សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ប្លាស្ទិក ជាកាកសំណល់ដែលត្រូវការរយៈពេលយូរដល់ទៅរាប់ពាន់ឆ្នាំដើម្បីរលាយទៅក្នុងដី ឬគេអាចហៅថាជាកាកសំណល់មិនរលាយតែម្ដង ដែលប្រការនេះហើយធ្វើឱ្យវាក្លាយជាបញ្ហាធំមួយដល់បរិស្ថាន និងការរស់នៅរបស់មនុស្ស សត្វ នៅលើភពផែនដី។ ក្នុងនោះ ដោយមើលឃើញពីគុណវិបត្តិជាច្រើនរបស់ប្លាស្ទិក បច្ចុប្បន្ននេះ មានសិប្បកម្មខ្នាតតូចកែច្នៃមួយចំនួនបានប្រមូលទិញ និងកែច្នៃកាកសំណល់ថង់ប្លាស្ទិកឱ្យក្លាយទៅជាសម្ភារៈជ័រដែលអាចប្រើប្រាស់ជាប្រយោជន៍បានយ៉ាងប្រសើរ។
លោក ចាន់ ណារឹទ្ធិ អាយុ៦០ឆ្នាំ មានទីលំនៅក្នុងភូមិស្ពឺ ឃុំជយោ ស្រុកចំការលើ ខេត្តកំពង់ចាម ជាម្ចាស់សិប្បកម្មកែច្នៃកាកសំណល់ប្លាស្ទិកខ្នាតតូចមួយក្នុងចំណោមសិប្បកម្មជាច្រើនទៀតបានប្រមូលទិញថង់ និងការ៉ុងប្លាស្ទិក មកលាងសម្អាត ហើយកិនកម្ទេចដើម្បីក្លាយជាវត្ថុធាតុដើមសម្រាប់យកទៅកែច្នៃផលិតចេញសម្ភារៈប្រើប្រាស់ប្រចាំថ្ងៃ។
លោកបានបញ្ជាក់ថា ៖
“សិប្បកម្មរបស់ខ្ញុំទើបតែបានចាប់ដំណើររយៈពេលជាង ១ឆ្នាំប៉ុណ្ណោះ ពោលគឺនៅក្នុងចន្លោះពេលមានកូវីដ-១៩ ខណៈដែលសំណល់ប្លាស្ទិកដែលកែច្នៃក្នុងតំបន់មិនសូវមានច្រើននោះទេ ហើយមានទីផ្សារល្អគួរសម ណាមួយក៏បានចូលរួមចំណែកក្នុងការកាត់បន្ថយសំរាមបានមួយចំណែកផងដែរ”
លោកបន្តថា ៖
“យើងចាប់ផ្ដើមប្រមូលទិញថង់ប្លាស្ទិកនៅខែមិថុនា ឆ្នាំ២០២២ ដែលយើងដាក់មូយជាមួយក្រុមហ៊ុនទិញតាមផ្សារ តាមគំនរសំរាមតាមភូមិ ដែលគេដឹកមកដល់កន្លែង ហើយតម្លៃទៅតាមហាងឆេងទីផ្សារធម្មតា ដោយយើងទិញក្នុងតម្លៃ ៣៥០រៀល ឬករណីថង់ស្ងួតល្អ អត់មានដីច្រើន យើងទិញក្នុងតម្លៃ ៤០០រៀលក្នុងមួយគីឡូក្រាមផងដែរ”
ពាក់ព័ន្ធទៅនឹងការប្រើប្រាស់ម៉ាស៊ីនកាត់កម្ទេចសំរាមប្លាស្ទិកគឺមានច្រើនដំណាក់កាល ហើយក្រោយពេលកិនរំលាយរួចគឺមានឈ្មួញមកទិញយកទៅច្នៃ និងផលិតជាផលិតផល ឬសម្ភារៈសម្រាប់ប្រើប្រាស់បន្តទៀត។
គួរបញ្ជាក់ដែរថា កាលពីមុនលោក ចាន់ ណារឹទ្ធិ គ្រាន់តែជាម្ចាស់សិប្បកម្មកិនកៅស៊ូ និងសំរាមប្លាស្ទិកខ្នាតតូចមួយប៉ុណ្ណោះ ប៉ុន្តែដោយសារសង្កេតឃើញសំរាមប្លាស្ទិកកើតមានកាន់តែច្រើន លោកក៏សម្រេចចិត្តទៅរៀនបច្ចេកទេសកែច្នៃសំរាមប្លាស្ទិករយៈពេល២ខែបន្ថែមទៀតនៅរាជធានីភ្នំពេញដើម្បីពង្រីកលទ្ធភាពកែច្នៃ។ ជាចុងក្រោយ លោក ចាន់ ណារឹទ្ធិ បានសំណូមពរដល់អ្នកប្រើប្រាស់ប្លាស្ទិក សូមកុំបោះចោលពាសវាលពាសកាល ដែលបងប្អូនអាចប្រមូលទុកដាក់ឱ្យបានត្រឹម ហើយអាចញែកទៅតាមប្រភេទជ័រ ឬប្រភេទប្លាស្ទិក ដែលគេអាចកែច្នៃបន្តទៀតបាន ចៀសវាងការបោះចោល ឬដុតដែលអាចប៉ះពាល់បរិស្ថានកាន់តែខ្លាំង៕
Account
Security
Favourite Content