បរទេស៖ យោងតាមប្រភពព័ត៌មានពីរ៉យទ័រ បានរាយការណ៍ថា ប្រធានាធិបតីអាម៉េរិក លោក Donald Trump ខឹងសម្បារយ៉ាងខ្លាំងចំពោះប្រធានាធិបតីរុស្ស៊ី លោក Vladimir Putin ពាក់ព័ន្ធនឹងកិច្ចខិតខំប្រឹងប្រែងបញ្ចប់សង្រ្គាមជាមួយអ៊ុយក្រែន ហើយថែមទាំងបានគំរាមយកពន្ធពីបណ្តាប្រទេសទាំងឡាយណាដែលទិញប្រេងពីរុស្ស៊ីទៀតផង។

ថ្មីៗនេះ លោក Trump បានប្រាប់ NBC News ថា លោកមានការខឹងសម្បារយ៉ាងខ្លាំងបន្ទាប់ពីប្រធានាធិបតីរុស្ស៊ីបានរិះគន់ភាពជឿជាក់នៃការដឹកនាំរបស់ប្រធានាធិបតីអ៊ុយក្រែន Volodymyr Zelenskiy កាលពីសប្តាហ៍មុន ដោយសារវាប៉ះពាល់ដល់កិច្ចខិតខំប្រឹងប្រែងរបស់គាត់ក្នុងការបញ្ចប់សង្រ្គាមរុស្ស៊ី-អ៊ុយក្រែន។ ចាប់តាំងពី Trump ចូលកាន់តំណែងជាលើកទី២នៅក្នុងអំឡុងខែមករា រហូតមក លោកបានប្រកាន់ជំហរភាគច្រើននៅខាងប្រទេសរុស្ស៊ី ខណៈដែលលោកបានព្យាយាមសម្រុះសម្រួលបញ្ចប់សង្គ្រាមរុស្ស៊ី-អ៊ុយក្រែនដែលបានកើតឡើងអស់រយៈពេល៣ឆ្នាំ។ យ៉ាងណាមិញ ការអត្ថាធិប្បាយទាំងកំហឹងរបស់ Trump អំពី Putin បានឆ្លុះបញ្ចាំងពីការខកចិត្តរបស់គាត់កាន់តែខ្លាំងឡើងអំពីការខ្វះចលនាលើបទឈប់បាញ់។

Trump និយាយថា ៖

« ប្រសិនបើរុស្ស៊ី ជាមួយខ្ញុំ មិនអាចធ្វើកិច្ចព្រមព្រៀងស្តីពីការបញ្ឈប់ការបង្ហូរឈាមនៅអ៊ុយក្រែនបាននោះទេ ខ្ញុំគិតថាវាជាកំហុសរបស់រុស្ស៊ី ហើយខ្ញុំនឹងដាក់ពន្ធបន្ថែមលើពាណិជ្ជកម្មប្រេងទាំងអស់ដែលចេញពីប្រទេសរុស្ស៊ី ដោយពន្ធនឹងមានចន្លោះពី ២៥ ភាគរយទៅ ៥០ ភាគរយ។ ​ប្រសិន​បើ​អ្នក​ទិញ​ប្រេង​ពី​រុស្ស៊ី អ្នក​មិន​អាច​ធ្វើ​អាជីវកម្ម​នៅ​សហរដ្ឋអាម៉េរិក​បាន​ទេ»។

នេះមានន័យថា​ Trump កំពុងគំរាមយកពន្ធ ២៥ ភាគរយទៅ ៥០ ភាគរយលើប្រទេសណាដែលទិញប្រេងពីរុស្ស៊ី ហើយនាំចេញប្រេងបន្តមកអាម៉េរិក។ Trump បញ្ជាក់ថា គាត់អាចដាក់ការរឹតបន្តឹងពាណិជ្ជកម្មថ្មីក្នុងរយៈពេលមួយខែ។ យ៉ាងណាមិញ ទីក្រុងម៉ូស្គូមិនទាន់មានប្រតិកម្មឆ្លើយតបភ្លាមៗនោះទេ ប៉ុន្តែជារឿយៗ រុស្ស៊ីបានចាត់ការដាក់ទណ្ឌកម្មជាច្រើនរបស់លោកខាងលិចថាជាសកម្មភាពខុសច្បាប់។

កាលពីសប្តាហ៍មុន Trump បានប្រកាសពន្ធបន្ថែម ២៥​ ភាគរយលើការនាំចូលពីប្រទេសណាមួយដែលទិញប្រេង ឬឧស្ម័នពីវេណេហ្ស៊ុយអេឡា។ ប្រធានាធិបតីអាម៉េរិករូបនេះក៏បានបញ្ជាក់ដែរថា គាត់អាចនឹងចាត់វិធានការស្រដៀងគ្នាប្រឆាំងនឹងការនាំចូលពីប្រទេសណាដែលទិញប្រេងពីប្រទេសរុស្ស៊ីដូចគ្នា ហើយវិធានការនេះអាចប៉ះពាល់ដល់ប្រទេសចិន និងឥណ្ឌាខ្លាំងជាងគេ។ គួរឲ្យបញ្ជាក់ដែរថា អាមេរិក​ផ្អាកការ​នាំ​ចូល​ប្រេង​ឆៅ​ពី​រុស្ស៊ី​ចាប់តាំង​ខែ​មេសា ឆ្នាំ​២០២២ ខណៈដែលឥណ្ឌា និងចិនបានក្លាយជាអ្នកទិញប្រេងឆៅដ៏ធំបំផុតរបស់រុស្ស៊ី។ មិនត្រឹមតែប៉ុណ្ណោះ Trump គំរាមដាក់ពន្ធបន្ថែមដល់អ្នកទិញប្រេងអ៊ីរ៉ង់ផងដែរ ប្រសិនបើទីក្រុងតេអេរ៉ង់មិនព្រមឈានដល់កិច្ចព្រមព្រៀងបញ្ចប់កម្មវិធីអាវុធនុយក្លេអ៊ែររបស់ពួកគេ៕