក់ប្រមាណ ២៩ ១៩៩ពាន់លានរៀល ឬស្មើនឹងប្រមាណ ៧,៣ពាន់លានដុល្លារអាមេរិក បើប្រៀបធៀបនឹងឆ្នាំ២០២៣មានការើនឡើងប្រមាណ ៣៣,៣ភាគរយ ។ ចំណែកការផ្ដល់ឥណទានទៅក្នុងវិស័យអចលនទ្រព្យមានទំហំទឹកប្រាក់ប្រមាណ ២៤ ៨៦៣ពាន់លានរៀល ឬស្មើនឹងប្រមាណ ៦,២១ពាន់លានដុល្លារអាមេរិក ។ បើប្រៀបធៀបនឹងឆ្នាំ២០២៣កន្លងទៅមានការកើនឡើងប្រមាណ១៧,៨ភាគរយ ។
តាមរបាយការណ៍នេះ បានបង្ហាញថា ការផ្ដល់ឥណទានពីគ្រឹះស្ថានធនាគារ និងហិរញ្ញវត្ថុទៅក្នុងវិស័យសេដ្ឋកិច្ច គិតត្រឹមខែតុលា ឆ្នាំ២០២៤ មានទំហំទឹកប្រាក់សរុបប្រមាណ ២៤៧ ៦៣១ពាន់លានរៀល ឬស្មើនឹងប្រមាណ ៦០,៩ពាន់លានដុល្លារអាមេរិកកើនឡើងប្រមាណ២,២ភាគរយ ធៀបនឹងឆ្នាំមុន ។ ការកើនឡើងនេះ រួមចំណែកចម្បងដោយកំណើនឥណទានទៅកាន់វិស័យជួញដូរដុំ និងរាយ សំណង់ អចលនទ្រព្យ និងកម្មន្តសាល ។
ឯកឧត្តម ជូ វណ្ណៈ អគ្គនាយកនិយ័តករអាជីវកម្មអចលនវត្ថុ និងបញ្ចាំ បានមានប្រសាសន៍ថា ឥណទានដែលផ្ដល់ទៅក្នុងវិស័យសំណង់ និងអចលនទ្រព្យនេះ គឺរាប់បញ្ចូលតែឥណទានដែលបានស្នើតាមរយៈធនាគារ និងហិរញ្ញវត្ថុ និងបានកត់ត្រាក្នុងប្រព័ន្ធរបស់ស៊ីប៊ីស៊ីតែប៉ុណ្ណោះ ចំណែកអ្នកអភិវឌ្ឍន៍សំណង់ និងអចលនទ្រព្យ ដែលប្រើប្រាស់កម្ចីក្រៅផ្លូវការ ដូចជាយកទុនពីមិត្តភក្តិ បងប្អូន ឬកម្ចីក្រៅផ្លូវការផ្សេងទៀតមកប្រើប្រាស់មិនបានកត់បញ្ចូលក្នុងប្រព័ន្ធរបស់ស៊ីប៊ីស៊ីនោះទេ ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ក្នុងឆ្នាំ២០២៤ គម្រោងសំណង់ទូទាំងប្រទេសមានចំនួន ២ ៦២២គម្រោង មានផ្ទៃក្រឡាកម្រាលសំណង់សរុប ចំនួនជាង១០លានម៉ែត្រក្រឡា និងមានតម្លៃប៉ាន់ស្មានទុនវិនិយោគសរុបប្រមាណ ៤ ៣៣៤លានដុល្លារអាមេរិក ។
ក្នុងរបាយការណ៍នេះក៏បានបង្ហាញផងដែរពីគម្រោងសាងសង់អគារខ្ពស់ចាប់ពី៥ជាន់ឡើងទៅ ក្នុងឆ្នាំ២០២៤ មានចំនួនរហូតដល់១៦៥គម្រោងស្មើនឹង ១៨៤អគារ បុរីលំនៅឋានមានចំនួន ២៩គម្រោង ស្មើនឹង ៨ ០៨៥ខ្នង អគារផ្ទះល្វែង មានចំនួន១០ ៣៦៨ល្វែង អគារស្នាក់នៅរួមមានចំនួន៩៣គម្រោង សំណង់អគារសណ្ឋាគារចំនួន១២គម្រោង សំណង់អគារពាណិជ្ជកម្មមាន១៥១គម្រោង សំណង់អគាររោងចក្រមានចំនួន ១១៨គម្រោង និងអគារពហុមុខងារមានចំនួន ១៨គម្រោង ៕
Account
Security
Favourite Content