សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំពិនិត្យ ពិភាក្សាជាមួយក្រសួងវប្បធម៌ និងវិចិត្រសិល្បៈ ព្រមទាំងអាជ្ញាធរជាតិអប្សរាអំពីការកំណត់អត្តសញ្ញាណបុរាណដ្ឋានដោយផ្អែកទៅលើទិន្នន័យក៏ដូចជាការចង្អុលបង្ហាញរបស់ក្រសួងវប្បធម៌ និងវិចិត្រសិល្បៈ ។
យោងតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ ក្រោយកិច្ចប្រជុំកាលពីថ្ងៃទី១៣ ខែវិច្ឆិកា ឆ្នាំ២០២៥ បានឱ្យដឹងថា ការកំណត់អត្តសញ្ញាណបុរាណដ្ឋានក្នុងតំបន់អង្គរ ក្រសួងដែនដី និងអ្នកពាក់ព័ន្ធ នឹងកំណត់ទីតាំងបុរាណដ្ឋានទាំងអស់នៅទូទាំងព្រះរាជាណាចក្រកម្ពុជា និងការសម្រេចអំពីការកំណត់ការចុះបញ្ជីដីបុរាណដ្ឋានដើម្បីឈានទៅបញ្ចប់ការចុះបញ្ជីបេតិកភណ្ឌរបស់ព្រះរាជាណាចក្រកម្ពុជាទាំងមូល ក៏ដូចជាក្នុងតំបន់អង្គរ ខេត្តសៀមរាប ដោយប្រើប្រាស់គោលការណ៍ជាក់ស្ដែង និងមានភាពបត់បែនក្នុងគោលដៅបង្កើតគោលការណ៍រួមសម្រាប់សង្គមជាតិដើម្បីដោះស្រាយបញ្ហាសំណង់មិនរៀបរយ និងជួយឱ្យប្រជាពលរដ្ឋមានលំនៅឋានរស់នៅសមរម្យ មានជីវភាពល្អប្រសើរ។
នៅក្នុងកិច្ចប្រជុំនោះ ឯកឧត្តម សាយ សំអាល់ ឧបនាយករដ្ឋមន្រ្តី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ការជួបពិភាក្សាការងារជាមួយលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ រួមនឹងថ្នាក់ដឹកនាំក្រសួង ព្រមទាំងថ្នាក់ដឹកនាំនៃអាជ្ញាធរជាតិអប្សរានាពេលនេះគឺដើម្បីផ្លាស់ប្ដូរមតិយោបល់ប្រមូលធាតុចូល ស្វែងរកការឯកភាពរួមគ្នាលើករណីមួយចំនួននិងសម្រេចជាគោលការណ៍រួមដើម្បីអាចយកទៅអនុវត្តបានប្រកបដោយភាពជាក់លាក់នៅទូទាំងព្រះរាជាណាចក្រកម្ពុជា។
ឯកឧត្តមឧបនាយករដ្ឋមន្ត្រី បានលើកឡើងពាក់ព័ន្ធនឹងការងារដូចជា (១) ការចុះបញ្ជីដីបុរាណដ្ឋាននៅតាមបណ្ដារាជធានីខេត្តទាំង ២៥, (២) បញ្ហាពាក់ព័ន្ធនឹងការសាងសង់ដែលចាត់ទុកថាជាសំណង់ខុសច្បាប់នៅតំបន់អង្គរ, (៣) ឯកសារដែលគួរផ្ញើទៅ គណៈកម្មាធិការបេតិកភណ្ឌពិភពលោក WHC (World Heritage Committee) នាពេលខាងមុខដើម្បីពិភាក្សានិងឯកភាពយោគយល់ពាក់ព័ន្ធតំបន់រមណីយដ្ឋានបេតិកភណ្ឌពិភពលោកអង្គរ, (៤) បញ្ហាពាក់ព័ន្ធដីធ្លីរវាងប្រជាពលរដ្ឋ និងអាជ្ញាធរជាតិអប្សរានៅតំបន់បុរីសណ្ឋាគារអង្គរ ក្រុងសៀមរាប និងបញ្ហាផ្សេងៗ។
ឯកឧត្តមឧបនាយករដ្ឋមន្ត្រី បានបន្ថែមថា ក្នុងកិច្ចប្រជុំនាពេលនេះក៏មានការពិភាក្សាទៅលើ ការកំណត់អត្តសញ្ញាណបុរាណដ្ឋានដោយផ្អែកទៅលើទិន្នន័យក៏ដូចជាការចង្អុលបង្ហាញរបស់ក្រសួងវប្បធម៌និងវិចិត្រសិល្បៈ, ការកំណត់ទីតាំងបុរាណដ្ឋានទាំងអស់នៅទូទាំងព្រះរាជាណាចក្រកម្ពុជា, និងត្រូវសម្រេចអំពីការកំណត់ការចុះបញ្ជីដីបុរាណដ្ឋានដើម្បីឈានទៅបញ្ចប់ការចុះបញ្ជីបេតិកភណ្ឌរបស់ព្រះរាជាណាចក្រកម្ពុជាទាំងមូល ក៏ដូចជាក្នុងតំបន់អង្គរ ខេត្តសៀមរាបដោយប្រើប្រាស់គោលការណ៍ជាក់ស្ដែងនិងមានភាពបត់បែន ក្នុងគោលដៅបង្កើតគោលការណ៍រួមសម្រាប់សង្គមជាតិដើម្បីដោះស្រាយបញ្ហាសំណង់មិនរៀបរយនិងជួយឱ្យប្រជាពលរដ្ឋមានលំនៅឋានរស់នៅសមរម្យនិងមានជីវភាពល្អប្រសើរ៕
Account
Security
Favourite Content