បរទេស ៖ យោងតាមប្រភពពី Visual Capitalist បានលើកឡើងថា ការច្នៃប្រឌិតគឺជាកម្លាំងចលករដ៏សំខាន់សម្រាប់ជំរុញប្រទេសមួយឱ្យកាន់តែរីកចម្រើន។ ផ្នែកលើសសរស្តម្ភនៃការច្នៃប្រឌិតសំខាន់ៗចំនួន៧ រួមមាន ចំណេះដឹង និងលទ្ធផលបច្ចេកវិទ្យា, ធនធានមនុស្ស និងការស្រាវជ្រាវ, ភាពទំនើបនៃអាជីវកម្ម, ភាពទំនើបនៃទីផ្សារ, លទ្ធផលច្នៃប្រឌិត,ហេដ្ឋារចនាសម្ព័ន្ធ, និងស្ថាប័ន។ ខាងក្រោមនេះគឺជាប្រទេសចំនួន ១០ ដែលត្រូវបានអ្នកជំនាញផ្នែកសេដ្ឋកិច្ចកត់ត្រាថាជាប្រទេសដែលមានគំនិតច្នៃប្រឌិតខ្ពស់ជាងគេនៅលើពិភពលោក៖

១. ស្វីស៖ ៦៧,៥ ពិន្ទុ ៖ ស្វីស គឺជាប្រទេសដែលមានភាពច្នៃប្រឌិតបំផុតនៅលើពិភពលោកប្រចាំឆ្នាំ ២០២៤ ជាមួយនឹងពិន្ទុ ៦៧,៥។ ក្នុងចំណោមអ្នកប្រកួតប្រជែងផ្សេងទៀត ស្វីស មានភាពលេចធ្លោជាងគេខាងវិស័យស្រាវជ្រាវ និងការបង្កើតថ្មី។ យោងតាមទំព័រផ្លូវការរបស់រដ្ឋលេខាធិការដ្ឋានអប់រំ ស្រាវជ្រាវ និងនវានុវត្តន៍របស់ស្វីសបានឱ្យដឹងថា ប្រទេសនេះកំពុងបន្តចំណាយថវិកាយ៉ាងច្រើនទៅលើការងារសកម្មរបស់អ្នកស្រាវជ្រាវ គោលការណ៍នៃការប្រកួតប្រជែង និងកិច្ចសហប្រតិបត្តិការអន្តរជាតិ។

២. ស៊ុយអែត៖ ៦៤,៥ ពិន្ទុ ៖ នៅពីក្រោយស្វីសតែតិចប៉ុណ្ណោះ ស៊ុយអែត ទទួលបាន ៦៤,៥ ពិន្ទុក្នុងនាមជាប្រទេសមានការច្នៃប្រឌិតកំពូលទី២ របស់ពីភពលោក។ ស៊ុយអែត មានភាពលេចធ្លោខាងវិស័យបច្ចេកវិទ្យាបៃតង និងវិស័យអប់រំ។ ការប្រកួតប្រជែងរបស់វាត្រូវបានឆ្លុះបញ្ចាំងយ៉ាងទូលំទូលាយនៅក្នុងច្បាប់ស្តីពីការចូលរៀនជាកំហិតដែលត្រូវបានអនុម័តក្នុងឆ្នាំ១៨៤២ ។  ប្រទេសស៊ុយអែតបានវិនិយោគច្រើនជាង ៣ ភាគរយនៃ GDP សរុបរបស់ខ្លួនក្នុងការស្រាវជ្រាវ និងការអភិវឌ្ឍន៍ ដើម្បីលើកកម្ពស់បន្ថែមទៀតនូវវិស័យវិទ្យាសាស្ត្រជីវិត។

៣. សហរដ្ឋអាមេរិក៖ ៦២,៤ ពិន្ទុ ៖ អស់រយៈពេល  ៦ឆ្នាំជាប់ៗគ្នា សហរដ្ឋអាមេរិកមិនដែលធ្លាក់ពីតំណែងកំពូលទាំង៣ នៃបញ្ជីប្រទេសដែលមានគំនិតច្នៃប្រឌិតបំផុតនោះទេ។ ក្រុមហ៊ុនបច្ចេកវិទ្យាកំពូលៗរបស់ប្រទេសដូចជា Google, Apple, Microsoft, និង Facebook ដើរតួយ៉ាងសំខាន់នៅក្នុងបច្ចេកវិទ្យាពិភពលោក។ លើសពីនេះ សហរដ្ឋអាមេរិករីកចម្រើនខាងទូរគមនាគមន៍ បច្ចេកវិទ្យាអវកាស និងឱសថផងដែរ។ នៅឆ្នាំ២០២៣ សហរដ្ឋអាមេរិកមានយោធាទំនើបបំផុតមួយក្នុងពិភពលោក។

៤.សិង្ហបុរី៖ ៦១,២ ពិន្ទុ ៖ សិង្ហបុរី គឺជាប្រទេសអាស៊ីអាគ្នេយ៍តែមួយគត់ដែលជាប់ចំណាត់ថ្នាក់លេខ ៤ ជាប្រទេសមានភាពច្នៃប្រឌិតមួយរបស់ពិភពលោក ជាមួយនឹងពិន្ទុ ៦១,២។ ក្នុងរយៈពេល៧ឆ្នាំមកនេះ សិង្ហបុរីបានជាប់ចំណាត់ថ្នាក់ទី១ ជាប្រទេសឈានមុខគេរបស់អាស៊ីនៅលើសន្ទស្សន៍នវានុវត្តន៍សកល។ តាមរយៈយុទ្ធសាស្រ្តស្រាវជ្រាវ ការច្នៃប្រឌិត និងសហគ្រាស (RIE) រដ្ឋាភិបាលមានគម្រោងវិនិយោគ ២៥ ពាន់លានដុល្លារ ដើម្បីបង្កើតសេដ្ឋកិច្ច និងសង្គមដែលពោរពេញដោយចំណេះដឹង និងការច្នៃប្រឌិត។

៥. ចក្រភពអង់គ្លេស៖ ៦១ ពិន្ទុ ៖ ទស្សនាវដ្ដី Forbes បាន​ដាក់​ឈ្មោះ ​ថា​ជា​កន្លែងដែល​មានបរិយាកាសងាយស្រួល​សម្រាប់​អាជីវកម្ម​បំផុត​នៃ​សេដ្ឋកិច្ច​ធំៗ​របស់​អឺរ៉ុប។ គិតត្រឹមឆ្នាំ២០១៧ មានអាជីវកម្មប្រហែល ៥៩០ ០០០ បានបើកដំណើរការនៅក្នុងចក្រភពអង់គ្លេស។ ចក្រភព​អង់គ្លេសមានមហិច្ឆតាក្នុងវិស័យច្នៃប្រឌិត និងការស្រាវជ្រាវ ជាមួយនឹងការលើកទឹកចិត្តតាមរយៈសាកលវិទ្យាល័យលំដាប់ពិភពលោករបស់ខ្លួនរួមមាន Oxford, Cambridge, University College London និង Imperial College London ។

៦.កូរ៉េខាងត្បូង៖ ៦០,៩ ពិន្ទុ ៖ កូរ៉េខាងត្បូង ជាប់ចំណាត់ថ្នាក់លេខ៦ក្នុងបញ្ជី ជាមួយនឹង ៦០,៩ ពិន្ទុ ដោយសារកត្តាសំខាន់ៗមួយចំនួន។ ផ្អែកលើការពិនិត្យរបស់ OECD លើគោលនយោបាយនវានុវត្តន៍តាមប្រទេសបានឲ្យដឹងដា កូរ៉េខាងត្បូងបានបញ្ចេញមូលនិធិដ៏ធំបំផុតមួយសម្រាប់វិស័យធនធានមនុស្ស និងការស្រាវជ្រាវ។ ក្នុងចំណោមប្រទេស OECD កូរ៉េខាងត្បូងមានអត្រាខ្ពស់បំផុតនៃនិស្សិតបញ្ចប់ថ្នាក់ឧត្តមសិក្សា ដោយភាគច្រើនពាក់ព័ន្ធនឹងមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM)។ ទន្ទឹមនឹងនេះ ក្មេងៗជំនាន់ក្រោយរបស់ប្រទេសភាគច្រើនកំពុងសិក្សាពីបច្ចេកវិទ្យាឌីជីថល និង ICT ។

៧. ហ្វាំងឡង់៖ ៥៩,៤ ពិន្ទុ ៖ ហ្វាំងឡង់ មានភាពរីកចម្រើននៅក្នុងវិស័យជាច្រើនចាប់តាំងពីសេវាថែទាំសុខភាពរហូតដល់ប្រព័ន្ធអប់រំគួរឱ្យចាប់អារម្មណ៍ និងប្រព័ន្ធអេកូឡូស៊ី នវានុវត្តន៍ដែលទំនើប។ ហ្វាំងឡង់ រីកចម្រើនខាងការច្នៃប្រឌិតចាប់តាំងពីទសវត្សរ៍ឆ្នាំ១៩៧០ នៅពេលដែលប្រទេសនេះបានបង្កើតឧបករណ៍វាស់ចង្វាក់បេះដូង។ លើសពីនេះ ហ្វាំងឡង់ក៏ជាប្រទេសដំបូងគេដែលគាំទ្របណ្តាញ 5G ផងដែរ។

៨. ហូឡង់៖ ៥៨,៨ ពិន្ទុ ៖ ហូឡង់ គឺជាប្រទេសមួយក្នុងចំណោមប្រទេសដែលមានភាពច្នៃប្រឌិតបំផុតរបស់ពិភពលោក ដែលរីកចម្រើនខាងវិស័យកំពូលៗជាច្រើន។ រដ្ឋាភិបាលហូឡង់បានលើកទឹកចិត្តឱ្យមានការបង្កើតថ្មីនៅក្នុងវិស័យទាំងនោះដោយរៀបចំការប្រកួតប្រជែងរូបតំណាងជាតិ ការតាំងពិព័រណ៍ច្នៃប្រឌិត និងកម្មវិធីវិទ្យាសាស្ត្រជាតិជាដើម។

៩.អាល្លឺម៉ង់៖ ៥៨,‌១ ពិន្ទុ ៖ ការច្នៃប្រឌិតរបស់អាល្លឺម៉ង់ត្រូវបានមើលឃើញតាមរយៈវិស័យយានជំនិះ ដោយប្រទេសនេះមានក្រុមហ៊ុនផលិត និងក្រុមហ៊ុនផ្គត់ផ្គង់រថយន្តឈានមុខគេ ដូចជា BMW, Daimler, Volkswagen, Audi Bosch, Schaeffler, និង ZF Friedrichshafen។  

១០. ដាណឺម៉ាក៖ ៥៧,១ ពិន្ទុ ៖ ដាណឺម៉ាក មានចំនួនប៉ាតង់ច្រើនជាងគេមួយក្នុងវិស័យជាច្រើនដូចជា ជីវវេជ្ជសាស្ត្រ ឱសថ អាហារ និងកសិកម្ម។ ក្រុមហ៊ុនឱសថដាណឺម៉ាក Novo Nordisk ផ្គត់ផ្គង់សារធាតុអ័រម៉ូនអាំងស៊ុយលីនស្ទើរពាក់កណ្តាលនៃចំនួនសរុបរបស់ពិភពលោកសម្រាប់អ្នកជំងឺទឹកនោមផ្អែម៕