សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី CNN បានរាយការណ៍ថា ភាពតានតឹងផ្នែកភូមិសាស្ត្រនយោបាយនៅមជ្ឈិមបូព៌ាកំពុងបង្កការរំខានដល់ការផ្គត់ផ្គង់ប្រេង ដោយតម្លៃប្រេងបានកើនឡើងដល់ ៩១ ដុល្លារក្នុងមួយបារ៉ែលកាលពីសប្តាហ៍មុន។
ស្របពេលនេះដែរ ប្រេងឆៅម៉ាក Brent មានតម្លៃ ៩២,១៦ ដុល្លារក្នុងមួយបារ៉ែល ខណៈដែលប្រេងឆៅម៉ាក US West Texas Intermediate (WTI) មានតម្លៃ ៨៨,០៨ ដុល្លារក្នុងមួយបារ៉ែល។ ការកើនឡើងតម្លៃប្រេងនេះបន្ទាប់ពីមានភាពតានតឹងផ្នែកយោធានៅមជ្ឈិមបូព៌ា ប៉ុន្តែបានធ្លាក់ចុះមកវិញបន្ទាប់ពីមានការចេញផ្សាយថា សហរដ្ឋអាមេរិកឈានដល់កិច្ចព្រមព្រៀងដើម្បីបន្ធូរបន្ថយទណ្ឌកម្មលើវេណេស៊ុយអេឡា។
ទន្ទឹមនឹងនេះ អ្នកវិនិយោគព្រួយបារម្ភថា សង្រ្គាមអ៊ីស្រាអែល និងក្រុមហាម៉ាស់អាចបង្កឱ្យមានជម្លោះកាន់តែទូលំទូលាយនៅក្នុងតំបន់សម្បូរប្រេង និងធ្វើឲ្យការផ្គត់ផ្គង់ប្រេងពិភពលោករឹតតែតឹងតែងថែមទៀត។ អ្នកវិភាគនៅ ANZ Research រំពឹងថា តម្លៃប្រេងអាចឡើងថ្លៃដល់ ១០០ ដុល្លារក្នុងមួយបារ៉ែល ដោយសារតែការកើនឡើងហានិភ័យក្នុងតំបន់ជម្លោះ។
យ៉ាងណាក៏ដោយ បើទោះបីជា អ៊ីស្រាអែល និងតំបន់ហ្គាហ្សាមិនមែនជាអ្នកផ្គត់ផ្គង់ប្រេងដ៏សំខាន់នោះទេ ប៉ុន្តែហានិភ័យចំពោះទីផ្សារប្រេងនឹងកើនឡើង ប្រសិនបើជម្លោះកាន់តែរីកធំ។ ប្រសិនបើអ៊ីរ៉ង់ចូលរួមក្នុងជម្លោះនេះដែរ ការផ្គត់ផ្គង់ប្រេងប្រហែល ២០ លានបារ៉ែលក្នុងមួយថ្ងៃអាចប្រឈមនឹងហានិភ័យនៃការរំខានដោយផ្ទាល់ និងតាមរយៈការដឹកជញ្ជូន។
Stephen Innes ដៃគូគ្រប់គ្រងនៅ SPI Asset Management បាននិយាយថា ហានិភ័យមជ្ឈឹមបូព៌ាកំពុងប៉ះពាល់ដល់តម្លៃទ្រព្យសកម្មជាសកល។ ប្រសិនបើជម្លោះអូសបន្លាយយូរនោះ វាអាចជះឥទ្ធិពលកាន់តែខ្លាំងលើការផ្គត់ផ្គង់ប្រេងពិភពលោកក្នុងរយៈពេលវែង ដោយប៉ះពាល់ដល់ទំនាក់ទំនងរវាងអារ៉ាប៊ីសាអូឌីត និងអ៊ីស្រាអែល រួមទាំងបង្កហានិភ័យធ្លាក់ចុះដល់ផលិតកម្មប្រេងអ៊ីរ៉ង់ ដែលនាំឱ្យតម្លៃប្រេងកើនឡើងបន្ថែមទៀតផងដែរ។ ចាប់តាំងពីខែមិថុនាមក តម្លៃប្រេងសកលបានឡើងថ្លៃរួចទៅហើយ ដោយសារអារ៉ាប៊ីសាអូឌីត និងរុស្ស៊ីបានកាត់បន្ថយផលិតកម្ម។
មិនត្រឹមតែប៉ុណ្ណោះ រូបិយប័ណ្ណអ៊ីស្រាអែលបានធ្លាក់ចុះជិត ៤ ភាគរយជាលើកដំបូងតាំងពីឆ្នាំ២០១៥។ ធនាគារកណ្តាលរបស់អ៊ីស្រាអែលបាននិយាយថា ខ្លួនគ្រោងនឹងលក់រូបិយប័ណ្ណបរទេសរហូតដល់ ៣០ ពាន់លានដុល្លារ ដើម្បីធ្វើឱ្យមានស្ថិរភាពជាមួយនឹងប្រាក់ដុល្លារ ដោយសារវាបានធ្លាក់ចុះយ៉ាងខ្លាំងបន្ទាប់ពីការវាយប្រហាររបស់ក្រុមហាម៉ាស៕
Account
Security
Favourite Content