សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានប្រកាសបដិសេធចំពោះសំណើសុំចុះបញ្ជីដីមួយកន្លែងមានទំហំ ៥១៣ហិកតា ស្ថិតនៅក្នុងភូមិត្បែងលិច ឃុំត្បែង ស្រុកបន្ទាយស្រី ខេត្តសៀមរាបដែលបានស្នើដោយបុគ្គលឈ្មោះ ច័ន្ទ រិទ្ធ ភេទប្រុស អាយុ៦៨ឆ្នាំ ។
បើតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ (ដ.ន.ស.) បានឱ្យដឹងថា ក្រសួងបានទទួលលិខិតស្នើសុំចុះថ្ងៃទី៣១ ខែតុលា ឆ្នាំ២០២៤ ពីបុគ្គលឈ្មោះ ច័ន្ទ រិទ្ធ ភេទប្រុស អាយុ ៦៨ឆ្នាំ ស្នើសុំអន្តរាគមន៍មកក្រសួង ដ.ន.ស. ដោយអះអាងថា ខ្លួនជាតំណាងប្រជាពលរដ្ឋចំនួន ១៥០គ្រួសារ ដែលបានកាន់កាប់អាស្រ័យផល និងដាំដុះដំណាំលើទីតាំងដីទំហំសរុប ៥១៣ហិកតា រយៈពេលជាង ១០ឆ្នាំ ស្ថិតនៅភូមិត្បែងលិច ឃុំត្បែង ស្រុកបន្ទាយស្រី ខេត្តសៀមរាប។
ក្រសួងបញ្ជាក់ថា ករណីនេះ ជាការទាមទារដីរដ្ឋ ដែលជាស្ថានីយផ្សព្វផ្សាយ និងស្តារព្រៃឈើតំបន់ទ្រនាប់ភ្នំគូលែន ក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ និងជាដីព្រៃដែលបានដកហូតជាសម្បត្តិរដ្ឋរបស់រដ្ឋបាលខេត្តសៀមរាប។ ទន្ទឹមនេះ រាជរដ្ឋាភិបាលបានចេញអនុក្រឹត្យលេខ ២០៣ អនក្រ.បក ចុះថ្ងៃទី០៧ ខែវិច្ឆិកា ឆ្នាំ២០១២ ស្តីពីការកាត់ដីព្រៃទំហំ ២ ៣៩៨ហិកតា ចេញពីគម្របព្រៃឈើឆ្នាំ២០០២ ទំហំ ១ ១៣៧ហិកតា និងពីព្រៃសម្បទានក្រុមហ៊ុន សំរោងវូឌ ទំហំ ១ ២៦១ហិកតា និងធ្វើអនុបយោគជាដីឯកជនរបស់រដ្ឋ ដើម្បីធ្វើប្រទានកម្មជាកម្មសិទ្ធិជូនប្រជាពលរដ្ឋចំនួន ១ ១៧៨គ្រួសារ ដែលបានកាន់កាប់ ប្រើប្រាស់ និងដាំដុះជាក់ស្តែង លើផ្ទៃដីទំហំ ២ ៣៦២ហិកតា និងទំហំ ៣៦ហិកតា រក្សាទុកជាដីសាធារណៈរបស់រដ្ឋ នៅស្រុកបន្ទាយស្រី ខេត្តសៀមរាប។ តាមរយៈអនុក្រឹត្យនេះ អាជ្ញាធរខេត្តសៀមរាប និងមន្ទីរ ដែនដីនគរូបនីយកម្ម និងសំណង់ ខេត្តសៀមរាប បានចេញបណ្ណកម្មសិទ្ធិជូនប្រជាពលរដ្ឋចំនួន ៤៤១គ្រួសារ នៅភូមិត្បែងលិច ឃុំត្បែង និងជូនប្រជាពលរដ្ឋចំនួន ៧៣៧គ្រួសារ នៅភូមិខ្នារង្វាស ឃុំឃុនរាម រួចរាល់។
ទោះបីជាកន្លងមក រដ្ឋបាលខេត្តសៀមរាបបានចេញលិខិតបដិសេធជូនទៅឈ្មោះ ច័ន្ទ រិទ្ធ ជាច្រើនលើកច្រើនសាររួចហើយក្តី ក៏បុគ្គលរូបនេះនៅតែមិនសហការ ហើយបានបន្តញុះញង់ប្រជាពលរដ្ឋឱ្យទាមទារដីរដ្ឋជាបន្តទៀត និងបានបន្តលើកទឹកចិត្តឱ្យមានការបំផ្លិចបំផ្លាញចម្ការព្រៃឈើដើម្បីទន្ទ្រានកាន់កាប់ដីរដ្ឋដោយខុសច្បាប់ ព្រមទាំងបានស្នើសុំអន្តរាគមន៍ជាបន្តបន្ទាប់ទៅកាន់ក្រសួង-ស្ថាប័ន និងអង្គភាពរដ្ឋដទៃទៀត ឱ្យជួយពិនិត្យ និងដោះស្រាយ ក្នុងចេតនាទុច្ចរិតទាមទារយកដីសាធារណៈរបស់រដ្ឋមកធ្វើជាកម្មសិទ្ធិផ្ទាល់ខ្លួនដោយខុសច្បាប់ ទោះបីជាកន្លងមកពួកគេបានទទួលការដោះស្រាយរួចហើយក៏ដោយ ។
ក្រសួងរៀបចំដែនដី នគរូបនីយកម្ម និងសំណង់ គណៈកម្មការសុរិយោដីថ្នាក់ជាតិ និងអាជ្ញាធរជាតិដោះស្រាយទំនាស់ដីធ្លី សូមថ្លែងអំណរគុណចំពោះបងប្អូនប្រជាពលរដ្ឋដែលតែងតែប្រកាន់ជំហរស្រុះស្រួលគ្នារកដំណោះស្រាយ ក្នុងស្មារតីនៃបរិយាកាសគ្មានវិវាទ ដោយមិនប្រព្រឹត្តសកម្មភាពខុសច្បាប់នានាតាមការញុះញង់របស់ជនខិលខូច និងសូមធ្វើការបដិសេធទាំងស្រុងចំពោះបុគ្គលមួយចំនួនតូច ដែលតែងតែបង្កបញ្ហានិងញុះញង់ប្រជាពលរដ្ឋស្លូតត្រង់ ដើម្បីកេងចំណេញក្នុងគោលបំណងទាញយកផលប្រយោជន៍ផ្ទាល់ខ្លួន និងបង្កចលាចលក្នុងសង្គម។
ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលខេត្តសៀមរាប កំពុងពិនិត្យនីតិវិធីពាក់ព័ន្ធក្នុងការកសាងសំណុំរឿងទៅតុលាការតាមផ្លូវច្បាប់ចំពោះបុគ្គលឈ្មោះ ច័ន្ទ រិទ្ធ និងអ្នកពាក់ព័ន្ធ ដើម្បីបញ្ឈប់សកម្មភាពញុះញង់បងប្អូនប្រជាពលរដ្ឋស្លូតត្រង់ ក្នុងគោលបំណងទាញយកផលប្រយោជន៍ផ្ទាល់ខ្លួន បង្កចលាចល និងបំពុលបរិយាកាសសង្គមពាក់ព័ន្ធនឹងបញ្ហាដីធ្លី ។
Account
Security
Favourite Content