សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សហព័ន្ធស្រូវអង្ករកម្ពុជា នឹងដឹកនាំប្រតិភូក្រុមហ៊ុននាំចេញអង្ករលំដាប់កំពូលរបស់ប្រទេសចំនួន ១៣ ក្រុមហ៊ុន ចូលរួមក្នុងពិព័រណ៍ម្ហូបអាហារអន្តរជាតិ ANUGA 2025 – International Foods Industry Trade Fair នៅទីក្រុងកូឡូញ ប្រទេសអាល្លឺម៉ង់ នៅដើមខែតុលា ខាងមុខនេះ ខណៈដែលពិព័រណ៍ម្ហូបអាហារអន្តរជាតិ គឺជាព្រឹត្តិការណ៍ដ៏ធំបំផុតរបស់ពិភពលោក ដែលនឹងប្រព្រឹត្តទៅចាប់ពីថ្ងៃទី ០៤ ដល់ថ្ងៃទី ០៨ ខែតុលា ឆ្នាំ ២០២៥។
សហព័ន្ធស្រូវអង្ករកម្ពុជា បាននិយាយកាលពីថ្ងៃព្រហស្បតិ៍ សប្ដាហ៍នេះថា ការចូលរួមពិព័រណ៍ ANUGA 2025 គឺដើម្បី ធ្វើពិពិធកម្មទីផ្សារ ដែលជាគោលនយោបាយច្បាស់លាស់របស់រាជរដ្ឋាភិបាលក្នុងការជំរុញផលិតផល និងការដាំដុះតាមតម្រូវការទីផ្សារ។ ក្រុមហ៊ុននាំចេញអង្កររបស់កម្ពុជាទាំង ១៣ នឹងដាក់តាំងបង្ហាញនូវផលិតផលអង្ករមានគុណភាពខ្ពស់បំផុតរបស់ខ្លួន ដែលធ្លាប់បានដណ្តើមពានរង្វាន់ “អង្ករល្អបំផុតរបស់ពិភពលោក” ទៅកាន់ទស្សនិកជន អ្នកជំនាញ និងអ្នកធ្វើសេចក្តីសម្រេចចិត្តក្នុងវិស័យចំណីអាហារទូទាំងសកលលោក។
លោកឧកញ៉ា សុង សារ៉ន អគ្គនាយកក្រុមហ៊ុន អេមរុ រ៉ាយស៍ បានទូរទស្សន៍អប្សារាថា ការចូលរួមក្នុងពិព័រណ៍ធំប្រចាំឆ្នាំនៅសហគមន៍អឺរ៉ុបលើកនេះ នឹងអនុញ្ញាតឲ្យកម្ពុជាអាចបង្ហាញសក្តានុពលអង្ករ ដល់ដៃគូពាណិជ្ជកម្ម និងអតិថិជនថ្មីៗក្នុងតំបន់អឺរ៉ុប។ អង្ករកម្ពុជាធ្លាប់ដណ្តើមបានពានរង្វាន់ អង្ករល្អបំផុតរបស់ពិភពលោកជាបន្តបន្ទាប់។ កេរ្តិ៍ឈ្មោះដ៏ល្បីនៃអង្ករកម្ពុជានេះ បានជួយសម្រួលដល់ការបញ្ចុះបញ្ចូលទៅកាន់អតិថិជនដែលមិនធ្លាប់ស្គាល់អង្ករកម្ពុជាតាមរយៈការតាំងពិព័រណ៍នេះ។
ប្រទេសអាល្លឺម៉ង់ គឺជាទីផ្សារអង្ករមួយរបស់កម្ពុជាក្នុងចំណោមបណ្តាប្រទេសសមាជិកសហភាពអឺរ៉ុបសរុបចំនួន២៧។ របាយការណ៍ផ្លូវការកាលពីឆ្នាំ ២០២៤ បង្ហាញថា កម្ពុជាបាននាំចេញអង្ករទៅកាន់ប្រទេស អាល្លឺម៉ង់ ចំនួន ១ម៉ឺន ៣ពាន់តោន គិតជាទឹកប្រាក់ប្រមាណជាង ១២.៨ លានដុល្លារអាមេរិក។
បើតាមរបាយការណ៍របស់សហព័ន្ធស្រូវអង្ករកម្ពុជា ក្នុងរយៈពេល៨ខែដើមឆ្នាំ ២០២៥ កម្ពុជានាំចេញអង្ករបានចំនួន ៤៧ម៉ឺនតោន តាមរយៈក្រុមហ៊ុននាំចេញអង្ករចំនួន ៥១ ក្រុមហ៊ុន។ ក្នុងនោះអង្ករកម្ពុជានាំចេញទៅកាន់បណ្តាប្រទេសនៃតំបន់អឺរ៉ុបចំនួន ២៦ ក្នុងបរិមាណអង្ករជាង ២ម៉ឺន២ពាន់តោន គិតជាទឹកប្រាក់ចំនួន ១៧៦លានដុល្លារសហរដ្ឋអាមេរិក។ សម្រាប់ប្រភេទអង្ករដែលបាននាំចេញរួមមានដូចជា អង្ករក្រអូប អង្ករសគ្រាប់វែង អង្ករចំហុយ អង្ករសរីរាង្គ និងអង្ករផ្សេងៗមួយចំនួនទៀត។
បើតាមសហព័ន្ធស្រូវអង្ករ នេះគឺជាការចូលរួមក្នុងពិព័រណ៍អន្តរជាតិរបស់វិស័យអង្ករកម្ពុជាលើកទី ២ ខណៈការចូលរួមលើកទី ១ ធ្វើឡើងកាលពីឆ្នាំ២០២៣កន្លងទៅ។ ដោយឡែក ក្រុមហ៊ុនដែលនឹងចូលរួមក្នុងពិព័រណ៍នេះ រួមមាន ក្រុមហ៊ុន អេមរុ រ៉ាយស៍, ក្រុមហ៊ុន ហ្គោលដេន រ៉ាយស៍, ក្រុមហ៊ុន ឥណ្ឌូឆាយណា រ៉ាយស៍ មីល លីមីធីត, ក្រុមហ៊ុន កំពង់ធំ រ៉ាយស៍ មីល លីមីធីត, ក្រុមហ៊ុន ព្រីម្លិះ និងក្រុមហ៊ុន ខបភើរេសិន ជាដើម៕ ដោយ ៖ ទួន សុផល
Account
Security
Favourite Content