ភ្នំពេញ៖ យោងតាមរបាយការណ៍លម្អិតរបស់សហព័ន្ធស្រូវអង្ករកម្ពុជា (CRF) បានបញ្ជាក់ថា នៅឆ្នាំ២០២៥ កន្លងទៅនេះ កម្ពុជាបានសម្រេចនាំចេញអង្ករទៅកាន់ទីផ្សារអន្តរជាតិសរុបចំនួន ៩៤០ ៣២១ តោន គិតជាទឹកប្រាក់បានចំនួន ៦០២.​៤១លានដុល្លារសហរដ្ឋអាម៉េរិក បើធៀបទៅនឹងឆ្នាំ២០២៤ ដែលនាំចេញបានត្រឹមតែ ៦៤ម៉ឺនតោននោះ មានការកើនឡើង ៤៥.៥៩ ភាគរយ។

សម្រាប់បរិមាណអង្ករដែលបាននាំចេញរហូតដល់ជាង ៩៤ម៉ឺនតោនខាងលើនេះត្រូវបានធ្វើឡើងតាមរយៈក្រុមហ៊ុនចំនួន ៦៨ ឆ្ពោះទៅកាន់ទីផ្សារគោលដៅចំនួន ៧៥ រួមមាន ៖

-​ ឆ្ពោះទៅកាន់បណ្តាប្រទេសនៅក្នុងតំបន់អឺរ៉ុបចំនួន ២៨ មានបរិមាណអង្ករចំនួន ៣៣៩ ៤១៧ តោន គិតជាទឹកប្រាក់ចំនួន ២៥៨.២៨ លានដុល្លារសហរដ្ឋអាម៉េរិក។​ ឆ្ពោះទៅកាន់ប្រទេសចិន និងហុងកុង ចំនួន ២៣១ ១២៥ តោន គិតជាទឹកប្រាក់ចំនួន ១៣៨.៣៦ លានដុល្លារសហរដ្ឋអាម៉េរិក និងនាំចេញទៅកាន់ប្រទេសក្នុងអាស៊ានចំនួន ៨ប្រទេស បានបរិមាណចំនួន ២៧​​​៣ ៦៥៧ តោន គិតជាទឹកប្រាក់ចំនួន ១១៧.៦២ លានដុល្លារសហរដ្ឋអាម៉េរិក។

ក្រៅពីនេះ នៅមានទីផ្សារគោលដៅផ្សេងៗចំនួន ៣៧ប្រទេសទៀត មានដូចជា អាហ្វ្រិក មជ្ឈឹមបូព៌ា អាម៉េរិក កាណាដា អូស្ត្រាលី ញ៉ូហ្សេឡេន -ល- បានចំនួន ៩៦ ១២២តោន គិតជាទឹកប្រាក់ចំនួន ៨៨.១៥ លានដុល្លារសហរដ្ឋអាម៉េរិក។ ដោយឡែកចំពោះ​ប្រភេទអង្ករដែលបាននាំចេញទាំងនោះរួមមាន អង្ករក្រអូប ៦៤.០២%, ប្រភេទអង្ករសគ្រាប់វែង ១៣.៧១% , ប្រភេទអង្ករចំហុយ ២% , ប្រភេទអង្ករសរីរាង្គ ១.៣២% , ប្រភេទអង្ករបាក់គ្រប់ប្រភេទ ១៨.៥៦% និងអង្ករផ្សេងៗប្រមាណ ០.៣៩%។

ឧកញ៉ា ឡាយ ឈុនហួរ ប្រធានសហព័ន្ធស្រូវអង្ករកម្ពុជា ធ្លាប់បានថ្លែងថា ប្រជាពលដ្ឋ​អាស៊ី ដូចជា កម្ពុជា ចិន វៀតណាម ជាដើម ដែលកំពុងរស់នៅតំបន់អឺរ៉ុប ​បានគាំទ្រជាខ្លាំងលើអង្ករកម្ពុជា​ ដោយសារតែអង្ករកម្ពុជាមានគុណភាពល្អ និងមានក្លិនក្រអូប​ ខណៈបច្ចុប្បន្នអង្ករកម្ពុជាដែលនាំចេញទីកាន់ទីផ្សារអឺរ៉ុប ​ទទួលបានការលើកលែងពន្ធ EBA ​ដែលធ្វើឱ្យអង្ករកម្ពុជាមានតម្លៃប្រកួតប្រជែង។

លោកឧកញ៉ា ក៏បានកត់សម្គាល់ដែរថា នៅក្នុងតំបន់អឺរ៉ុប វត្តមានអង្ករកម្ពុជា​មានស្ទើគ្រប់ទីផ្សារ លើកលែងតែប្រទេស​ខ្លះ ដូចជា សហរដ្ឋអាមេរិក កា​ណាដា អូស្រ្ដាលី មានមិនសូវច្រើននោះទេ ​ដោយសារពុំទាន់មានការផ្សព្វផ្សាយ​ឱ្យបានទូលំទូលាយ ដូច្នេះហើយពលរដ្ឋអាស៊ីទាំងនោះនៅតែបន្តប្រើអង្ករដែលមានស្លាកយីហោរបស់ប្រទេសផ្សេងដែល​នាំចូលមុនកម្ពុជាដដែល។ ពាក់ព័ន្ធនឹងករណីនេះ ​ក្រសួងពាណិជ្ជកម្ម និងសហព័ន្ធស្រូវអង្ករកម្ពុជា​ បាន និងកំពុងខិតខំធ្វើពិពិធកម្ម បើកទីផ្សារថ្មីៗ ក៏ដូចជាជំរុញការផ្សព្វផ្សាយបន្ថែមទៀត ដើម្បីឲ្យអង្កររបស់កម្ពុជាមានទីផ្សារកាន់តែច្រើន ព្រោះថា ដើម្បីឱ្យពលរដ្ឋប្រើប្រាស់ផលិតផលជាតិច្រើន ទាល់តែមានអង្ករលក់លើទីផ្សារទាំងនោះ។

សូមជ្រាបថា ក្រៅពីអង្ករដែលបាននាំចេញក្នុងបរិមាណដូចបានជម្រាបលម្អិតខាងលើនេះ កម្ពុជាក៏បាននាំចេញស្រូវចំនួន ៦ ៨៥៩ ៩៣០ តោន (ស្រូវសើម) គិតជាទឹកប្រាក់ប៉ាន់ប្រមាណបានចំនួន ១ ៥៧៩.៨៦ លានដុល្លារសហរដ្ឋអាម៉េរិក។ នៅក្នុងឆ្នាំ២០២៥កន្លងទៅនេះ ការនាំចេញអង្កររបស់កម្ពុជា មានកំណើនសរុបចំនួន ៤៥.៥៩% ហើយការនាំចេញស្រូវ មានកំណើនសរុបចំនួន ៣២.៤៣% ធៀបទៅរយៈពេលដូចគ្នាក្នុងឆ្នាំ២០២៤។ នេះបើតាមការអះអាងរបស់សហព័ន្ធស្រូវអង្ករកម្ពុជា៕