សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្របពេលដែលសេដ្ឋកិច្ចសកល មានភាពមិនប្រាកដប្រជា បានធ្វើឱ្យនិន្នាការនៃការប្រើប្រាស់ឥណទានជាលក្ខណៈបុគ្គលសម្រាប់អាជីវកម្មខ្នាតតូច មានការធ្លាក់ចុះជាបន្តបន្ទាប់ គិតចាប់តាំងពីចុងឆ្នាំ២០២៤រហូតមក។ ជាក់ស្ដែង យោងតាមរបាយការណ៍ដែលចេញដោយក្រុមហ៊ុន ស៊ីប៊ីស៊ី (Credit Bureau Cambodia Co., Ltd) នៅដើមខែសីហា ឆ្នាំ២០២៥ បានបង្ហាញថា ចំនួនគណនីឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច មានការថយចុះប្រមាណជា ១,២% គិតត្រឹមខែមិថុនា ឆ្នាំ២០២៥ ដែលធ្វើឱ្យចំនួនគណនីនៅទូទាំងប្រទេសសរុបមានចំនួនប្រមាណជា ១,៧៩ លានគណនីប៉ុណ្ណោះ។
ចំនួននេះបង្ហាញថា និន្នាការនៃការប្រើប្រាស់ឥណទានលក្ខណៈបុគ្គលលើអាជីវកម្មខ្នាតតូចនេះនៅបន្តធ្លាក់ចុះជាបន្តបន្ទាប់ ខណៈដែលដំណើរការឥណទានលក្ខណៈអាជីវកម្មដូចគ្នាកាលពីត្រីមាសទី៤ ឆ្នាំ ២០២៤ បានធ្លាក់ចុះប្រមាណជា ១,១% ប៉ុណ្ណោះ។
របាយការណ៍ខាងលើដដែលក៏បានបង្ហាញដែរថា ក្នុងចំណោមកម្ចីនានា មាន ៥២,៦% ជាឥណទានមូលធន ខណៈចំនួនតូចជាងគេគឺកម្ចីសំណង់មាន ០,៩% កម្ចីកសិកម្ម ២៩,៦% កម្ចីទិញទ្រព្យសកម្មមាន ៥,៤% និងកម្ចីប្រភេទផ្សេងៗមាន ១១,៥%។
និន្នាការនៃការថយចុះនេះ ត្រូវបានគេមើលឃើញថា ស្ថិតនៅគ្រប់តំបន់នៃព្រះរាជាណាចក្រកម្ពុជា ដូចជា(ធ្លាក់ចុះចំនួន ២,៣% នៅតំបន់ទន្លេសាប និងធ្លាក់ចុះ ១,៤% នៅតំបន់ខ្ពង់រាប ០,២% នៅតំបន់ឆ្នេរ និង ១,០% នៅតំបន់ទំនាប។
យ៉ាងណាក៏ដោយ នៅត្រីមាសទី២ ឆ្នាំ២០២៥ នេះ សមតុល្យឥណទានលក្ខណៈបុគ្គលបានបន្តកើនឡើងជាលំដាប់ក្នុងកម្រិត ០.៨% គិតត្រឹមខែមិថុនា ឆ្នាំ២០២៥ ដូចគ្នា ដែលសរុបជាទឹកប្រាក់កើនរហូតដល់ចំនួន ៣៥,៥៤ ប៊ីលានដុល្លារអាមេរិក។
គួរបញ្ជាក់ថា នៅត្រឹមត្រីមាសទី២ នៃឆ្នាំ២០២៥នេះ ចំនួនអតិថិជនដែលស្នើសុំឥណទានក្នុងទម្រង់៥ផ្សេងៗ គ្នាដូចជា កម្ចីមូលធន (Working Capital Loan) កម្ចីកសិកម្ម (Agriculture Loan) កម្ចីទិញទ្រព្យសកម្ម (Asset Finance) កម្ចីសំណង់ (Construction Loan) និងកម្ចីផ្សេងៗ (Other)។ ពាក្យស្នើសុំឥណទានលក្ខណៈបុគ្គលប្រើប្រាស់សម្រាប់អាជីវកម្មខ្នាតតូច បានថយចុះជារួម -១៥,៧% បើធៀបនឹងត្រីមាសមុន៕
Account
Security
Favourite Content