សហគមន៍កសិកម្ម ជាការចងក្រងបងប្អូនប្រជាកសិករដែលមានដីដាំដុះដំណាំ មិនថាលើដីទំហំតូច ឬធំនោះទេ ដើម្បីប្រមូលផ្ដុំគ្នាជាក្រុមមួយដែលអាចចែករំលែកចំណេះដឹងកសិកម្ម រួមគ្នាដោះស្រាយបញ្ហា ក៏ដូចជារកទីផ្សារផងដែរ។ ក្នុងនោះ តួនាទីជាគ្រូបង្គោលនៅក្នុងសហគមន៍ ជាអ្នកប្រឹក្សាចែករំលែកចំណេះដឹង និងធ្វើជាគំរូដល់បងប្អូនកសិករ។

ជាក់ស្ដែង លោក ស្ងួន ទូច ជាគ្រូបង្គោល និងជាគណកម្មការសហគមន៍កសិកម្ម គុណវុឌ្ឍិល្បើក ស្ថិតក្នុងភូមិត្រពាំងថ្ម ឃុំល្បើក ស្រុកឈូក ខេត្តកំពត បានប្រាប់ឱ្យដឹងថា តួនាទីជាគ្រូបង្គោលនេះ លោកបានទទួលការបណ្ដុះបណ្ដាលផ្នែកបច្ចេកទេសកសិកម្ម មិនថាការជ្រើសរើសពូជ ការដាំ ការផលិតជីសរីរាង្គ និងការស្រោចស្រពនោះទេ ដើម្បីយកមកអនុវត្តធ្វើជាគំរូ និងចែករំលែកបន្តដល់បងប្អូនកសិករក្នុងភូមិ។

លោកបញ្ជាក់ថា ៖

«ជាគ្រូបង្គោលប្រចាំសហគមន៍ ខ្ញុំបានទទួលការបណ្ដុះបណ្ដាលបច្ចេកទេសដាំបន្លែ​ពីអង្គការ Helen Keller ដែលមានតាំងពីការធ្វើប្រព័ន្ធទុយោទឹក គ្របតង់ និងបណ្ដុះកូន ដើម្បីយកមកចែករំលែកបន្តដល់កសិករក្នុងសហគមន៍ ហើយក្រោយពីវគ្គបណ្ដុះបណ្ដាល និងមានចំណេះដឹងកសិកម្មច្រើនមក ខ្ញុំយកមកចែករំលែកដល់កសិកររបស់ខ្ញុំ ហើយខ្លួនខ្ញុំក៏បានអនុវត្តទៅជោគជ័យច្រើន ក៏បានយកបទពិសោធនេះចែករំលែកដែរ ដែលគាត់ណាដែលមានចំណាប់អារម្មណ៍ដាំដុះបន្លែណា ខ្ញុំណែនាំឱ្យគាត់ដាំ ទាំងផែនការផ្សេងៗ»។

លោកបន្ថែមថា ៖

«ពាក់ព័ន្ធនឹងបច្ចេកទេសដែលយើងចែករំលែក ទីមួយយើងឱ្យជ្រើសរើសពូជ ពូជណាដែលល្អ ទីផ្សារគេនិយមប្រើ ឯទុយោទឹកត្រូវប្រើទុយោតំណក់ដែលងាយស្រួលប្រើ និងមិនខ្ជះខ្ជាយទឹក។ យើងក៏បានណែនាំឱ្យពូកគាត់ធ្វើជារោងបណ្ដុះកូន លាយល្បាយដីបណ្ដុះកូន ដោយប្រើធ្យូងអង្កាម លាមកសត្វពុកផុយ និងដីដំបូកយកមកលាយគ្នាគិតជាភាគរយឱ្យគាត់បណ្ដុះកូន។ បន្ទាប់មក យើងឱ្យគាត់រៀបចំធ្វើជីកំប៉ុសិ៍ ដោយយកលាមកគោ លាយជាមួយដើមរុក្ខជាតិចិញ្ច្រាំ រួចគ្របឱ្យជិត លុះក្លាយជាជីយកមកដាក់ទ្រាប់បាតមុនដាំ ដើម្បីធ្វើឱ្យបន្លែកាន់តែលូតលាស់បានល្អ»។

លោកបានបញ្ជាក់ទៀតថា ៖

«ពាក់ព័ន្ធនឹងការប្រើប្រាស់ជីនេះដែរ ភាគច្រើនយើងប្រើជាប្រភេទកាកសំណល់ ដូចជា ធ្យូងអង្កាម និងលាមកគោ ដើម្បីរៀបមុនលើករងទ្រាប់បាតវាជាមុន បន្ទាប់មកយើងក៏ណែនាំពួកគាត់ឱ្យផលិតជីកំប៉ុសិ៍ ដោយយកលាមកគោច្រកថង់ ដាក់ត្រាំទឹក ហើយយកទឹកនោះមកស្រោចតាមគល់តាមរយៈទុយោតំណក់ទឹក។ នេះជាអ្វីដែលគ្រូបង្គោលខាងលើបានលើកឡើង»។

ចំពោះការដាំដុះបន្លែតាមបច្ចកទេសនេះដែរ លោក ស្ងួន ទូច បានរៀបរាប់ទៀតថា វាមានផលចំណេញ ពោលគឺចំណេញក្នុងភាគរយខ្ពស់មែនទែន ព្រោះកសិករមិនមានប្រើជីដែលដាក់លក់នៅលើទីផ្សារនោះទេ ពោលគឺកសិករប្រើជីដែលបង្កើតឡើងដោយខ្លួនឯង គ្មានសារធាតិគីមី ហើយអាចទទួលបានទិន្នផលខ្ពស់ ប្រកបដោយសុវត្ថិភាពទាំងសមាជិកក្នុងគ្រួសារ ទាំងអតិថិជនដែលទិញយកទៅទទួលទាន។

គួរបញ្ជាក់ដែរថា ការបណ្ដុះបណ្ដាលចំណេះដឹងកសិកម្មនេះបានជួយសម្រួលដល់ជីវភាពបងប្អូនប្រជាកសិករក្នុងសហគមន៍បានច្រើន ព្រោះកាលពីដើមឡើយមានអ្នកចំណាកស្រុក ទៅធ្វើការសំណង់នៅតាមបណ្តាខេត្ត ប៉ុន្តែក្រោយពីទទួលបានការបណ្ដុះបណ្ដាលចំណេះដឹង និងជំនាញផ្នែកកសិកម្ម សមាជិកទាំង ២២គ្រួសារក្នុងសហគមន៍អាចមានលទ្ធភាពធ្វើកសិកម្ម ដាំបន្លែចម្រុះជុំវិញផ្ទះ ក៏អាចរកចំណូលចិញ្ចឹមគ្រួសារ និងមិនបាច់ទៅឆ្ងាយពីស្រុកភូមិ៕