សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ អគ្គនាយកដ្ឋានគយ និងរដ្ឋាករកម្ពុជាបានបង្ហាញរបាយការណ៍ឱ្យដឹងថា ក្នុងរយៈពេល២ខែដំបូងនៃឆ្នាំ២០២៥ ទំហំពាណិជ្ជកម្មអន្តរជាតិរបស់កម្ពុជាសម្រេចបានប្រមាណ ៩.៤៤ ពាន់លានដុល្លារអាមេរិកបានកើនឡើង ១៦.៣ ភាគរយ បើធៀបនឹងរយៈពេលដូចគ្នាកាលពីឆ្នាំ២០២៤។
របាយការណ៍បានបង្ហាញថា ក្នុងរយៈពេល២ខែដើមឆ្នាំ ចាប់ពីខែមករាដល់ខែកុម្ភៈ កម្ពុជាបាននាំចេញទំនិញទៅបរទេសក្នុងតម្លៃ ៤ ៤៦០លានដុល្លារអាមេរិក កើនឡើង ១១.៩ ខណៈការនាំចូលមកវិញទទួលបាន ចំនួន ៤ ៩៨៧លានដុល្លាររអាមេរិក កើនឡើង ២០.៦ ភាគរយ។
សហរដ្ឋអាមេរិក និងវៀតណាម គឺជាទីផ្សារធំសម្រាប់ការនាំចេញរបស់កម្ពុជា ដែលទីផ្សារសហរដ្ឋអាមេរិក មានទំហំនាំចេញចំនួន ១,៦២៦ លានដុល្លារអាមេរិក និងទីផ្សារវៀតណាម មានទំហំនាំចេញ ៦៤៨ លានដុល្លារអាមេរិក។ រីឯ ប្រទេសចិន គឺជាអ្នកនាំចូលដ៏ធំបំផុតរបស់កម្ពុជា ជាមួយនឹងទំហំសរុបចំនួន ២,៤៤៤ លានដុល្លារអាមេរិក កើនឡើង២៤ភាគរយពីឆ្នាំមុន។
លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិនៃវិទ្យាស្ថានសេដ្ឋកិច្ចអន្តរជាតិ នៃរាជបណ្ឌិត្យសភាកម្ពុជា បានមានប្រសាសន៍ថា ស្ថានភាពពាណិជ្ជកម្មអន្តរជាតិរបស់កម្ពុជាកើនឡើងគឺបណ្តាលមកពីកត្តាសន្តិភាពជាចម្បង ដែលនាំមកនូវសេចក្តីទុកចិត្តដល់វិនិយោគិន ។
លោកបណ្ឌិត ហុង វណ្ណៈ បានប្រាប់ AMS Economy ថា ៖
«ចំណុចទី១ គឺកត្តាអំណោយផលក្នុងសង្វាក់ផលិតកម្ម និងការមានជំនឿទុកចិត្តលើរាជរដ្ឋាភិបាលនេះហើយ ដែលវិនិយោគិនសម្រេចមកវិនិយោគនៅកម្ពុជា។ ចំណុចទី២ កត្តាដែលនាំឱ្យមានសន្តិភាពនេះហើយ គឺអ្នកវិនិយោគ មានឱកាសចំណេញ ក្នុងការដែលមកវិនិយោគនៅកម្ពុជា។ ឱកាសបានផលចំណេញ គាត់បោះទុនវិនិយោគ ជាបន្តបន្ទាប់ សម្រាប់ធ្វើការនាំចេញ និងធ្វើឱ្យមានកំណើនពាណិជ្ជកម្មដោយការនាំលក់ទៅក្រៅប្រទេស»។
លោកបណ្ឌិត បានបន្ថែមទៀតថា ៖
«ចំណុចទី៣ ការកើនឡើងនៃការវិនិយោគ និងការនាំចេញ គឺស្ថិរភាពនយោបាយ រួមទាំងច្បាប់វិនិយោគថ្មី ដែលលើកទឹកចិត្តខ្លាំងដល់អ្នកវិនិយោគ និងកត្តាដែលកម្ពុជាមានកិច្ចព្រមព្រៀងពាណិជ្ជកម្មសេរី ដូចជា កម្ពុជា-ចិន កម្ពុជា-កូរ៉េ ក៏ដូចជាកិច្ចព្រមព្រៀង RCEP ជាដើម។ ក្រៅពីនេះ កម្ពុជាមានភាពងាយស្រួលក្នុងការវិនិយោគ គឺយើងមានទីផ្សារទូលាយល្អ ទាំងទីផ្សារលក់រាយ ទាំងទីផ្សារគោលដៅនៅក្នុងក្របខ័ណ្ឌ RCEP ក្នុងតំបន់អាស៊ាន និងបណ្តាប្រទេសផ្សេងទៀត»។
ក្រៅពីសំណុចសំខាន់ដូចបានលើកឡើងខាងលើនេះ កម្ពុជានៅមានវិស័យមួយចំនួនទៀតដែលមានកាលានុវត្តន៍ភាពសម្រាប់វិនិយោគិនបរទេស ដូចជា ទេសចរណ៍ កសិកម្ម និងដឹកជញ្ជូន ដែលវិស័យទាំងនេះកម្ពុជាមានសក្តានុពលសម្រាប់ការធ្វើវិនិយោគ។ បន្ថែមពីនេះ កក្តាភូមិសាស្ត្រសេដ្ឋកិច្ចក៏មានភាពអំណោយផលល្អ ស្ថិតនៅចំណុចកណ្តាលនៃអាស៊ានមានទីផ្សារទូលាយ ងាយស្រួលដឹកជញ្ជូនផលិតផល រួមជាមួយនឹងកំពង់ផែទឹកជ្រៅ ផ្ដល់ភាពងាយស្រួលក្នុងការបញ្ចេញទំនិញ ទៅដល់ប្រទេសជាដៃគូ។
សូមជម្រាបថាថា ផលិតផលនាំចេញសំខាន់របស់កម្ពុជា រួមមានសម្លៀកបំពាក់ គ្រឿងចក្រ ឧបករណ៍អគ្គិសនី ផលិតផលស្បែកជើង គ្រាប់ធញ្ញជាតិ គ្រឿងសង្ហារិម កៅស៊ូ ផ្លែឈើ បន្លែ គុជ ប្រដាប់ក្មេងលេង និងវាយនភណ្ឌ។
សូមជ្រាបថា នៅឆ្នាំ២០២៥ ធនាគារជាតិនៃកម្ពុជាបានព្យាករថា កំណើនសេដ្ឋកិច្ចរបស់កម្ពុជាស្ថិតក្នុងអត្រា ៦.២ភាគរយ ដោយសារតែកំណើនដ៏រឹងមាំនៃការនាំចេញផលិតផលកាត់ដេរ និងផលិតផលមិនមែនកាត់ដេរ គួបផ្សំនឹងការរីកចម្រើនជាវិជ្ជមាននៃវិស័យទេសចរណ៍ និងកសិកម្ម៕
Account
Security
Favourite Content