ភ្នំពេញ ៖ ស្របតាមគោលនយោបាយរបស់រាជរដ្ឋាភិបាលកម្ពុជា ដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការ ក្នុងការផ្សព្វផ្សាយ និងធ្វើពិពិធកម្មលើការដាំដុះប្រកបដោយបរិយាបន្ន មកដល់បច្ចុប្បនេះ ប្រជាកសិករកម្ពុជាបាន និងកំពុងវិវត្តន៍ការងារកសិកម្មរបស់ខ្លួនកាន់តែមានភាពល្អប្រសើរឡើងជាងមុន ជ្រើសរើសពូជ ទាំងការដាំដុះស្របតាមបច្ចេកទេស ការថែទាំ ជាពិសេស ការចេះជ្រើសប្រភេទដំណាំដាំទៅតាមរដូវកាលផងដែរ។

លោក ទួត សេងហ័ង អ្នកគ្រប់គ្រងសហប្រតិកម្មធន់ទ្រាំ និងអាកាសធាតុ នៃអង្គការអាយឌីអ៊ី (IDE) កម្ពុជា លើគម្រោងស៊ីស្មាត បានប្រាប់ AMS Economy ឱ្យដឹងថា បច្ចុប្បន្ននេះ ទាក់ទងទៅនឹងការដាំដំណាំ ឬបន្លែ មិនអាស្រ័យទៅតាមខែ ឬរដូវដូចកាលពីមុននោះទៀតទេ ប៉ុន្តែអ្វីដែលសំខាន់ គឺការចេះជ្រើសរើសពូជដំណាំ (មានលេខកូដកំណត់) បច្ចេកទេសដាំ និងថែទាំ។

លោក ទួត សេងហ័ង បានពន្យល់ និងលើកជាឧទាហរណ៍ថា ចំពោះដំណាំត្រសក់ គេមិនគិតថាត្រូវដាំនៅក្នុងខែភ្លៀងធ្លាក់ ឬខែក្តៅនោះទេ សំខាន់គឺការសម្គាល់ និងជ្រើសរើសប្រភេទពូជដែលត្រឹមត្រូវតាមរដូវកាល (នេះគឺជាជម្រើសមួយ) ដែលគេធ្វើឡើងទាក់ទងទៅនឹងការដាំដុះស្របតាមបដិបទនៃអាកាសធាតុ។ ដោយឡែក តាមស្ថានភាពជាក់ស្តែង នៅរដូវភ្លៀងនេះ សម្រាប់ការដាំដំណាំ ប្រជាជនកសិករមមាញឹកដាំដុះ ត្រសក់ ត្រឡាច ត្រប់ ននោង និងល្ហុងជាដើម ដែលជាដំណាំមានអំណោយផលក្នុងខែភ្លៀង ប៉ុន្តែកសិករក៏ត្រូវតែមានវិធានការបង្ការនៅពេលមានភ្លៀងធំអាចជន់លិចដំណាំ ដូច្នេះ ត្រូវលើករងឱ្យខ្ពស់ ឬមានកន្លែងបង្ហូរទឹកចេញផងដែរ ដើម្បីការពារដំណាំរបស់ពួកគាត់។ ប៉ុន្តែត្រូវចង់ចាំថា នៅពេលប្រជាកសិករនាំគ្នាសម្រុកដាំដំណាំដូចដែលបានរៀបរាប់ព្រមគ្នា ទិន្នផលដែលទទួលបាននឹងចាក់គរនៅលើទីផ្សារ ដែលអាចធ្វើឱ្យតម្លៃធ្លាក់ជាងប្រភេទដំណាំដទៃ។

លោកថា ជាទូទៅនៅក្នុងរដូវភ្លៀងធ្លាក់ ភាគច្រើនចំពោះប្រភេទដំណាំមើម ដូចជា ការ៉ុត ឆៃថាវ ឬពពួកបន្លែស្លឹក ដូចជា ស្ពៃ ខាត់ណា សាឡាដ៍ គេមិនសូវដាំនៅក្នុងរដូវភ្លៀងនោះទេ ព្រោះវាងាយនឹងខាតបង់ដោយសារការជន់លិចទឹក ដែលធ្វើឱ្យរលួយដើម ឬស្លឹកបាន។ យ៉ាងណាក៏ដោយ ដំណាំទាំងអស់នេះ គេក៏អាចមានវិធីសាស្ត្រដាំដុះ និងទទួលបានទិន្នផលបានដោយបច្ចេកទេសដាំក្នុងផ្ទះសំណាញ់ ឬគេអាចមានវិធីសាស្ត្រលើករងទប់ទឹកឱ្យខ្ពស់ ឬបង្ហូរទឹកចេញ ដើម្បីបញ្ចៀសការជន់លិច។ ដំណាំទាំងនេះ នៅពេលអាចដាំដុះបាន និងប្រមូលបានផលយកទៅលក់នៅលើទីផ្សារអាចនឹងទទួលបានតម្លៃថ្លៃជាងពេលធម្មតា ត្បិតមិនសូវមានកសិករដាំដុះក្នុងរដូវភ្លៀងធ្លាក់នោះទេ។

បើទោះជាបែបនេះក្ដី លោក ទួត សេងហ័ង បានបន្ថែមថា បច្ចុប្បន្ននេះ ចំពោះការដាំដុះដោយប្រើផ្ទះសំណាញ់ពីសំណាក់ប្រជាកសិករនៅមានកម្រិតនៅឡើយ ព្រោះការសាងសង់ផ្ទះសំណាញ់ឱ្យត្រូវតាមស្តង់ដាគឺត្រូវថវិកាច្រើន ខណៈដែលនិន្នាការនៃការជំរុញការផលិតកសិផលឱ្យទទួលបានផលល្អ មានគុណភាព ស្របតាមសស្ដងទីផ្សារ កំពុងត្រូវបានក្រសួងកសិកម្ម រុក្ខាប្រមាញ់ និងនេសាទ ព្រមទាំងបណ្តាអង្គការអភិវឌ្ឍន៍ដែលជាដៃគូពាក់ព័ន្ធ ព្យាយាម និងយកចិត្តទុកដាក់ផ្សព្វផ្សាយពីបច្ចេកទេស រួមទាំងវិធីសាស្ត្រនានាទៅដល់ប្រជាកសិករ ដើម្បី​ធ្វើយ៉ាងណាឱ្យការដាំដុះ និងការផលិតមានប្រសិទ្ធភាព អាចធានាសុវត្ថិភាពស្បៀងនៅក្នុងស្រុក និងឈានទៅកាន់តំបន់៕