ភ្នំពេញ ៖ ក្រសួងពាណិជ្ជកម្មកម្ពុជាបានឱ្យដឹងថា ជាលទ្ធផលនៃកិច្ចជំនួបទ្វេភាគីរវាងកម្ពុជា និងឥណ្ឌូនស៊ី ខណៈដែលភាគីឥណ្ឌូណេស៊ីបានឯកភាពទិញអង្ករពីកម្ពុជាក្នុងបរិមាណ ១២៥ ០០០តោន។ វត្តមានអង្កររបស់កម្ពុជានៅលើទីផ្សារ​​​​ឥណ្ឌូនេស៊ីនឹងក្លាយជាសក្ខីភាពថ្មីមួយទៀត ក្នុងការបញ្ជាក់អំពី​កិច្ចសហប្រតិបត្តិការរវាងប្រទេសទាំងពីរនៅក្នុងវិស័យពាណិជ្ជកម្ម ខណៈកម្ពុជាមានអង្ករដែល​មានគុណភាពល្អ ជាពិសេស​មានការទទួលស្គាល់ និងនាំចូលដោយប្រទេសជាសមាជិក​អាស៊ាន​ចំនួន៨ ក្នុងចំណោមសមាជិកទាំង១០ប្រទេស។

​ក្រសួងពាណិជ្ជកម្មកម្ពុជា បានឱ្យដឹងថា កម្ពុជា និងឥណ្ឌូនេស៊ី បានឯកភាពគ្នាដូចតទៅ ៖​ ទី១ ភាគីឥណ្ឌូនេស៊ី បានឯកភាពទិញអង្ករពីកម្ពុជាក្នុងបរិមាណ ១២៥ ០០០តោន ក្នុងនោះអង្ករ-​ស បរិមាណ ១០០ ០០០តោន ដោយប្រើប្រាស់យន្តការក្រុមហ៊ុន Bulog និងក្រុមហ៊ុន ហ្រ្គីនត្រេដ និងបរិមាណ ២៥ ០០០តោន ទៀត ជាប្រភេទអង្ករប្រណិត ដោយអនុវត្តរវាងក្រុមហ៊ុន ID Food និងសមាជិកសហព័ន្ធស្រូវអង្ករកម្ពុជា CRF។ ចំពោះតម្លៃ និងលក្ខខណ្ឌផ្សេងទៀតភាគីទាំងពីរ និងបន្តពិភាក្សាគ្នាក្នុងពេលឆាប់ៗខាងមុខនេះ។

ចំណុចទី២គឺ ភាគីទាំងពីរបានឯកភាពគ្នាឱ្យមានការរៀបចំឡើងវិញនូវអនុស្សរណនៃការយោគយល់​ស្តីពីការធ្វើពាណិជ្ជកម្មអង្ករ រវាងក្រសួងពាណិជ្ជកម្មកម្ពុជា និងក្រសួងពាណិជ្ជកម្មឥណ្ឌូណេស៊ី ក្នុងបរិមាណអង្កររហូតដល់ ២៥០ ០០០តោនក្នុងរយៈពេលមួយឆ្នាំសម្រាប់សុពលភាព ៤ឆ្នាំ។

ចំណុចទី៣ ភាគីទាំងពីរបានឯកភាពបង្កើតនូវយន្តការដើម្បីងាយស្រួលក្នុងការទំនាក់ទំនង និងសម្របសម្រួលក្នុងកិច្ចការពាណិជ្ជកម្មអង្ករផងដែរ។

ជាមួយគ្នានេះ កម្ពុជា និងឥណ្ឌូនេស៊ីបានប្តេជ្ញាចិត្តយ៉ាងមុតមាំដោយផ្អែក និងពង្រឹងនូវទំនាក់​ទំនងទ្វេភាគីរវាងប្រទេសទាំងពីរ ដែលបានចែករំលែកទៅវិញទៅមកនូវប្រវត្តិសាស្រ្ត សាសនា ការផ្សាភ្ជាប់នយោបាយ រវាងប្រទេសទាំងពីរ។

ក្នុងន័យនេះជាមិត្តភាព និងការយោគយល់គ្នាទៅវិញទៅមក ភាគីកម្ពុជាបានពិភាក្សាជាមួយភាគី​ឥណ្ឌូណេស៊ី នូវលទ្ធភាពការនាំចេញអង្ករ ទៅប្រទេសឥណ្ឌូណេស៊ី តាមរយៈការចុះអនុស្ស​រណៈ​យោគយល់គ្នាស្តីពីពាណិជ្ជកម្មអង្កររវាងប្រទេសទាំងពីរ។

​ក្នុងជំនួបនាឱកាសនោះ ភាគីកម្ពុជាបានស្នើឱ្យភាគីមិត្តឥណ្ឌូណេស៊ីមានកិច្ចសហប្រតិបត្តិការ​ដែលបានផ្តួចផ្តើមដូចជា៖ ជំរុញការបញ្ជាទិញអង្ករពីកម្ពុជាទៅឥណ្ឌូនេស៊ី តាមរយៈយន្តការ នៃការធ្វើពាណិជ្ជកម្មអង្ករ ក្រោមរូបភាពរដ្ឋាភិបាលនិងរដ្ឋាភិបាល (G2G), ឯកជននិងឯកជន (B2B)។

ក្រៅពីនោះកម្ពុជាក៏បានលើកទឹកចិត្តអ្នកវិនិយោគឥណ្ឌូនេស៊ីមកវិនិយោគទុននៅកម្ពុជាក្នុងផលិតកម្មស្រូវ ដោយទាក់ទាញ​វិនិយោគ និងបង្កើតម៉ាស៊ីនកិនកែច្នៃអង្ករស្របតាមស្តង់ដារសម្រាប់​នាំ​ចេញទៅ​កាន់ប្រទេស​ឥណ្ឌូ​នេស៊ី និងទីផ្សារអន្តរជាតិ ព្រមទាំងលើកទឹកចិត្តឱ្យមានកិច្ចប្រជុំរវាងធុរកិច្ច ប្រទេស​ទាំងពីរ​ដើម្បីសម្រេចការនាំចេញអង្ករនិងផលិតផល​កសិកម្មផ្សេងទៀតទៅកាន់ឥណ្ឌូនេស៊ី។

ជាការឆ្លើយតបភាគីឥណ្ឌូណេស៊ី បានឯកភាពចំពោះការលើកឡើងរបស់ភាគីកម្ពុជា និងបានជម្រាប​ភាគីកម្ពុជានូវទំនាក់ទំនងទ្វេភាគីដ៏ល្អ ទាំងប្រវត្តិសាស្រ្ត សាសនា វប្បធម៌ ជាពិសេសការធ្វើ​ពាណិជ្ជកម្ម​ទ្វេភាគីដែលមានទំហំកើនឡើងជាបន្តបន្ទាប់គួរឱ្យកត់សម្គាល់ ព្រមទាំងមានបំណង​ធ្វើកិច្ច​សហប្រតិបត្តិការស្តីពីពាណិជ្ជកម្មអង្ករ ដោយចង់នាំអង្ករពីកម្ពុជាទៅ​ឥណ្ឌូណេស៊ីក្នុងគោល​បំណង​រក្សាបាននូវសុវត្ថិភាពស្បៀង និងការប្រើប្រាស់ក្នុងប្រទេសផងដែរ។

យោងតាមរបាយការណ័ក្រសួងកសិកម្ម ក្នុងរយៈពេល៧ខែ ឆ្នាំ២០២៣ ការប៉ាន់ស្មានតម្លៃគិត​ជាទឹកប្រាក់ បានទទួលពីការនាំចេញកសិផល ដែលក្នុងនោះតម្លៃពីការនាំចេញអង្ករមានចំនួន ៣១៣ ៧៤២ ៤២០ដុល្លារអាមេរិក និង​តម្លៃពីការនាំចេញស្រូវមានចំនួន ៥០៤ ៧១៤ ៣៧២ ដុល្លារអាមេរិក។

​ដោយឡែក របាយការណ៍​របស់​សហ​ព័ន្ធ​ស្រូវ​អង្ករ​កម្ពុជា ​បានឱ្យ​ដឹង​ថា​ ​រយៈពេល​ ​៧​ខែ​ ​នៃ​ឆ្នាំ​២​០​២​៣ ក្នុង​អំឡុង​ខែ​មករា​ ​ដល់​​ខែ​មិថុនា​ ​កម្ពុជា​ក៏មាន​ស្រូវ​ជួញ​ដូរ​តាម​ព្រំដែន​ជាមួយ​ប្រទេសជិតខាង​ចំនួន​ ​២​,​២​លាន​តោន​ ​ពោល​គឺ​បង្កើត​ចំណូល​បាន​ប្រមាណ​ ​៥​៧​៨​លាន​ដុល្លារ​។​

សូមបញ្ជាក់ថាអង្ករ​របស់​កម្ពុជា​បាន​ចូល​ទី​ផ្សារ​ថ្មី​ក្នុង​ប្រទេស​ហ្វីលីពីន​ក្នុង​ខែ​មិថុនា​ឆ្នាំនេះ​ ​ដែល​ធ្វើឱ្យអង្ករ​របស់កម្ពុជា​​ត្រូវ​បាន​នាំចេញ​ទៅកាន់​ប្រទេស​អា​ស៊ាន​ ​រួម​មាន​ម៉ាឡេស៊ី​ ប្រ៊ុ​យ​ណេ ​និង​ហ្វីលីពីន​ ​ហើយក៏នាំផលិត​ផល​ស្រូវ​ទៅ​ប្រទេស​ថៃ​ ​និង​វៀតណាម​ផង​ដែរ​៕