ប្រចាក់ ឬស្មាច់ភ្លើង គឺជារុក្ខជាតិម្យ៉ាងដែលមានស្លឹកស្រដៀងទៅនឹងស្លឹកប្រេងខ្យល់ដែរ ប៉ុន្តែមានដើមតូចៗ ដុះនៅតាមវាលស្រែ ដោយខ្លះមានកម្ពស់ត្រឹមជង្គង់ ឬត្រឹមចង្កេះ ដែលគេអាចចម្រាញ់យកប្រេងរបស់វាមកធ្វើជាប្រេងខ្យល់ ប្រេងរឹត ឬធ្វើប្រេងកូឡាបានយ៉ាងមានប្រសិទ្ធភាព។ ដោយឃើញអត្ថប្រយោជន៍ដ៏ល្អនេះ កូនខ្មែរមួយក្រុមបានសហការគ្នាទិញប្រេងប្រចាក់ពីកសិករនៅក្នុងខេត្តស្វាយរៀង យកមកកែច្នៃលាយជាមួយគ្រឿងផ្សំមួយចំនួនទៀត ផលិតបានជាប្រេងខ្យល់ ប្រេងរឹត និងប្រេងកូឡា មានគុណភាពល្អមិនចាញ់ផលិតផលនាំចូលពីក្រៅប្រទេសនោះទេ។

លោក ខុន​ លាងហេង​ នាយកប្រតិបត្តិសហគ្រាស ស្រ៊ុន ឆ្លាត បានឱ្យដឹងថា កន្លងមកក្រុមការងារបច្ចេកទេសបានផលិតប្រេងខ្យល់ ឬប្រេងរឹតច្នៃចេញពីប្រេងស្លឹកគ្រៃប៉ុណ្ណោះ ប៉ុន្តែដោយមើលឃើញ​អត្ថប្រយោជន៍ល្អរបស់វា (ប្រចាក់) ក្រុមការងារក៏បានសម្រេចចិត្តយកប្រេងប្រចាក់មកកែច្នៃផលិតបានជាផលិតផលសម្រេច រួមមានដូចជាប្រេងកូឡា ប្រេងខ្យល់ និងប្រេងរឹត មានគុណភាពល្អ ប្រសិទ្ធភាពខ្ពស់ក្នុងការប្រើប្រាស់ ហើយបាន និងកំពុងចរាចរណ៍ដាក់លក់នៅលើទីផ្សារ ដោយចាប់ផ្តើមមានការគាំទ្រពីសំណាក់អតិថិជនក្នុងស្រុកជាបណ្តើរៗទៀតផង។

លោកបញ្ជាក់ថា ៖ «មុននឹងផលិតបាននូវផលិតផលខាងលើ ក្រុមការងារបច្ចេកទេសបានខិតខំកែច្នៃផលិតឱ្យចេញជាផលិតផលនេះឡើង ប្រកបដោយស្តង់ដារ និងសុវត្ថិភាពខ្ពស់ ព្រមទាំងបានធ្វើពិសោធន៍អស់រយៈពេលជាយូរក្រោមកិច្ចសហការជាមួយក្រុមវេជ្ជបណ្ឌិតឯកទេស មកពីសាកលវិទ្យាល័យពុទ្ឋិសាស្រ្តកម្ពុជា និងបានឆ្លងកាត់ការត្រួតពិនិត្យគុណភាព ដោយវិទ្យាស្ថានស្តង់ដារកម្ពុជាយ៉ាងត្រឹមត្រូវទៀតផង»។

លោកបានឱ្យដឹងថា អ្វីដែលជាចលករជំរុញ និងលើកទឹកចិត្តដល់ក្រុមការងារបច្ចេក រហូតផលិតបានជាផលិតផលផលមានគុណភាពល្អ មិនប៉ះពាល់សុខភាព គឺដោយសារចង់បង្ហាញថា កូនខ្មែរក៏មានសមត្ថភាពមិនចាញ់បរទេសនោះដែរ គួបផ្សំកម្ពុជាមានវត្ថុធាតុដើមល្អៗសំបូរបែប ជាពិសេសក្នុងគោលបំណងចូល​រួមលើកស្ទួយសេដ្ឋកិច្ចគ្រួសារកសិករឱ្យបានល្អប្រសើរឡើងថែមមួយកម្រិតទៀតនោះ។

លោក គង់ មាន ជាកសិកររស់នៅភូមិទួលច្រេស ឃុំពពេត​ ស្រុកស្វយទាប ខេត្តស្វាយរៀងបានមានប្រសាសន៍ថា ដើមប្រចាក់ មានដុះនៅតាមវាលស្រែជាយូរមកហើយ ហើយក៏មានកសិករមួយចំនួនបានដាំវាបន្ថែមដើម្បីចម្រាញ់យកប្រេងលក់ឱ្យឈ្មួញវៀតណាម ប៉ុន្តែឈ្មួញវៀតណាមឱ្យត​ម្លៃទាបពេក ដោយក្នុងមួយលីត្រតម្លៃចន្លោះពី ៥ ទៅ ៧ ម៉ឺនរៀលប៉ុណ្ណោះ ប៉ុន្តែស្របពេលមានតម្រូវការក្នុងស្រុកអាចលក់បានថ្លៃជាង ដោយមួយលីត្រលក់បានប្រមាណជា ១២ម៉ឺនរៀល ទើបធ្វើឱ្យកសិករមួយចំនួនទៀតបោះបង់មុខរបរធ្វើស្រែ ហើយងាកមកដាំដើមប្រចាក់នេះកាន់តែច្រើនទៅៗ។

អ្នកស្រី រាជ សាបា ជាកសិករនៅភូមិខាងលើបានឱ្យដឹង កសិករប្រមាណជា៥០គ្រួសារបានបោះបង់មុខរបរធ្វើស្រែ ហើយងាកមកដាំដើមប្រចាក់នេះវិញ ដោយសារការធ្វើស្រែមួយរដូវ ក្នុងមួយហិកតាចំណេញមិនបាន ១០០០ដុល្លារផង ចំណែកការដាំដើមប្រចាក់វិញ កសិករអាចរកបានចំណូលចន្លោះ ១៥០០ ទៅជិត ២០០០ដុល្លារក្នុងមួយហិកតា។

គួរបញ្ជាក់ថា ដើមប្រចាក់ ងាយស្រួលដាំ និងងាយស្រួលថែទាំ ដោយកសិករអាចចំណាយពេលដាំដុះប្រមាណជា ៣-៤ខែ អាចប្រមូលផលបានហើយ។ ចំពោះស្លឹកប្រចាក់ចំនួន២០០គីឡូក្រាម គេអាចចម្រាញ់ប្រេងបាន ០១គីឡូក្រាម ហើយមិនសូវប្រើជី ប្រើថ្នាំដូចធ្វើស្រែនោះទេ ទើបកសិករនាំគ្នាដាំច្រើនឡើងៗ។ កសិករខាងលើ ក៏បានអំពាវនាវដល់ពលរដ្ឋខ្មែរទាំងក្នុង និងក្រៅប្រទេស ជួយគាំទ្រផលិត​ផលរបស់កូនខ្មែរយើង មិនប្រើសារធាតុគីមី ហើយមានគុណភាពល្អមិនចាញ់ផលិតផលនាំចូលនោះទេ ហើយចំណែកតម្លៃក៏សមរម្យ។ ការជួយគាំទ្រផលិតផលប្រេងខ្យល់ និងប្រេងកូឡាកូនខ្មែរគឺបានចូលរួមជួយលើកកំពស់សេដ្ឋកិច្ចជាតិ ជាពិសេសជួយសម្រាលដល់កម្រិតជីវភាពកសិករបានមួយចំណែកផងដែរ៕ វិន ឈុនហ៊ាត