សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ពិព័រណ៍ផ្សារមូលបត្រកម្ពុជាឆ្នាំ២០២៤ ត្រូវរៀបចំឡើងក្នុងរយៈពេល៣ថ្ងៃនៅក្នុងផ្សារទំនើបអ៊ីអនភ្នំពេញ ចាប់ពីថ្ងៃទី២៥ ដល់ថ្ងៃទី២៧ ខែតុលា ឆ្នាំ២០២៤ ដោយមានការចូលរួមសួរនាំពីព័ត៌មានលម្អិតជាច្រើនពីសាធារណជននៅក្នុងផ្សារទំនើបផ្ទាល់ ។
ថ្លែងនៅក្នុងពិធីបើកសម្ពោធជាផ្លូវការនូវពិព័រណ៍ផ្សារភាគហ៊ុនកម្ពុជាឆ្នាំ ២០២៤ កាលពីថ្ងៃទី២៥ តុលា ២០២៤ ឯកឧត្តម ហុង សុហួរ អគ្គនាយកក្រុមហ៊ុនផ្សារមូលបត្រកម្ពុជាបានថ្លែងថា ពិព័រណ៍ផ្សារមូលបត្រកម្ពុជា ជាពិព័រណ៍ដែលមានលក្ខណៈជាយុទ្ធនាការក្នុងការទាក់ទាញចំណាប់អារម្មណ៍របស់សាធារណជនក្នុងការបង្ហាញអំពីបច្ចុប្បន្នភាពទីផ្សារ និងក្នុងការបណ្ដុះគំនិតវិនិយោគលើភាគហ៊ុន ដោយមានអមជាមួយនឹងកម្មវិធីសប្បាយៗមួយចំនួន ។
ឯកឧត្តមបន្តថា បច្ចុប្បន្ននេះ តម្លៃភាគហ៊ុនដែលបានដាក់លក់ក្នុងផ្សារមូលបត្រកម្ពុជាស្ទើរតែគ្រប់ក្រុមហ៊ុនបាន និងកំពុងលក់បញ្ចុះតម្លៃ ឬកំពុងលក់ក្នុងតម្លៃទាប ដែលជាឱកាសមាសសម្រាប់សាធារណជនក្នុងការបើកគណនីជួញដូរភាគហ៊ុនក្នុងផ្សារមូលបត្រកម្ពុជា ហើយទិញភាគហ៊ុនក្នុងតម្លៃទាបនៅពេលនេះ ។
ឯកឧត្តមបញ្ជាក់ថា៖
«ចាប់តាំងពីវិបត្តិកូវីដ១៩ និងសង្គ្រាមរុស្ស៊ីអ៊ុយក្រែន ធ្វើឱ្យសេដ្ឋកិច្ចនិងអាជីវកម្មមួយចំនួនជួបប្រទះ ក្នុងនោះផ្សារហ៊ុនកម្ពុជាក៏ឃើញថាមានអ្នកលក់ច្រើនជាងអ្នកទិញ ធ្វើឱ្យតម្លៃភាគហ៊ុនបានធ្លាក់ចុះ ប៉ុន្តែការទិញលក់នៅក្នុងផ្សារហ៊ុនកម្ពុជានៅតែល្អប្រសើរ » ។
ឯកឧត្តមបន្ថែមថា តម្លៃភាគហ៊ុននៅក្នុងផ្សារមូលបត្រកម្ពុជារំពឹងថានឹងងើបឡើងវិញនៅពេលខាងមុខ ពោលគឺនៅពេលដែលស្ថានភាពសេដ្ឋកិច្ចបានប្រសើរឡើង ដូច្នេះការទិញហ៊ុននៅក្នុងពេលកំពុងធ្លាក់ឬមានតម្លៃទាបបែបនេះ នឹងធ្វើឱ្យអ្នកវិនិយោគក្លាយជាអ្នកមាននៅពេលខាងមុខ ។
លោកបញ្ជាក់ថា គិតត្រឹមបច្ចុប្បន្ននេះ ក្នុងផ្សារមូលបត្រកម្ពុជាមានគណនីជួញដូរប្រមាណ ៥ម៉ឺន ៧ពាន់គណនី ហើយរំពឹងថាចំនួននេះ នឹងកើនឡើងដល់ចំនួន៦ម៉ឺន១ពាន់គណនីនៅដំណាច់ឆ្នាំនេះ ។ ដោយឡែកទំហំជួញដូរប្រចាំថ្ងៃមានប្រមាណជា២០ម៉ឺនដុល្លារអាមេរិកជាមធ្យមក្នុងមួយថ្ងៃ ។
ឯកឧត្តម ស៊ូ សុជាតិ ប្រតិភូរាជរដ្ឋាភីបាលទទួលបានបន្ទុកជាអគ្គនាយកនិយ័តករមូលបត្រកម្ពុជា បានមានប្រសាសន៍ថា វិស័យមូលបត្រត្រូវបានចាត់ទុកជាវិស័យដ៏សំខាន់មួយក្នុងការអភិវឌ្ឍកំណើនសេដ្ឋកិច្ច និងមានសក្ដានុពលក្នុងការជំរុញកិច្ចអភិវឌ្ឍវិស័យផ្សេងផងដែរតាមរយៈការផ្ដល់នូវប្រភពទុនរយៈពេលវែងសម្រាប់សហគ្រាស ក្រុមហ៊ុន ដើម្បីពង្រីកអាជីវកម្មរបស់ខ្លួន ។
ឯកឧត្តមបន្តថា ដើម្បីធានាបាននូវការអភិវឌ្ឍវិស័យមូលបត្រប្រកបដោយប្រសិទ្ធភាព បរិយាបន្ន និងនិរន្តរភាព និយ័តករមូលបត្រកម្ពុជា បានដាក់ចេញនូវយុទ្ធសាស្ត្រ និងគោលនយោបាយនានាព្រមទាំងផែនការអភិវឌ្ឍន៍ផងដែរ ដើម្បីជំរុញឱ្យវិស័យនេះកាន់តែរីកចម្រើនជាបន្តបន្ទាប់ ។
ឯកឧត្តមបញ្ជាក់ថា ៖
«ការវិនិយោគភាគហ៊ុន គឺជាជម្រើសមួយដ៏ល្អសម្រាប់អ្នកដែលគិតថា ខ្លួនចាប់ផ្ដើមរៀនវិនិយោគដំបូង ដោយចាប់ផ្ដើមជាមួយនឹងដើមទុនតិច តែទទួលបានអត្ថប្រយោជន៍ច្រើន និងអាចពង្រីកសំណុំវិនិយោគ ដើម្បីបង្កើននូវចំណូលអកម្មរបស់ខ្លួនបន្ថែមទៀត ដូច្នេះ ខ្ញុំសូមលើកទឹកចិត្តដល់បងប្អូនចាប់ផ្ដើមវិនិយោគឱ្យបានលឿន និងចាប់ផ្ដើមអនុវត្តន៍ឱ្យបានខ្ជាប់ខ្ជួន»។
នៅក្នុងឱកាសនោះដែរ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលផ្សារមូលបត្រកម្ពុជា ក៏បានមានប្រសាសន៍ផងដែរថា ពិព័រណ៍ផ្សារភាគហ៊ុនកម្ពុជា នៅពេលនេះគឺជាឱកាសមួយសម្រាប់វិនិយោគិនជាពិសេសសម្រាប់សាធារណជនដែលមិនទាន់ចេះមិនទាន់ដឹងពីរបៀបនៃការវិនិយោគភាគហ៊ុនឱ្យដឹង បានស្គាល់បានចេះ និងចាប់ផ្ដើមវិនិយោគ ហើយនឹងអាចបង្កើនប្រសិទ្ធភាពនៃការប្រើប្រាស់ទុនវិនិយោគរបស់ខ្លួន ៕
Account
Security
Favourite Content