សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្វាយរៀង ៖ អគ្គនាយកដ្ឋានរៀបចំដែនដី នគរូបនីយកម្ម និងសំណង់ និងរដ្ឋបាលខេត្តស្វាយរៀង បានបើកកិច្ចប្រជុំពិគ្រោះយោបល់ ដើម្បីពិភាក្សាពីការបញ្ចប់ការលើរៀបចំសេចក្ដីព្រាងប្លង់គោលប្រើប្រាស់ដី និងផែនការប្រើប្រាស់ដីក្រុងបាវិត នៃខេត្តស្វាយរៀង ស្របនឹងតំបន់នេះកំពុងមានសន្ទុះនៃការអភិវឌ្ឍខ្លាំង ។
កិច្ចប្រជុំនេះត្រូវបានធ្វើឡើងនៅព្រឹកថ្ងៃទី១៨ ខែកុម្ភៈ ឆ្នាំ២០២៥ ដោយមានការចូលរួមពីឯកឧត្តម បេង ហុង សុជាតិខេមរ៉ូ អគ្គនាយកនៃអគ្គនាយកដ្ឋានរៀបចំដែនដី និងនគរូបនីយកម្ម នៃក្រសួងរៀបចំដែនដី នគរូបនីយកម្ម និងសំណង់ និងជាអគ្គលេខាធិការនៃអគ្គលេខាធិការដ្ឋាន គ.ដ.ន.ជ និងឯកឧត្តម ប៉េង ពោធិ៍សា អភិបាលខេត្តស្វាយរៀង។
ឯកឧត្តម ប៉េង ពោធិ៍សា អភិបាលខេត្តស្វាយរៀង បានថ្លែងការកោតសរសើរ និងអរគុណចំពោះមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ដែលបានសហការ និងសម្របសម្រួលក្នុងការរៀបចំកិច្ចប្រជុំដ៏មានសារៈសំខាន់នេះឡើង ដើម្បីបញ្ចប់លើការរៀបចំ និងសម្រេចចុងក្រោយក្នុងក្របខ័ណ្ឌបច្ចេកទេសមុននឹងដាក់ជូនក្រុមប្រឹក្សាខេត្តពិនិត្យ និងអនុម័ត រួចបញ្ជូនទៅគណៈកម្មាធិការរៀបចំដែនដី និងនគរូបនីយកម្មថ្នាក់ជាតិដើម្បីស្នើសុំរាជរដ្ឋាភិបាលសម្រេចដាក់ឱ្យប្រើប្រាស់ជាផ្លូវការដោយអនុក្រឹត្យតាមនីតិវិធីកំណត់ ។
ឯកឧត្តមបានបន្តថា ក្នុងនាមជាប្រធានគណៈកម្មាធិការរៀបចំដែនដី និងនគរូបនីយកម្មខេត្តស្វាយរៀង សូមថ្លែងនូវការអរគុណយ៉ាងជ្រាលជ្រៅចំពោះក្រសួងរៀបចំដែនដី នគរូបនីយកម្ម និងសំណង់ ក៏ដូចជាធនាគារអភិវឌ្ឍន៍អាស៊ី ដែលកន្លងមកនេះបានដឹកនាំសម្របសម្រួល និងគាំទ្រ ជាពិសេសលើផ្នែកបច្ចេកទេសតាមរយៈការចុះពិនិត្យផ្ទាល់ ក៏ដូចជាការរៀបចំសិក្ខាសាលាពិគ្រោះយោបល់ជាបន្តបន្ទាប់ដោយមានការចូលរួមពីគ្រប់ភាគីពាក់ព័ន្ធរហូតនាំឱ្យសម្រេចបាននូវឯកសារសេចក្ដីព្រាង ដែលមានភាពលម្អិត និងគ្រប់ជ្រុងជ្រោយក្នុងការប្រជុំពិគ្រោះយោបល់ ដើម្បីបញ្ចប់លើការរៀបចំ”សេចក្តីព្រាងប្លង់គោលប្រើប្រាស់ដី និងផែនការប្រើប្រាស់ដីក្រុងបាវិត” នៅថ្ងៃនេះ។
ឯកឧត្ដមបន្ថែមថា បើគិតមកដល់ពេលនេះ ក្នុងខេត្តស្វាយរៀងទាំងមូល មានតំបន់សេដ្ឋកិច្ចពិសេសកំពុងដំណើរការចំនួន ៩កន្លែង និងកំពុងរៀបចំ ៣កន្លែងថែមទៀត រួមមានរោងចក្រ សហគ្រាស សរុបទាំងក្នុង និងក្រៅតំបន់សេដ្ឋកិច្ចពិសេស ៣០៧កន្លែង ហើយបើពិនិត្យមើលពីសក្ដានុពល និងគម្រោងថ្មីៗរបស់រាជរដ្ឋាភិបាលគឺគម្រោងផ្លូវល្បឿនលឿនភ្នំពេញបាវិត និងគម្រោងផ្លូវដែក ជាដើម។ ដូច្នេះ ផែនការរៀបចំដែនដីក្រុងបាវិតគឺពិតជាមានសារៈសំខាន់ណាស់ ដែលមិនត្រឹមតែឆ្លើយតបទៅនឹងតម្រូវការរបស់ប្រជាពលរដ្ឋ និងការអភិវឌ្ឍនៅក្នុងយុគសម័យនៃភាវូបនីយកម្មថ្នាក់តំបន់ និងសកលភាវូបនីយកម្មប៉ុណ្ណោះទេ ប៉ុន្តែវាផ្តល់ឱ្យនូវទិសដៅជាយុទ្ធសាស្ត្រ ដើម្បីកំណត់ទម្រង់នៃការអភិវឌ្ឍដោយធានាបាននូវការផ្ដល់សេវាធារណៈដែលមានលក្ខណៈឆ្លើយតបការអភិវឌ្ឍវិស័យកសិកម្មប្រកបដោយចីរភាព ក៏ដូចជារក្សាបាននូវតុល្យភាពរវាងការគ្រប់គ្រងធនធានធម្មជាតិ បរិស្ថាន និងការអភិវឌ្ឍសេដ្ឋកិច្ច-សង្គមប្រកបដោយនិរន្តរភាព ៕
Account
Security
Favourite Content