សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ចាប់តាំងពីពិភពលោកបានរួចផុតពីវិបត្តិហិរញ្ញវត្ថុសាកលកាលពីអំឡុងឆ្នាំ២០០៨ ឬឆ្នាំ២០០៩ កម្ពុជាចាប់ផ្ដើមទទួលបានការវិនិយោគលើវិស័យអចលនទ្រព្យជាបន្តបន្ទាប់ឡើងវិញ ក្នុងនោះ ការវិនិយោគលើខុនដូក៏ឃើញថាចាប់ផ្ដើមមានសន្ទុះងើបឡើងខ្លាំង ដោយគេសង្កេតឃើញថា នៅក្នុងអំឡុងឆ្នាំ២០១៥ និងឆ្នាំ២០១៩ គឺជាពេលវេលាមានការវិនិយោគលើខុនដូច្រើនបំផុតនៅក្នុងទីក្រុងភ្នំពេញ ។
យោងតាមរបាយការណ៍របស់ក្រុមហ៊ុន CBRE Cambodia បានបង្ហាញថា ក្នុងឆ្នាំ ២០១៥ នៅក្នុងរាជធានីភ្នំពេញ ទទួលគម្រោងវិនិយោគចំនួនជាង៣០គម្រោង ដោយគម្រោងវិនិយោគលើខុនដូតម្លៃធ្យមច្រើនជាងគេ បន្ទាប់មកគឺខុនដូតម្លៃសមរម្យ ខណៈគម្រោងខុនដូតម្លៃខ្ពស់ មានចំនួនតិចតួច ។ រហូតដល់ឆ្នាំ២០១៦ ឆ្នាំ ២០១៧ និងឆ្នាំ ២០១៨ ការវិនិយោគលើខុនដូនៅក្នុងរាជធានីភ្នំពេញ មានចំនួនជាមធ្យមជាង១០គម្រោងក្នុងមួយយឆ្នាំ ហើយរហូតដល់ឆ្នាំ២០១៩ ការវិនិយោគខុនដូបានផ្ទុះងើបឡើងជាថ្មី ដោយមានគម្រោងវិនិយោគថ្មីចំនួន២៤គម្រោង ។
របាយការណ៍ដដែលបានបង្ហាញផងដែរថា ក្នុងឆ្នាំ២០២០ ការវិនិយោគលើគម្រោងខុនដូនៅភ្នំពេញ ក៏មិនទាន់ជាធ្លាក់ខ្លាំងណាស់ណាទេ ដោយក្នុងឆ្នាំ២០២០ មានគម្រោងវិនិយោគលើខុនដូចំនួន១៦គម្រោងផងដែរ ប៉ុន្តែចាប់ពីឆ្នាំ២០២១ រហូតដល់ពាក់កណ្ដាលឆ្នាំ២០២៤នេះ ការវិនិយោគលើគម្រោងខុនដូនៅភ្នំពេញ មានការធ្លាក់ចុះខ្លាំងតែម្ដង ក្នុងនោះ២០២១ មានតែ៦គម្រោងប៉ុណ្ណោះ ឆ្នាំ ២០២២ មានចំនួន ជិត១០គម្រោង ឆ្នាំ២០២៣ មានចំនួន៦គម្រោង និងចាប់តាំងពីដើមឆ្នាំ២០២៤ រហូតដល់ពាក់កណ្ដាលឆ្នាំ មានចំនួនត្រឹមតែ ៣គម្រោងប៉ុណ្ណោះ រួមមាន ១.គម្រោង Time Square 7 ជាប្រភេទខុនដូតម្លៃមធ្យម, ទី២. គម្រោង Capital Center City ជាគម្រោងតម្លៃសមរម្យ និងទី៣ ជាគម្រោង L Tower TTP ជាប្រភេទខុនដូតម្លៃមធ្យម ។
លោក គាម សៀកឡុង អគ្គនាយកក្រុមហ៊ុន អចលនទ្រព្យ Dream Property បានមានប្រសាសន៍ថា នៅមុនពេលមានវិបត្តិកូវីដ១៩ ម្នាក់ៗបានសម្រុកអភិវឌ្ឍខុនដូ ព្រោះកាលនោះមានតម្រូវការខ្ពស់ មានអ្នកទិញខុនដូទាំងក្នុងស្រុក និងក្រៅប្រទេស តែនៅពេលក្រោយវិបត្តិកូវីដ១៩ អ្នកមានលុយក៏លែងយកលុយទៅវិនិយោគធ្វើឱ្យការទិញ-លក់អចលនទ្រព្យនៅកម្ពុជាចាប់ផ្តើមស្ងប់ស្ងាត់ ។
អនកជំនាញរូបនេះបានបន្តថា ៖
«រហូតមកដល់ពេលនេះ អ្នកវិនិយោគដែលមានលុយក្នុងដៃ ក៏មិនទាន់ហ៊ានបញ្ចេញទុនដើម្បីវិនិយោគលើអចលនទ្រព្យដែរ ដោយម្នាក់ៗទន្ទឹងរង់ចាំមើលពីស្ថានភាពសេដ្ឋកិច្ចសិន សេដ្ឋកិច្ចដើរល្អ មានការបណ្ដាក់ទុនវិនិយោគពីខាងក្រៅប្រទេស ទើបពួកគេបញ្ចេញទុនដើម្បីវិនិយោគឡើងវិញ ប៉ុន្តែបើនៅសុខៗឱ្យពួកគេបញ្ចេញលុយវិនិយោគទំនងជាមិនងាយនោះទេ ។ ពេលនេះ មិនមែនតែខុនដូទេដែលពិបាកលក់ចេញ សូម្បីតែផ្ទះ និងដី ក៏ពិបាករកអ្នកទិញដែរ ហើយការវិនិយោគពីខាងក្រៅក៏មិនទាន់បានច្រើនដូចមុននៅឡើយ គឺនៅមានចំនួនតិចតួចដែលមិនអាចឱ្យវិស័យនេះមានសម្ទុះខ្លាំងដូចរយៈពេលមុនវិបត្តិកូវីដ១៩បាននោះទេ» ។
អ្នកនាង គឹម គិនកេសា អគ្គនាយិកាក្រុមហ៊ុន CBRE ក៏បានលើកឡើងពាក់ព័ន្ធនឹងតម្រូវការ និងការផ្គត់ផ្គង់អចលនទ្រព្យក្នុងប្រទេសកម្ពុជា ថា កាលមុនវិបត្តិកូវីដ១៩ គ្រាដែលមានតម្រូវការខ្ពស់ អ្នកផ្គត់ផ្គង់បាននាំគ្នាអភិវឌ្ឍដើម្បីផ្គត់ផ្គង់បំពេញតម្រូវការ លុះដល់ពេលមានបញ្ហា តម្រូវការធ្លាក់ចុះ ធ្វើឱ្យអចលនទ្រព្យដែលអភិវឌ្ឍន៍រួចហើយនោះ នៅសល់ច្រើនមិនទាន់មានអ្នកទិញ ដូច្នេះវាជាពេលវេលាដែលត្រូវរកអ្នកទិញមកទិញអចលនទ្រព្យដែលនៅសល់ឱ្យបានច្រើន ឬអស់សិន ទើបមានសកម្មភាពបណ្តាក់ទុនអភិវឌ្ឍគម្រោងថ្មីបន្ថែមទៀត ៕
Account
Security
Favourite Content