ភ្នំពេញ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ពីបច្ចុប្បន្នភាពនៃការនាំចេញស្រូវប្រចាំថ្ងៃរបស់ប្រជាកសិករថា បានវិលទៅរកប្រក្រតីភាពឡើងវិញហើយ ដោយបរិមាណនៃការនាំចេញមានកំណើន ហើយតម្លៃក៏ទទួលបានថ្លៃជាងមុនបើធៀបទៅនឹងតម្លៃកាលពីអំឡុងខែមករា ដើមឆ្នាំ២០២៥។

ឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា បន្ទា​ប់​ពីការសម្រាកមួយរយៈពេលក្នុងអំឡុងបុណ្យចូលឆ្នាំប្រពៃណីជនជាតិចិន-វៀតណាម ពីសំណាក់ឈ្មួញកណ្តាលមួយចំនួនធំនោះ បច្ចុប្បន្ន សកម្មភាពប្រមូលផល និងទិញស្រូវនៅតាមបណ្តាខេត្តសំខាន់ៗ ដូចជាបាត់ដំបង ព្រៃវែង ជាដើម ចាប់មានដំណើរការធម្មតាឡើងវិញ ហើយតម្លៃក៏ទទួលបានល្អប្រសើរជាងពេលកន្លងទៅដែរ ។

ដោយឡែក តម្លៃស្រូវដែលរោងម៉ាស៊ីនក្នុងស្រុកមួយចំនួនក្នុងខេត្តព្រៃវែងក៏បានទទួលទិញតាំងពីថ្ងៃទី៤ ខែកុម្ភៈ ឆ្នាំ២០២៥ (រៀល/គីឡូក្រាម) ដែលប្រភេទស្រូវ OM 5451 មានតម្លៃចាប់ពី ៨០០ ដល់ ៨៥០រៀលក្នុងមួយគីឡូ ហើយចំពោះប្រភេទស្រូវ​​សែនក្រអូបវិញអាចមានតម្លៃចន្លោះពី ១២៥០រៀល ទៅ ១៣៥០រៀល ដោយឡែកចំពោះប្រភេទស្រូវស្រងែស្រាលមានតម្លៃចន្លោះពី ១០០០ ទៅ ១០៣០រៀលក្នុងមួយគីឡូក្រាម។

ឯកឧត្តមបណ្ឌិត យ៉ង សាំងកុមារ ក៏បានបង្ហាញនូវតារាង​តម្លៃស្រូវ នៅតាមបណ្តាខេត្ត ចំនួន៣ រួមមាន ខេត្ត​ព្រៃវែង បាត់ដំបង និងកំពងឆ្នាំង គិតត្រឹមថ្ងៃទី០៦ ខែកុម្ភៈ ដែលនៅខេត្តបាត់ដំបង តម្លៃស្រូវ​​សែនក្រអូបតម្លៃ ១២៥០រៀល ទៅ១៣៥០រៀល ស្រូវស្រងែស្រាលតម្លៃ៩៥០ ទៅ ៩៦៥រៀល ស្រូវ OM 5451 តម្លៃ៨៧០ទៅ៨៨០ រៀល ស្រូវ IR 504​តម្លៃមធ្យម៧០០ (រៀល/គីឡូក្រាម)។

ដោយឡែក ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កាលពីដើមខែកុម្ភៈ ឆ្នាំ២០២៥នេះ បានមានប្រសាសន៍ថា ការនាំចេញស្រូវប្រចាំថ្ងៃ បានវិលទៅរកប្រក្រតីភាពឡើងវិញ បន្ទាប់ពីបុណ្យចូលឆ្នាំចិន-វៀតណាមត្រូវបានបញ្ចប់។

ឯកឧត្តម ឃឹម ហ្វីណង់ បានបញ្ជាក់ថា​ ទំហំនាំចេញស្រូវនាពេលបច្ចុប្បន្ន គិតជាមធ្យមស្ថិតក្នុងចន្លោះពី ២០,០០០- ២៥,០០០តោន ក្នុងមួយថ្ងៃ ដែលជាបរិមាណប្រហាក់ប្រហែលគ្នានឹងមុនពេលថ្ងៃឈប់សម្រាកបុណ្យចូលឆ្នាំចិន និងខ្ពស់ជាងមធ្យមភាគនៃបរិមាណប្រចាំថ្ងៃកាលពីដើមខែមករា ឆ្នាំ២០២៥ ដែលមានទំហំត្រឹមតែ ១០,០០០តោនក្នុងមួយថ្ងៃ។

ឯកឧត្តម បានបន្តថា ទោះបីជាថ្លៃស្រូវអូអឹម ស្ថិតក្នុងរង្វង់ ៨០០រៀលដដែលក៏ដោយ តែស្ថានភាពបែបនេះ បានជួយកាត់បន្ថយសម្ពាធថ្លៃស្រូវនៅទីវាល និងជួយឱ្យមិនមានការរាំងស្ទះទីផ្សារលក់ចេញ របស់បងប្អូនកសិករផងដែរ។ ការនាំស្រូវប្រចាំថ្ងៃកាលពីសប្ដាហ៍មុននេះ បានហក់ឡើងដល់ ៣,៦ម៉ឺនតោន ដែលជាទំហំខ្ពស់បំផុតក្នុងដើមឆ្នាំ២០២៥ ហើយសង្ឃឹមថា សញ្ញាវិជ្ជមានទាំងនេះនឹងជួយធ្វើឱ្យប្រសើរជាងមុនដល់ថ្លៃស្រូវនាពេលខាងមុខ៕