ភ្នំពេញ ៖ នៅក្នុង​ប្រទេ​សកម្ពុជា​​ សហគ្រិនជាស្ត្រី​មានរហូតដល់ជាង​៦០​ភាគរយ ប៉ុន្តែ​សម្រាប់វិស័យ​មូល​បត្រ​វិញ​ឃើញថា ​មានស្ត្រី​ចូលរួម​វិនិយោគ​ប្រមាណតែជាង​៣០ភាគរយប៉ុណ្ណោះ ដូច្នេះ​និយ័តករ​មូលបត្រ​កម្ពុជា បាន​ជំរុញ និងលើកទឹកចិត្ត​ដល់​ស្ត្រីចូលរួមក្នុងវិស័យ​នេះ​កាន់តែច្រើន​ដើម្បី​ចូលរួម​ចំណែក​ដល់​កា​ររីក​លូតលាស់​នៃវិស័យមូលបត្រ និង​សេដ្ឋកិច្ចកម្ពុជាក្នុងពេល​ស្ត្រីដើរតួនាទី​សំខាន់​ទាំង​ក្នុងសង្គម​ និង​សេដ្ឋកិច្ច ។​

ឯកឧត្តម​ ស៊ូ សុជាតិ ​ប្រតិភូ​រាជរដ្ឋាភិបាល​ទទួលបន្ទុកជា​អគ្គ​នាយក​និយ័តករ​មូល​បត្រ​កម្ពុជា បានប្រសាសន៍​នៅក្នុងពិធីបន្លឺសំឡេង​កណ្ដឹង ដើម្បី​សមភាព​យេនឌ័រសម្រាប់​ស្ត្រី និង​យុវតីទាំងអស់ កាលពីរសៀល​ថ្ងៃទី​២៥ ខែមីនា ឆ្នាំ២០២៥ ឱ្យដឹងថា វិស័​យ​មូល​បត្រ​គឺជាវិស័យ​មួយ​ដែលដើរ​ស្រ​បតាមគោល​នយោបាយរបស់រាជរដ្ឋាភិបាល​ សមភាពយេនឌ័រ​ ដែលមកដល់ពេលនេះ ក្នុងវិស័យ​មូលបត្រអ្នក​ដែល​បើក​គណនីជួញដូរ​ជាស្ត្រី​មានប្រមាណ ៣៧ភាគរយ​ ហើយនិយ័តករមូលបត្រ​ក៏នឹង​ត្រៀម​រៀបចំដាក់​ចេញ​នូ​វវិធានការ​ផ្សេងៗផ្ដល់​ឱកាស​ឱ្យ​ស្ត្រីចូលរួម​បាន​ទាំង​ការងារ​ធុរកិច្ច ទាំង​ប្រតិបត្តិករ ​ក្រុមហ៊ុនដែលពាក់ព័ន្ធនឹ​ងវិស័យ​មូល​បត្រ ក៏ដូចជា​វិនិយោគិនជាស្ត្រីផងដែរ ។

ឯកឧត្តម​បន្តថា ៖

«និយ័តករ​មូលបត្រ​កម្ពុជា​ក៏នឹង​រៀបចំផលិតផលពិសេស​មួយ​សម្រាប់សមភាពយេនឌ័រនៅ​ក្នុង​វិស័យមូលបត្រ​កម្ពុជា ។ សមភាពយេនឌ័រ​ គឺជាអ្វីមួយដែលយើ​ងត្រូវ​ចូលរួម​ទាំងអស់គ្នា ជាអ្វី​មួយ​ដែល​យើង​​ត្រូវ​លើក​កម្ពស់​ទាំងអស់គ្នា ។ តាមរយៈ​កម្មវិធី​បន្លឺ​សំឡេង​កណ្ដឹង​​ដើម្បីសមភាពយេនឌ័រ​សម្រាប់ស្ត្រី​ និងយុវតី​ទាំង​អស់​គ្នា​ នឹង​បង្កើន​នូវ​សកម្មភាពរបស់យើង​ដើម្បីទាក់ទាញស្ត្រី​ឱ្យ​ចូលរួម​កាន់តែច្រើន​ក្នុងវិស័យមូលប​ត្រ ដូច​ជា​ការ​​បើក​គណនី​ជួញដូរ ហើយជួញដូរ​របស់ស្ត្រីក្នុងវិស័យមូល​បត្រ​ ក៏អត់មានកា​ររឹតត្បិត​ដែរ រហូតដល់ផ្សារ​មូល​​បត្រ​កម្ពុជា​ដាក់​ចេញនូវយន្តការ​ពីចម្ងាយ​ដើម្បីឱ្យស្ត្រី​អាចធ្វើការ​ជួញដូពីចម្ងាយ​បាន ទោះបីជា​ពួកគាត់​រវល់​​»។

លោកស្រី ម៉ារ អមរា ប្រធាន​នាយ​ក​ប្រតិបត្តិ​ស្ដីទី​ ធនាគារ​ អេស៊ី​លីដា ភិអិល​ស៊ី បានមានប្រសាសន៍ថា ក្នុង​នាម​ជា​ធនាគារ​ពាណិជ្ជនាំមុខ​ក្នុង​វិស័យ​ ធនាគារ អេស៊ីលីដា ចូលរួមក្នុងការ​ប្រកួ​តប្រជែង​លក្ខណៈ ចម្រុះ​ និង​បរិយាបន្ន​ដោយ​ធានា​ថា​ សំឡេង​របស់ស្ត្រី​ត្រូវ​បានឮ និងឱ្យ​តម្លៃដល់កម្មករ និយោជិ​ត​គ្រប់ជាន់​ថ្នាក់​ ។ ដូចនេះ ត្រូវរួមគ្នា​បន្ត​លើក​កម្ពស់​សមភាព​យេន​ឌ័រ និង​បង្កើន​ភាពអង់អាច​ដល់​ស្ត្រី និងយុវតីគ្រប់​រូប ហើយធានា​នូវផល​ប្រយោជន៍​សម្រាប់​កម្ពុជា និ​ងសេដ្ឋកិច្ច​ឱ្យ​បានកាន់តែទូលំទូលាយ ។

លោកស្រី​បន្តថា ៖

«នៅដំណាច់ខែកុម្ភៈ ឆ្នាំ២០២៥ ធនាគារ អេស៊ីលីដា មានចំនួនបុគ្គលិកសរុបទាំងអស់ចំនួន  ១១.៩២៤ នាក់ ក្នុងនោះស្រ្តី មានចំនួន ៤.៦៩១ នាក់ ស្មើនឹង ៣៩,៣៤ភាគរយ​ ហើយមានស្ត្រី ៤រូប និងបុរស ៤រូប ជា​គណៈ​​​គ្រប់គ្រងជាន់ខ្ពស់ ដែលមានលោកបណ្ឌិត អ៊ិន ចាន់នី ជាអ្នកដឹកនាំផ្ទាល់ ព្រមទាំ​ង​មាន​ចំ​នួន​បុគ្គ​លិ​ក​ដែលស្ថិតក្នុងលំដាប់គណៈគ្រប់គ្រងសរុបទាំងអស់ចំនួន ២.១៣០ នាក់ ក្នុងនោះស្រ្តី​មា​ន​ចំនួ​​ន ៦៩៦ នាក់ ស្មើ​នឹង ៣២,៦៨ភាគរយ»។

លោកជំទាវ កែវ ចរិយា​ រដ្ឋ​លេខាធិការ​ក្រសួង​សេដ្ឋកិច្ច និងហិរញ្ញវត្ថុ និង​ជា​ប្រធានក្រុម​ការងារ​យេនឌ័រ នៃក្រសួង​សេដ្ឋកិច្ច​​ និងហិរញ្ញវត្ថុ បានមានប្រសាសន៍ថា រាជរដ្ឋាភិបា​ល​កម្ពុជា​​ក្នុងអាណត្តិទី៧​នេះ​បានចាត់ទុក​ស្ត្រី គឺជាឆ្អឹង​ខ្នង​នៃសេដ្ឋកិច្ចជាតិ និង​បាន​ជំរុញ​ លើកទឹកចិត្ត​​ដល់​ស្ត្រី​ក្នុងការ​ចូលរួម​ក្នុងវិស័យ​ផ្សេងៗ​ដើម្បី​អាច​ឱ្យស្ត្រី​ចូលរួមក្នុងការ​អភិវឌ្ឍ​សេដ្ឋកិច្ច​ជាតិ ៕