សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ នាដើមខែធ្នូ ឆ្នាំ២០២៥ ក្នុងរយៈពេល១០ថ្ងៃ កម្ពុជា ទទួលបានគម្រោងវិនិយោគថ្មីៗចំនួន៣បន្ថែមទៀត ដែលមានទំហំទឹកប្រាក់សរុបប្រមាណ ១៥,៧លានដុល្លារអាម៉េរិក និងផ្តល់ឱកាសការងារ ជាង៦៦០កន្លែង ដោយគម្រោងវិនិយោគទាំងនោះផ្តោតលើវិស័យបង្កើតរោងចក្រផលិតឧបករណ៍ និងសម្ភារផ្សេងៗ ដែលមានទីតាំងនៅក្នុងខេត្តកំពង់ស្ពឺ, ស្វាយរៀង និងកំពង់ឆ្នាំង។ នេះបើយោងតាមប្រភពក្រុមប្រឹក្សាអភិវឌ្ឍន៍កម្ពុជា (CDC) ។
តាមរយៈក្រុមប្រឹក្សាអភិវឌ្ឍន៍កម្ពុជា (CDC) បានឱ្យដឹងថា៖ ក្រុងបាវិត ខេត្តស្វាយរៀង ទទួលបានគម្រោងវិនិយោគបង្កើតរោងចក្រផលិតតុក្កតាសម្រាប់តាំងលម្អ និងសម្ភារៈបន្ទាប់បន្សំគ្រប់ប្រភេទសម្រាប់តុបតែងលម្អក្នុងកម្មវិធីផ្សេងៗ ស្ថិតក្នុងតំបន់សេដ្ឋកិច្ចពិសេស ហាយ ផាក ក្នុងទំហំទុនវិនិយោគប្រមាណ ៣,៦លានដុល្លារអាម៉េរិក និងអាចបង្កើតការងារបានចំនួន ២២៦កន្លែង។ ចំណែកប្រជាពលរដ្ឋស្រុកឱរ៉ាល់ ខេត្តកំពង់ស្ពឺ ទទួលបានគម្រោងវិនិយោគបង្កើតរោងចក្រផលិតសម្ភារៈសត្វចិញ្ចឹម (ពីប្លាស្ទិក) ក្នុងទំហំទុនវិនិយោគប្រមាណ ៦,១លានដុល្លារអាម៉េរិក និងអាចបង្កើតការងារបានចំនួន ៩៧កន្លែង។ រីឯស្រុកកំពង់ត្រឡាច ខេត្តកំពង់ឆ្នាំង ទទួលបានគម្រោងវិនិយោគបង្កើតរោងចក្រផលិតឧបករណ៍តេស្ត (អគ្គិសនី និងសីតុណ្ហភាព) និងឧបករណ៍រង្វាស់ ក្នុងទំហំទុនវិនិយោគប្រមាណ ៦លានដុល្លារអាម៉េរិក និងអាចបង្កើតការងារបានចំនួន ៣៤០កន្លែង។
គួរជម្រាបថា ក្នុងរយៈពេល១១ខែនៃឆ្នាំ២០២៥នេះ គណៈកម្មាធិការវិនិយោគកម្ពុជាបានសម្រេចុះបញ្ជីគម្រោងវិនិយោគចំនួន ៦០៩គម្រោង ក្នុងទំហំទុនវិនិយោគសរុបប្រមាណ ៩,៥ប៊ីលានដុល្លារអាម៉េរិក ដែលបង្ហាញថាចំនួននៃគម្រោងវិនិយោគមានការកើនឡើង ២២០គម្រោង ស្មើនឹងប្រមាណ ៥៧% ខណៈទុនវិនិយោគមានការកើនឡើងប្រមាណ ៣ ប៊ីលានដុល្លារអាម៉េរិក ស្មើនឹងប្រមាណ ៤៧% បើប្រៀបធៀបនឹងរយៈពេលដូចគ្នាក្នុងឆ្នាំ២០២៤ ដែលគណៈកម្មាធិការវិនិយោគកម្ពុជាបានចុះបញ្ជីគម្រោងវិនិយោគត្រឹមតែចំនួន ៣៨៩គម្រោង ក្នុងទំហំទុនវិនិយោគប្រមាណ ៦,៥ប៊ីលានដុល្លារអាម៉េរិក។
ក្នុងចំណោមគម្រោងវិនិយោគចំនួន ៦០៩ គម្រោង ខេត្តកំពង់ស្ពឺ ទទួលបានគម្រោងវិនិយោគច្រើនជាងគេ គឺ១៣៦គម្រោង បន្ទាប់មកខេត្តស្វាយរៀង ១៣៥គម្រោង, ភ្នំពេញ ៧៥គម្រោង, ខេត្តតាកែវ៦០គម្រោង ខណៈកោះកុង និងខេត្តព្រះសីហនុ ចំនួន៥០គម្រោងស្មើគ្នា៕
Account
Security
Favourite Content