ភ្នំពេញ ៖ ការប្រើប្រាស់ “កម្ចី” (ឥណទាន គឺជាភាសាផ្លូវការ) គឺតែងតែងភ្ជាប់មកជាមួយនឹងការប្រាក់ដែលអ្នកខ្ចីមានកាតព្វកិច្ចសងទៅកាន់អ្នកឱ្យខ្ចី។ ឧទាហរណ៍ រវាងអតិថិជនប្រើប្រាស់កម្ចី និងគ្រឹះស្ថានធនាគារ និងហិរញ្ញវត្ថុ។ ក្នុងករណីមានបំណងចង់ប្រើប្រាស់កម្ចី​ ម្នាក់ៗត្រូវតែគិតគូរឱ្យបានច្បាស់លាស់ ដើម្បីធ្វើយ៉ាងណាឱ្យការប្រើប្រាស់កម្ចីមានប្រសិទ្ធភាព និងចំគោលដៅ។ មួយវិញ្ញទៀត បើនិយាយពីកម្ចី គឺដូចនិយាយអំពីការប្រើប្រាស់លុយអ៊ីចឹងដែរ។ ដូច្នេះបើអ្នកប្រើលុយបានត្រឹមត្រូវ បើទោះជាលុយមានការប្រាក់ ក៏អ្នកនៅតែអាចចំណេញ តែបើសិនជាអ្នកប្រើមិនបានត្រឹមត្រូវ អ្នកប្រាកដជាជួបហានិភ័យជាមិនខាន។

ជាដំបូង ដើម្បីអាចប្រើលុយឱ្យចំណេញ ចៀសវាងជួបបញ្ហាផ្សេងៗ អ្នកត្រូវតែបង្កើតផែនការ និងគម្រោងចាយវាយរបស់អ្នក។ អ្នកត្រូវធ្វើផែនការស្នូល វាស់វែងពីកម្រិតនៃការចំណាយប្រចាំខែ បើអ្នកជាអ្នកស៊ី អ្នកត្រូវគិតពីការចំណាយដូចជា៖ ទឹក ភ្លើង អគារ ឬ ទីតាំងជួល ថ្លៃបុគ្គលិក ថ្លៃដើមទំនិញ ព្រមទាំងសម្ភារៈនានាដែលចាំបាច់។

បើសិនអ្នកជាអ្នកធ្វើការ ឬសម្រាប់អ្នកទើបមានគ្រួសារថ្មីថ្មោង អ្នកក៏ត្រូវគិតគូរពីការចាយវាយប្រចាំខែដែលចាំបាច់ គិតពីចំណូល និងការសន្សំផងដែរ។ ម្យ៉ាងវិញទៀត ដើម្បីអាចសម្រេចនូវគោលបំណងអនាគត អ្នកត្រូវតែចៀសឱ្យបានរាល់ការទិញសម្ភារៈនិយម ការចាយហ៊ឺហារមិនចំគោលដៅ ការដកលុយសិន សិមដាក់បញ្ចូលវិញ ទាំងនោះសុទ្ធតែបង្ករជាហានិភ័យ ប៉ះពាល់ដល់លំហូរសាច់ប្រាក់ប្រចាំខែរបស់អ្នក។

ការប្រើលុយ ឬ ហៅបានថា របៀបក្នុងការចាត់ចែង និងប្រើប្រាស់កម្ចី ដើម្បីឱ្យចំណេញ និងកាត់បន្ថយហានិភ័យ គឺមានគន្លឹះចំនួន៤ សំខាន់ៗដូចជា៖

១.ប្រើលុយឱ្យចំគោលដៅ និងអនុវត្តតាមគោលដៅ ៖ ឧទាហេណ៍ បើអ្នកខ្ចីលុយដើម្បីបើកអាជីវកម្ម អ្នកត្រូវតែប្រើលុយនោះទៅក្នុងអាជីវកម្មប៉ុណ្នោះ ហើយអ្នកគួរចៀសវាងការវិនិយោគណាដែលនាំឱ្យមានការគំាងលុយ ឬកកទុកចោលយូរពេក។

២. ប្រសិនបើអ្នកខ្ចីលុយមករកស៊ី អ្នកត្រូវតែមានគម្រោងអាជីវកម្ម គិតថ្លៃដើម ថ្លៃចំណាយ ហើយកុំភ្លេចបូកបញ្ចូលថ្លៃការប្រាក់ ដែលអ្នកខ្ចី ដើម្បីឱ្យដឹងខាត ឬចំណេញ ឬមួយទៀតដែលសំខាន់គឺការខ្ចីលុយ ឬបង់រំលស់របស់របរ អ្នកត្រូវសួរខ្លួនឯងសិនថា របស់នោះពិតជាមានភាពចាំបាច់ និងអាចផ្តល់ប្រយោជន៍សម្រាប់អ្នកដែរឬទេ?

៣. ពិនិត្យលទ្ធភាពក្នុងការបង់សង ៖ ចំណុចនេះគឺសំខាន់បំផុត លោកអ្នកត្រូវតែគិតឱ្យបានច្រើនដងពីលទ្ធភាពរបស់អ្នក ថាតើអ្នកអាចបង់សងត្រឡប់បានឬទេ? ហើយក្នុងអំឡុងពេលបង់សងនោះ អាចនឹងមានការចំណាយផ្សេងៗទៀតអ្វីខ្លះ ដែលនាំឱ្យប៉ះពាល់ដល់លុយដែលត្រូវបង់សងត្រឡប់។

៤. ជ្រើសរើសធនាគារដែលមានការប្រាក់ល្អ និងត្រូវតាមគោលបំណងខ្ចី ៖ ទាក់ទងនឹងចំណុចនេះ គឺសំដៅដល់ប្រភពដែលអ្នកចង់ខ្ចីលុយយកមកប្រើប្រាស់។ អ្នកត្រូវសំឡឹងមើលប្រភពណា ដែលមានការប្រាក់ល្អ ស្របតាមបំណងដែលអ្នកចង់ខ្ចី។ មួយវិញទៀត អ្នកត្រូវសិក្សាឱ្យបានច្បាស់ពីធនាគារ លក្ខខណ្ឌសង ទុកចិត្តបាន កាន់តែពិសេស អ្នកត្រូវតែប្រើឱ្យចំគោលដៅ ទើបគ្មានហានិភ័យ។ ចៀសវាងការយកលុយមកវិនិយោគ ឬទិញរបស់ដែលនាំឱ្យគាំងលុយជាដើម៕