សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ចចូត ជារុក្ខជាតិម្យ៉ាងដែលគេអាចយកទៅកែច្នៃទៅជាសម្ភារប្រើប្រាស់ផ្សេងៗ ដូចជា កន្ទេល មួក កាបូប និងសម្ភារដទៃទៀតសម្រាប់ប្រើប្រាស់ប្រចាំថ្ងៃក្នុងផ្ទះ ក៏ដូចជាគ្រឿងតាំងលម្អ ដ៏មានសោភ័ណភាព។ ក្នុងនោះ មានក្រុមអ្នកផលិតសម្ភារដោយដៃមួយក្រុមនៅក្នុងខេត្តស្វាយរៀងបាន និងកំពុងផលិត កែច្នៃសម្ភារប្រើប្រាស់ពីចចូតសម្រាប់ដាក់លក់ ដើម្បីទទួលបានចំណូលជួយដល់ជីវភាពគ្រួសារ និងសហគមន៍។
លោក ពៅ វណ្ណ: ជាអ្នកតំណាងអ្នកផលិតសម្ភារពីចចូត មានទីតាំងនៅភូមិចំបក់កោង ឃុំតាសួស ស្រុកស្វាយជ្រំ ខេត្តស្វាយរៀង បានមានប្រសាសន៍ថា ៖
«សម្រាប់សហគមន៍យើងមានផលិតសម្ភារច្រើនប្រភេទពីចចូត ត្នោត និងឫស្សី ដែលយើងក៏បានជួយដល់បងប្អូនស្ត្រីក្នុងតំបន់ឱ្យមានការងារធ្វើ មានជំនាញ ក៏ដូចជារកចំណូលផ្គត់ផ្គង់គ្រួសារ»។
លោកបន្តថា៖
«ក្រុមអ្នកផលិតរបស់យើងមាន ១៥នាក់ ក្នុងនោះមានស្ត្រី ១៤ នាក់ ដែលផលិតសម្ភារជាច្រើនប្រភេទដូចជា កាបូបចចូត មួកចចូត មួកស្លឹកត្នោត ស្បោងស្លឹកត្នោត ផលិតផលច្នៃពីបំពង់ឫស្សី ដូចជា កែវទឹក ទុយោបឺត និងផលិតផលច្នៃពីធាងត្នោត ស្លឹកត្នោត រួមមានដូចជា កន្ទេល កន្ត្រកជាដើម»។
ចំពោះតម្លៃនៃផលិតផលដែលមានច្នៃរួចរាល់របស់សហគមន៍ខាងលើនេះមានចាប់ពី ១ដុល្លារ រហូតដល់ ១០ដុល្លារ ឬលើសពីនេះទៀតអាស្រ័យទៅតាមប្រភេទផលិតផល និងទំហំផងដែរ។ សម្រាប់អតិថិជនវិញ ម្ចាស់អាជីវកម្មខាងលើបានប្រាប់ឱ្យដឹងថា ភាគច្រើនជាជនជាតិបរទេស ដូចជា បារាំង ជប៉ុន អូស្រ្តាលី អាល្លឺម៉ង់ និងអារ៉ាប់ជាដើម ហើយក្រៅពីនេះសហគមន៍ក៏មានលក់បោះដុំទៅឱ្យម៉ូយ និងលក់រាយដោយខ្លួនឯងនៅពេលមានកម្មវិធីតាំងពិពណ៌ផងដែរ។
គួរបញ្ជាក់ដែរ លោក វណ្ណៈ បានចាប់ផ្ដើមការផលិតនេះតាំងពីឆ្នាំ២០១១ ដោយសារតែខ្លួនមានជំនាញស្រាប់ ចេះតពីជីដូន ហើយក៏បន្តការផលិតនេះជារឿយៗរហូតដល់បច្ចុប្បន្ន។ នៅក្នុងដំណើរការផលិតរបស់សហគមន៍នេះក៏ជួបប្រទះនូវផលលំបាកផងដែរ ដូចជា ខ្វះបច្ចេកទេសថ្មីៗក្នុងការផលិត ការដេរឱ្យត្រូវតាមតម្រូវការអតិថិជន ជាពិសេសមិនទាន់មានធន់ធានជំនាញក្នុងការផលិតជូនអតិថិជន។ ជាចុងក្រោយ លោកក៏សូមថ្លែងអំណរគុណដល់អតិថិជនដែលតែងតែគាំទ្រកន្លងមក ហើយសង្ឃឹមថានឹងមានកំណើនអតិថិជនគាំទ្របន្ថែមទៀត ព្រោះរាល់ការបញ្ជាទិញរបស់បងប្អូនក៏ជាផ្នែកមួយជួយដល់ជីវភាពស្ត្រីនៅក្នុងសហគមន៍៕
Account
Security
Favourite Content