ភ្នំពេញ ៖ ប្រតិបត្តិការធនាគារ ឬមីក្រូហិរញ្ញវត្ថុ ធ្វើឡើងនៅពេលដែលប្រជាពលរដ្ឋយកប្រាក់ទៅដាក់ផ្ញើនៅគ្រឹះស្ថានស្របច្បាប់ណាមួយ ហើយគ្រឹះស្ថាននោះនឹងយកប្រាក់បញ្ញើរទៅបង្វិលជូនប្រជាពលរដ្ឋផ្សេងទៀតដែលមានតម្រូវការប្រាក់កម្ចី។

ជាមួយគ្នានេះ ដើម្បីឱ្យវិស័យធនាគារនេះមានប្រតិបត្តិការរលូន វាទាមទារយ៉ាងខ្លាំងនូវទំនុកចិត្តពីសំណាក់ប្រជាពលរដ្ឋ ព្រោះនៅដែលសាធារណៈជនមានទំនុកចិត្តលើគ្រឹះស្ថានធនាគារ ពួកគេនឹងមិនមានភាពស្ទាក់ស្ទើរក្នុងការដាក់ប្រាក់សន្សំ ឬទទួលកម្ចីនោះទេ។ ប៉ុន្តែកន្លងមក មានករណីមិនប្រក្រតីមួយចំនួនបានកើតឡើងជាបន្តបន្ទាប់ ដែលធ្វើឱ្យប៉ះពាល់ដល់ទំនុកចិត្តសាធារណៈជនទៅលើធនាគារ។ ម្លោះហើយ ដើម្បីទាញបានទំនុកចិត្តពីសាធារណៈជន គ្រឹះស្ថានធនាគារ និងមីក្រូហិរញ្ញវត្ថុកំពុងធ្វើការរួមគ្នាដើម្បីរក្សាឱ្យបាននូវតម្លាភាពនៃវិស័យដ៏មានសារសំខាន់មួយនេះ។

លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុបានឱ្យដឹងថា ដើម្បីរក្សាតម្លាភាពរបស់វិស័យមួយនេះ ភាគីផ្ដល់កម្ចីបានខិតខំក្នុងការដោះស្រាយពាក្យបណ្ដឹងទាំងឡាយដែលកើតមានឡើង។

បើតាមអ្នកនាំពាក្យរូបនេះ មានឆ្នាំខ្លះសមាគមទទួលបានរហូតទៅដល់ ៣០០បណ្ដឹង និងឆ្នាំខ្លះមានក្រោម១០០បណ្ដឹង ប៉ុន្តែជាទូទៅបញ្ហាដែលកើតឡើង គឺអាចដោះ​ស្រាយបាន ៩៨% ទៅហើយ។

លោក កាំង តុងងី បានបន្តឱ្យដឹងទៀតថា បណ្ដឹងភាគច្រើនគឺដោះស្រាយត្រឹមសមាគម តែបើ​ក្នុងករណីសមាគមដោះស្រាយមិនចេញទេ គឺនឹងត្រូវបញ្ជូនពាក្យបណ្ដឹងទៅកាន់​ធនាគារជាតិ​នៃកម្ពុជា។ ដោយឡែក សម្រាប់ករណីដែលធ្លាប់កើតមានកន្លងមក សមាគមបានកត់សម្គាល់ឃើញបញ្ហាដែលកើតឡើងគឺបញ្ដាលមកពីចំណេះដឹងហិរញ្ញវត្ថុរបស់ប្រជាពលរដ្ឋនៅមានកម្រិត និងការប្រព្រឹត្តមិនសមរម្យរបស់មន្ត្រីឥណទាន។

លោក កាំង តុងងី បានឱ្យដឹងទៀតថា៖

«ពេលយើងទទួលបានរបាយការណ៍ យើងនឹង​មាន​ចំណាត់ការទៅគ្រឹះស្ថានបន្តទៀតដើម្បីឱ្យគាត់រកដំណោះស្រាយចំពោះមន្ត្រីរបស់គាត់ ក៏ដូចជាដើម្បីបង្ការឿងនេះមិនឱ្យកើតមានតទៅទៀត។ ម្យ៉ាងទៀត ប្រសិនបើបញ្ហាដែលសមាគមប្រមូលបានពីអតិថិជនកើតឡើងច្រើនដង  សមាគមនឹងបង្កើតជាគោលការណ៍ ឬគោលនយោបាយណាមួយ ដើម្បីការពារ​អតិថិជន ក៏ដូចជាការពារកុំឱ្យរឿងបែបនោះកើតឡើងទៀត។»

លោកបានបញ្ជាក់ទៀតថា ជាក់ស្ដែង ដូចជាចុងក្រោយនេះ អតិថិជនជួបនូវផលវិបាកដោយសារកិច្ចសន្យារវែងពេក ពិបាកយល់ និងជួបប្រទះភាពយឺតយាវក្នុងការដកប្លង់ជាដើម ដូច្នេះសមាគមធនាគារកម្ពុជា បង្កើត​កុងត្រារួមមួយ ដែលខ្លីជាងមុន និងងាយយល់ជាងមុន។ ប៉ុន្តែទោះជាយ៉ាងណា ដើម្បីឱ្យវិស័យធនាគារកាន់តែរឹងមុំា សមាគមត្រូវមើលលើ២ជ្រុង គឺជ្រុងអ្នកផ្ដល់​សេវាគឺគ្រឹះស្ថានមីក្រូ និងធនាគារ និងជ្រុងអ្នកទទួលសេវា៕