រុយស ជាពពួកសត្វល្អិតបំផ្លាញ ដែលជញ្ជក់រុក្ខរសពីស្លឹករុក្ខជាតិ ជាពិសេសដំណាំស្រូវ ធ្វើឱ្យស្លឹកប្រែទៅជាពណ៌លឿង និងរួញ។ ហេតុនេះកសិករ ក៏ដូចជាអ្នកដាំស្រូវផ្ទាល់ គួរយល់ដឹងពីចំណុចសំខាន់ៗរបស់រុយស ផលប៉ះពាល់ និងវិធានការកម្ចាត់សត្វចង្រៃទាំងនេះឱ្យបានខ្ជាប់ខ្ចួន។

រុយស ដែលបំផ្លាញដំណាំស្រូវមានវដ្ដជីវិតរយៈពេល ១៧ ទៅ ២៤ថ្ងៃ ដោយរុយ ស មួយក្បាលអាចពងបានចន្លោះពី ១០០ ទៅ ២០០ ពង ហើយរុយញីពងដាក់លើផ្ទៃស្លឹកផ្នែកខាងក្រោម រហូតដល់ពេល ២ថ្ងៃ វាក៏ចាប់ផ្ដើមញាស់។ ពងរុយមានទំហំតូចត្រឹម ០.២មីលីម៉ែត្រ មានពណ៌បៃតងលឿង ប្ដូរទៅជាបៃតងស្រាល ហើយសីតុណ្ហភាពសមស្របសម្រាប់សត្វល្អិតនេះរស់នៅ និងចេញសកម្មភាពបំផ្លាញគឺស្ថិតនៅចន្លោះ ៣០អង្សាសេ។

រុយស អាចបំផ្លាញដំណាំស្រូវដោយផ្ទាល់តាមរយៈការជញ្ជក់រុក្ខរសពីស្លឹកស្រូវ ពិសេសនៅពេលព្រឹក ដែលធ្វើឱ្យស្លឹកស្រូវប្រែទៅជាពណ៌លឿង និងរួញខូច។ វាមានសកម្មភាពបំផ្លាញខ្លាំងលើដំណាំស្រូវនៅក្នុងវគ្គលូតលាស់ និងបែកគុម្ព ដោយការបំផ្លាញរបស់វាធ្វើឱ្យប៉ះពាល់ដល់សេដ្ឋកិច្ច ចាប់ពី ៣០-៤០ក្បាលក្នុងមួយគុម្ព នោះទិន្នផលក៏អាចបាត់បង់ពី ២៣-៣១ភាគរយ ឬមានការបាត់បង់កាន់តែធ្ងន់ធ្ងរប្រសិនបើវាបំផ្លាញក្នុងដំណាក់កាលស្រូវចេញផ្កា។

សម្រាប់វិធីសាស្ត្រពិនិត្យវត្តមានរុយស កសិករត្រូវគោះស្លឹកស្រូវ រួចពិនិត្យមើលមានឃើញរុយសហើរ ឬទេ ហើយត្រូវមើលជាពិសេសនៅផ្នែកខាងក្រោមស្លឹក និងយកចិត្តទុកដាក់បំផុតនៅកំឡុងពេលស្រូវបែកគុម្ពដល់ចេញផ្កា។ ចំពោះទីតាំងស្រែដែលជិតចំការផ្សេងទៀតដូចជា ចំការត្របែក ដំឡូងមី និងសួនបន្លែនានា ត្រូវពិនិត្យឱ្យបានម៉ត់ចត់។ ក្រៅពីនេះ ស្រែដែលមានប្រើប្រាស់ជីអាសូតច្រើន ឬពូជស្រូវក្រអូប និងស្រូវដំណើប ក៏ជាកន្លែងដែលរុយសចូលចិត្តរសនៅដែរ។

ទន្ទឹមគ្នានេះដែរ កសិករអាចរកវិធានការគ្រប់គ្រង និងកម្ចាត់រុយស តាមរយៈការរកពូជស្រូវដែលធន់ជាមួយរុយស ដូចជា ពូជស្រូវដែលមានស្លឹកឈរត្រង់។ គេអាចស្ទូង ឬព្រោះឱ្យបានស្រុះគ្នា កុំឱ្យក្រាស់ពេក ការប្រើជីឱ្យបានត្រឹមត្រូវតាមបច្ចេកទេស ប្រើអន្ទាក់ស្អិតពណ៌លឿងសម្រាប់ពិនិត្យវត្តមានរបស់រុយសដើម្បីអាចកម្ចាត់ទាន់ពេលវេលា។ ថែមពីលើនេះ កសិករក៏ត្រូវចុះត្រួតពិនិត្យស្រែជាប្រចាំយ៉ាងហោចណាស់ ២-៣ដងក្នុងមួយសប្ដាហ៍ សម្អាតស្មៅដែលជាជម្រកករុយសទាំងក្នុងស្រែ និងបរិវេណជុំវិញស្រែ។ ក្នុងករណីមានវត្តមានរុយសចន្លោះពី ៣០-៤០ក្បាលក្នុងមួយគុម្ព ត្រូវរកវិធានកម្ចាត់ ហើយបើមានការបំផ្លាញធ្ងន់ធ្ងរ ត្រូវបាញ់ថ្នាំកសិកម្ម តែជាថ្នាំដែលបានចុះបញ្ជីកាត្រឹមត្រូវ ដូចជា Acephate, Etofenprox, Buprofenzin, Abamectin, Imidacloprid, ឬ Thiamethoxam ហើយបាញ់នៅពេលព្រឹកចាប់ពីម៉ោង ៦-៩ព្រឹក៕