សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការតាំងពិព័រណ៌ផលិតផលខ្មែរ ជាវេទិកាផ្គូរផ្គងរវាងអ្នកផលិត និងអ្នកទិញ និងការតាំងបង្ហាញផលិតផលក្នុងស្រុក ក្រោមគោលបំណងទទួលបានទីផ្សារសម្រាប់អ្នកផលិតក្នុងស្រុក និងសហគ្រាសធុនមីក្រូ តូច និងមធ្យម នឹងធ្វើឡើងនៅរាជធានីភ្នំពេញ ចាប់ពីថ្ងៃទី១៧-១៩ ខែវិច្ឆិកា ឆ្នាំ២០២៣ ខាងមុខនេះ នៅផ្សារ ម៉ាក្រូ ផ្លូវជាតិលេខ៦ ក្នុងខណ្ឌជ្រោយចង្វារ រាជធានីភ្នំពេញ ។
ឯកឧត្តម បណ្ឌិត សួង ណយ អគ្គលេខាធិការរងគណៈកម្មាធិការជាតិជំរុញចលនាភូមិមួយផលិតផលមួយនៃទីស្ដីការគណៈរដ្ឋមន្ដ្រីបានមានប្រសាសន៍ថា៖
«សម្រាប់ការដាក់តាំងបង្ហាញម្ដងនេះ នឹងរៀបចំឡើងនៅរាជធានីភ្នំពេញផ្ទាល់តែម្ដង ហើយយើងនឹងនាំមកនូវផលិតផលរាប់ពាន់មុខមកបង្ហាញជូនបងប្អូនយើង ដើម្បីត្រៀមរៀបចំពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ ខាងមុខនេះ»។
ឯកឧត្ដមបន្ថែមថា ការរៀបចំនេះក៏មិនខុសពីការដាក់តាំងបង្ហាញពីមុនៗមកដែរ ពោលគឺមានស្តង់ពិព័ណ៌ដាក់តាំងផលិតផលចំនួន ១០០ស្តង់ស្ថិតនៅទីតាំងផ្សារម៉ាក្រូជ្រោយចង្វារ ហើយវាក៏ជាផ្សារភ្ជាប់ទំនាក់ទំនងឱ្យកាន់តែស្អិតល្មួតថែមទៀតរវាងក្រុមអ្នកផលិត និងអតិថិជន ពិសេសអ្នករស់នៅរាជធានីភ្នំពេញ ដើម្បីបង្កើនទំនុកចិត្តទៅលើគុណភាព និងស្តង់ដារផលិតផលក្នុងស្រុក ក៏ដូចជាចូលរួមផ្សព្វផ្សាយផលិតផលខ្មែរឱ្យកាន់តែមានទីផ្សារ ព្រោះការជួយគាំទ្រ ទិញ ប្រើប្រាស់ និងចែកចាយផលិតផលខ្មែរជាសកម្មភាពស្នេហាជាតិ។
ឆ្លៀតក្នុងឱកាសនេះ អ្នកស្រី ម៉ៅ ម៉ារា ប្រធានគ្រប់គ្រងសិប្បកម្ម ម្សៅខ្ញី រមៀត ពន្លៃ សាមគ្គីខសមេធីក SK ដែលជាអ្នកចូលរួមក្នុងការតាំងពិព័រណ៌ផលិតផលខ្មែរនេះបានមានប្រសាសន៍ថា ៖
«រាល់ការតាំងពិព័រណ៌ ទោះបីមិនមែនជាការលក់ដាច់បានច្រើន តែវាជាឱកាសល្អដែលបងប្អូនម្ចាស់អាជីវកម្មយើងគួរយកចិត្តទុកដាក់ក្នុងការរៀបចំ ដាក់តាំងបង្ហាញផលិតផលរបស់យើង ដើម្បីផ្សព្វផ្សាយផលិតផលឱ្យអ្នកដែលចូលមកលេងស្តង់យើងបានដឹង បានឃើញ បានភ្លក្ស និងបានស្គាល់ពីគុណភាពពិតប្រាកដ»។
ជាចុងក្រោយ អ្នកស្រីក៏សូមអំពាវនាវឱ្យបងប្អូនដែលម្ចាស់អាជីវកម្មផលិតផលក្នុងស្រុកចូលរួមការដាក់តាំងបង្ហាញផលិតផលទាំងអស់គ្នា ដើម្បីបង្ហាញពីមុខផលិតផលខ្មែរនៅក្នុងពិធីបុណ្យអុំទូកខាងមុខ ហើយវាក៏ជាឱកាសទទួលបានការគាំទ្រ ដោយអនុញ្ញាតឱ្យអតិថិជនចូលមកសាក តេស្ត៍ នូវផលិតផលក្នុងស្រុកដោយផ្ទាល់ ដោយមិនចាំបាច់ទាល់តែទិញនោះទេ ឱ្យតែបានចូលមកសាក ភ្លក្ស ក៏ដូចជាផ្ដល់នូវមតិយោបល់ដើម្បីកែលម្អផងដែរ ៕
Account
Security
Favourite Content