បរទេស ៖ យោងតាមប្រភពព័ត៌មានពី BBC បានរាយការណ៍ថា សហភាពអឺរ៉ុបមានផែនការដាក់ពន្ធបន្ថែមលើរថយន្តអគ្គិសនីដែលនាំចូលពីចិនចន្លោះពី ១៧,៤ ភាគរយទៅ ៣៨,‌១ ភាគរយ ខណៈដែលអត្រាពន្ធបច្ចុប្បន្នមាន ១០ ភាគរយ។

សហភាពអឺរ៉ុបបានកំណត់ការអនុវត្តដាក់ពន្ធបន្ថែមលើរថយន្តអគ្គិសនីរបស់ចិននៅថ្ងៃទី ៤ ខែកក្កដា ជាមួយនឹងការស៊ើបអង្កេតត្រូវបានកំណត់បន្តរហូតដល់ថ្ងៃទី ២ ខែវិច្ឆិកា។ ការសម្រេចចិត្តរបស់សហភាពអឺរ៉ុបកើតឡើងស្របពេលជាមួយនឹងការបន្តស៊ើបអង្កេតរបស់ខ្លួនទៅលើករណីលំហូរចូលនៃរថយន្តមានចិនតម្លៃទាប ដែលឧបត្ថម្ភដោយរដ្ឋាភិបាលចិន។

ទន្ទឹមនឹងនេះ ក្រុមហ៊ុនផលិតរថយន្ត EV ដែលចូលរួមសហការជាមួយនឹងការស៊ើបអង្កេតរបស់គណៈកម្មការអឺរ៉ុបត្រូវប្រឈមនឹងការបង់ពន្ធជាមធ្យម ២១ ភាគរយប៉ុណ្ណោះ ខណៈដែលអ្នកមិនចូលរួមសហការប្រឈមមុខនឹងការបង់ពន្ធ ៣៨,១ ភាគរយ។ លើសពីនេះ ការដាក់ពន្ធបន្ថែមនឹងអនុវត្តចំពោះក្រុមហ៊ុនគោលដៅចំនួនបីរួមមាន៖ BYD ១៧,៤ ភាគរយ, Geely ២០ ភាគរយ, និង SAIC ៣៨,១​ ភាគរយ។ មិនត្រឹមតែប៉ុណ្ណោះ ក្រុមហ៊ុនរថយន្តមិនមែនចិនដែលផលិតរថយន្ត EV មួយចំនួននៅក្នុងប្រទេសចិន រួមទាំងក្រុមហ៊ុនដែលមានមូលដ្ឋាននៅសហភាពអឺរ៉ុបដូចជា BMW ក៏នឹងរងផលប៉ះពាល់ផងដែរ។ ការ​គិត​ថ្លៃ​ពន្ធបន្ថែមទាំង​នេះ​នឹង​មាន​តម្លៃ​លើស​ពី​អត្រា​ពន្ធបច្ចុប្បន្ន​ពន្ធ ១០ ភាគរយដែលផលិត​ក្នុង​ប្រទេស​ចិន។

អន្តរាគមន៍របស់សហភាពអឺរ៉ុបកើតឡើងបន្ទាប់ពីសហរដ្ឋអាមេរិកដំឡើងពន្ធយ៉ាងខ្លាំងក្លាលើរថយន្តអគ្គិសនីរបស់ចិនពី ២៥ ភាគរយទៅ ១០០ ភាគរយកាលពីខែមុន។ យ៉ាងណាមិញ ការសម្រេចចិត្តនេះមិនត្រឹមតែទទួលបានការរិះគន់ពីប្រទេសចិនប៉ុណ្ណោះទេ ប៉ុន្តែប្រទេសមួយចំនួននៅក្នុងសហភាពអឺរ៉ុបក៏បានបង្ហាញពីការព្រួយបារម្ភផងដែរ ដោយសារផលប៉ះពាល់អវិជ្ជមានពីការបន្ថែមពន្ធគយនឹងអាចកើតឡើងលើសពីកិច្ចការពារអត្ថប្រយោជន៍។

ជាការឆ្លើយតប ប្រទេសចិនបានចោទប្រកាន់ថា ការដាក់ពន្ធគយបន្ថែមនេះបំពានច្បាប់ពាណិជ្ជកម្មអន្តរជាតិ ហើយបានពិពណ៌នាការស៊ើបអង្កេតនេះថាជាកិច្ចការពារនិយម។លោក Lin Jian អ្នកនាំពាក្យក្រសួងការបរទេសចិនលើកឡើងថា ការស៊ើបអង្កេតប្រឆាំងនឹងការឧបត្ថម្ភធន គឺជាការការពារនិយម ហើយពន្ធគយក៏អាចប៉ះពាល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-សហភាពអឺរ៉ុប និងស្ថិរភាពនៃផលិតកម្មរថយន្ត និងខ្សែសង្វាក់ផ្គត់ផ្គង់ពិភពលោកថែមទៀតផង។

កាលពីសប្តាហ៍មុន ប្រទេសតួគីក៏បានប្រកាសផងដែរថា ខ្លួននឹងដាក់ពន្ធបន្ថែម ៤០ ភាគរយលើការនាំចូលយានយន្តពីប្រទេសចិន ដើម្បីការពារហានិភ័យដែលអាចកើតឡើងនៅក្នុងសមតុល្យគណនីចរន្តរបស់ខ្លួន និងការពារក្រុមហ៊ុនផលិតរថយន្តក្នុងស្រុក។ ក្រសួងពាណិជ្ជកម្មតួកគីបានប្រកាសថា ការដាក់ពន្ធគយបន្ថែមនេះត្រូវបានកំណត់យ៉ាងតិច ៧ ០០០ ដុល្លារក្នុងមួយយានយន្ត ដែលនឹងចូលជាធរមានចាប់ពីថ្ងៃទី ៧ ខែកក្កដា។ ការសម្រេចចិត្តពន្ធបន្ថែមត្រូវបានធ្វើឡើងដោយគិតគូរពីគោលដៅឱនភាពបច្ចុប្បន្ន និងការខិតខំប្រឹងប្រែងដើម្បីលើកទឹកចិត្តដល់ការវិនិយោគ និងផលិតកម្មក្នុងស្រុក។

ជាការឆ្លើយតប​ ប្រទេសចិនបានសម្តែងការមិនពេញចិត្តយ៉ាងខ្លាំង និងការប្រឆាំងយ៉ាងម៉ឺងម៉ាត់ចំពោះការសម្រេចចិត្តរបស់ប្រទេសទួតួកគីក្នុងការដាក់ពន្ធបន្ថែម ៤០ ភាគរយលើយានយន្តដែលនាំចូលពីប្រទេសចិន ដោយជំរុញឱ្យប្រទេសនេះគួរតែដកពន្ធបន្ថែមជាបន្ទាន់។ ក្រសួងពាណិជ្ជកម្មចិន លើកឡើងថា ចំណាត់ការរបស់តួកគីគឺប្រឆាំងនឹងច្បាប់របស់អង្គការពាណិជ្ជកម្មពិភពលោក WTO ហើយគោលនយោបាយផ្លាស់នៃការផ្លាស់ប្តូរនេះមិនត្រឹមតែប៉ះពាល់ដល់ផលប្រយោជន៍របស់ភាគីទាំងសងខាង និងអ្នកប្រើប្រាស់តួកគីក្នុងស្រុកប៉ុណ្ណោះទេ ប៉ុន្តែថែមទាំងធ្វើឱ្យក្រុមហ៊ុនចិនកាន់តែព្រួយបារម្ភអំពីធុរកិច្ចជាមួយនឹងតួកគី និងធ្វើឱ្យប៉ះពាល់ដល់ទំនុកចិត្តរបស់ពួកគេក្នុងការវិនិយោគនៅក្នុងតួកគីទៀតផង៕