សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី CNBC បានរាយការណ៍ថា តម្លៃប្រេងឆៅបានឡើងថ្លៃបន្តិចចំពេលមានសញ្ញានៃការរឹតបន្តឹងទីផ្សារពិភពលោក និងភាពមិនប្រាកដប្រជានៃទស្សនវិស័យភូមិសាស្ត្រនយោបាយនៅមជ្ឈិមបូព៌ា។
ទន្ទឹមនឹងនេះ តម្លៃប្រេងឆៅម៉ាក West Texas Intermediate (WTI) បានឡើងថ្លៃ ០,៩ ភាគរយ ឬ ៧៨,៦១ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក Brent បានឡើងថ្លៃ ០,៧ ភាគរយ ឬ ៨៣,៦៧ ដុល្លារក្នុងមួយបារ៉ែល។
លោក Giovanni Staunovo អ្នកយុទ្ធសាស្រ្តរបស់ UBS បានសរសេរថា តម្លៃប្រេងបានឡើងថ្លៃក្នុងប៉ុន្មានសប្តាហ៍ថ្មីៗនេះ ដែលជាសញ្ញាមួយដែលបង្ហាញថាទីផ្សារប្រេងកំពុងរឹតបន្តឹង។ លើសពីនេះ ទីផ្សារអាចនឹងមានភាពតឹងតែងដោយសារតែព្យុះរដូវរងានៅអាមេរិកខាងជើងកាលពីខែមុនបានប៉ះពាល់ដល់ទិន្នផលប្រេង ១,៤ លានបារ៉ែលក្នុងមួយថ្ងៃនៃការផលិតប្រេងឆៅពិភពលោក។ ការរំខានទាក់ទងនឹងអាកាសធាតុបានកើតឡើងស្របពេលដែលតម្រូវការប្រេងរបស់ឥណ្ឌាបានកើនឡើង ៨,២ ភាគរយកាលខែមករា។
ទន្ទឹមនឹងនេះដែរ ការនាំចេញបានធ្លាក់ចុះប្រហែល ៩ សែនបារ៉ែលក្នុងខែកុម្ភៈ ដែលជាដល់កម្រិតទាបបំផុតចាប់តាំងពីខែសីហា បន្ទាប់ពី OPEC+ អនុវត្តទៅតាមការកាត់បន្ថយទិន្នផលប្រេងរបស់ខ្លួន។ នៅសហរដ្ឋអាមេរិក ស្តុកប្រេងឆៅសម្រាប់ពាណិជ្ជកម្មបានកើនឡើងចំនួន ៣,៥ លានបារ៉ែលកាលពីសប្តាហ៍មុន ខណៈដែលស្តុកសរុបរួមទាំងផលិតផលសម្រេចមិនមានការផ្លាស់ប្តូរអ្វីច្រើននោះទេ។ ស្តុករបស់សហរដ្ឋអាមេរិកបានកើនឡើងក្នុងប៉ុន្មានសប្តាហ៍ថ្មីៗនេះ ដោយសារការប្រើប្រាស់របស់រោងចក្រចម្រាញ់បានធ្លាក់ចុះ។
ស្របពេលនេះដែរ ទស្សនវិស័យភូមិសាស្ត្រនយោបាយនៅមជ្ឈិមបូព៌ានៅតែមិនប្រាកដប្រជា ខណៈដែលសហរដ្ឋអាមេរិកកំពុងធ្វើការលើបទឈប់បាញ់នៅតំបន់ហ្គាហ្សា ចំពេលដែលភាពតានតឹងកើនឡើងនៅតាមព្រំដែនអ៊ីស្រាអែល លីបង់ និងនៅសមុទ្រក្រហម។
កាលពីថ្ងៃពុធកន្លងទៅនេះ សមាជិកគណៈរដ្ឋមន្ត្រីសង្គ្រាមអ៊ីស្រាអែល លោក Benny Gantz បាននិយាយថា អ៊ីស្រាអែលកំពុងធ្វើការលើកិច្ចខិតខំប្រឹងប្រែងថ្មី ដើម្បីទទួលបានការដោះលែងចំណាប់ខ្មាំងដែលត្រូវបានឃុំខ្លួននៅហ្គាហ្សា។ នៅថ្ងៃព្រហស្បតិ៍ បេសកជនមជ្ឈិមបូព៌ារបស់សេតវិមានលោក Brett McGurk នឹងជួបជាមួយនាយករដ្ឋមន្ត្រីអ៊ីស្រាអែល Benjamin Netanyahu ដើម្បីពិភាក្សាអំពីកិច្ចខិតខំប្រឹងប្រែងដើម្បីដោះលែងចំណាប់ខ្មាំងដែលចាប់ដោយក្រុមហាម៉ាស។
គេរំពឹងថា បទឈប់បាញ់បណ្តោះអាសន្នគឺជាថ្នូរនឹងការដោះលែងចំណាប់ខ្មាំងនៅហ្គាហ្សានឹងអាចកាត់បន្ថយហានិភ័យនៃជម្លោះតំបន់មជ្ឈិមបូព៌ា និងការរំខានដល់ការផ្គត់ផ្គង់ប្រេងឆៅ។ យ៉ាងណាមិញអ៊ីស្រាអែលបានបើកការវាយប្រហារម្តងហើយម្តងទៀតប្រឆាំងនឹងគោលដៅរបស់ក្រុម Hezbollah ក្នុងប្រទេសលីបង់ក្នុងប៉ុន្មានថ្ងៃថ្មីៗនេះ ហើយក្រុមសកម្មប្រយុទ្ធ Houthi ប្រទេសយេម៉ែននៅតែបន្តវាយប្រហារលើការដឹកជញ្ជូនទំនិញនៅក្នុងសមុទ្រក្រហម៕
Account
Security
Favourite Content