ភ្នំពេញ ៖ ការសន្សំ គឺជាផ្នែកមួយនៃផែនការហិរញ្ញវត្ថុដែលបុគ្គលគ្រប់រូប និងគ្រប់វ័យគួរតែមានជាប់ខ្លួន។ យ៉ាងណាក៏ដោយ មនុស្សភាគច្រើនបែរជាយល់ថា ការសន្សំសំខាន់តែសម្រាប់វ័យមួយចំនួនប៉ុណ្ណោះ ដូចជាវ័យមានគ្រួសារ និងការងារជាដើម ប៉ុន្តែបើតាមស្ថានភាពជាក់ស្ដែងគឺមិនដូច្នោះទេ។ ផ្ទុយទៅវិញទម្លាប់ក្នុងការសន្សំ កាលណាត្រូវ​បាន​បណ្ដុះ​តាំងពីវ័យក្មេង គឺកាន់តែល្អ ដូចដែល​ពាក្យចាស់មួយពោលថា «ពត់ឈើទាន់នៅខ្ចី ប្រដៅកូនប្រុស ស្រីទាន់នៅក្មេង»។ ពាក្យ​នេះបង្ហាញឱ្យយើងឃើញថា ទម្លាប់ល្អ វិន័យនៅ​ក្នុងការចាយវាយគឺយើងត្រូវចាប់ផ្ដើមពីវ័យ​ដែលក្មេងខ្ចីនេះទៅ។ នេះបើតាមការលើកឡើងរបស់ លោកជំទាវ ឌិត នីតា ប្រធានសមាគមមីក្រូហិរញ្ញវត្ថុកម្ពុជា នាឱកាសទិវាសន្សំអាស៊ានកាលពីពេលកន្លងទៅ។

លោកជំទាវ ឌិត នីតា បានបន្តឱ្យដឹងទៀតថា ៖

«ការសន្សំ គួរតែត្រូវបានចាប់ផ្ដើមតាំងពីវ័យកុមារមកម៉្លេះ ព្រោះការ​មានទម្លាប់​​ដ៏ល្អនេះអាចជួយឱ្យប្អូនៗទទួលបាននូវឯករាជ្យផ្នែកហិរញ្ញវត្ថុ នៅពេលដែល​ប្អូនៗធំ​ពេញវ័យ ឬក៏ចូលទៅ​ក្នុងវ័យធ្វើការងារ ហើយទម្លាប់ពីក្មេងនេះទៀតសោត គឺត្រូវការ​ការចូលរួម​ពីឪពុកម្ដាយ អាណាព្យាបាល ដែលពួកគាត់គឺជាគ្រូទី១របស់ប្អូនៗ»។

កញ្ញា ភឿន សុតី ដែលជាបេក្ខនារីឡើងធ្វើបទបង្ហាញអំពីបទពិសោធន៍គ្រប់គ្រងហិរញ្ញវត្ថុផ្ទាល់ខ្លួន ក៏បានឱ្យដឹងដែរថា កញ្ញាបានអនុវត្តនូវការសន្សំតាំងតែពីវ័យក្មេងរហូតដល់បច្ចុប្បន្ន ហើយនឹងនៅតែបន្តសន្សំក្នុងពេលអនាគតផងដែរ។ ប៉ុន្តែបើទោះជាយ៉ាងនេះក្ដី ការសន្សំកាលពីវ័យក្មេង​ យុវតីរូបនេះមិនបានជ្រើសរើសយកវិធីសាស្ត្រសមស្របនោះទេ ជាហេតុធ្វើឱ្យកញ្ញាបាត់បង់ប្រាក់សន្សំនោះជាយថាហេតុ។ ឆ្លងកាត់បទពិសោធន៍នេះ និងដោយមានការណែនាំពីគ្រួសារផង យុវតី ភឿន សុតី ក៏ចាប់ផ្ដើមដាក់ប្រាក់សន្សំនៅតាមស្ថាប័នហិរញ្ញវត្ថុផ្លូវការវិញម្ដង។

យ៉ាងណាមិញ នៅក្នុងដំណើរនៃការសន្សំប្រាក់ប៉ុន្មានឆ្នាំមកនេះ កញ្ញាបានបណ្ដុះនូវទម្លាប់ល្អៗជាច្រើន។ ក្នុងនោះកញ្ញាបានលើកឡើងនូវចំណុចសំខាន់ៗថា៖

«ការសន្សំបាន​បណ្ដុះទម្លាប់​ល្អឱ្យខ្ញុំដូចជា ឱ្យខ្ញុំមានវិន័យល្អចំពោះខ្លួនឯង ការចាយវាយមានខ្ទង់ត្រឹមត្រូវ ធ្វើឱ្យខ្ញុំមានភាព​អត់ធ្មត់ច្រើនជាងមុន។ មិនត្រឹមតែប៉ុណ្ណោះ ការសន្សំប្រាក់ធ្វើឱ្យខ្ញុំមានចំណេះដឹងផ្នែកហិរញ្ញវត្ថុ និងអាចកសាងអនាគតឱ្យកាន់តែល្អប្រសើរ។ ល្អប្រសើរនៅត្រង់ថា ខ្ញុំអាចសម្រេចក្ដីប្រាថ្នារបស់ខ្ញុំជាច្រើន ដោយមិនមានការបារម្ភថាមានលុយមិនគ្រប់គ្រាន់នោះទេ»។

តាមរយៈការចែករំលែកបទពិសោធន៍ជាក់ស្ដែងនេះ លោកជំទាវប្រធានសមាគមក៏នៅតែបន្តជំរុញទឹកចិត្តឱ្យប្រជាជនបណ្ដុះទម្លាប់សន្សំ​ ដោយបំភ្លេចចោលនូវគំនិតដែលថា ចាំរហូតដល់មានប្រាក់ចំណូលច្រើនទើបសន្សំ។ ផ្ទុយទៅវិញ ទម្លាប់សន្សំគួរតែត្រូវបានបណ្ដុះនៅពេលមានប្រាក់ចំណូលតិច ដូច្នេះ នៅពេលដែលបុគ្គលនោះកើនចំណូល គឺរូបគេអាចទប់ចិត្តក្នុងការចាយវាយបាន។

ជាការចូលរួមចំណែកជំរុញនូវចលនាសន្សំ ធនាគារជាតិនៃកម្ពុជា​ រួមជាមួយនឹងក្រសួងអប់រំ ក៏ដូចជា​សមាគមទាំងពីរ (សមាគមធនាគារ និងសមាគមមីក្រូហិរញ្ញវត្ថុ) បានសហការគ្នា​ក្នុងការបញ្ចូល​ចំណេះដឹងហិរញ្ញវត្ថុទៅក្នុងកម្មវិធីសិក្សា ដើម្បីឱ្យសិស្សានុសិស្សអាចស្វែងយល់ទាំងការសន្សំ ការចំណាយ ការវិនិយោគ និងការធ្វើផែនការហិរញ្ញវត្ថុផ្សេងទៀត។

ដោយឡែក សម្រាប់សមាគមមីក្រូហិរញ្ញវត្ថុកម្ពុជាផ្ទាល់តែម្ដង ក៏តែងតែផ្សព្វផ្សាយជាប្រចាំដើម្បីបង្កើតវប្បធម៌សន្សំជូនទៅដល់​សាធារណៈជន និងបានបង្កើតនូវវីដេអូអប់រំមួយចំនួនទៀត ដើម្បីផ្សព្វផ្សាយនៅលើបណ្ដាញសង្គមតាមរយៈគណនី (page) ​របស់សមាគម ក៏ដូចជាគ្រឹះស្ថានដែលជាសមាជិកផងដែរ៕