ភ្នំពេញ ៖ សិប្បកម្មផលិតចំណីអាហារ PPF Yummy Manufacturing ត្រូវបានបង្កើតឡើងក្នុងឆ្នាំ២០២១ និងបានវិវត្តពីអាជីវកម្មលក្ខខណៈគ្រួសារដែលលក់តែតាមប្រព័ន្ធអនឡាញ ទៅជាសហគ្រាសដែលមានសក្តានុពលមួយ។ បច្ចុប្បន្ន ក្រុមហ៊ុនផលិតផលិតផលរួមមានដូចជាម្ហូប អាហារ ដែលអាចទទួលទានបានភ្លាមៗ (ready-to-eat food) ចំនួន៨ មុខ ដូចជា ប្រហុកខ្ទិះ ប្រហុកអង្ក្រង និងបុកត្រីឆ្អើរ ព្រមទាំងផលិតផលសម្រាប់ចម្អិនលាយគ្រឿងជាស្រេច ៩មុខផ្សេងទៀត (ready-to-cook food) ដូចជាឆ្អឹងជំនីប្រឡាក់ សាច់គោចំណិត និងសាច់គោជ្រនួចជាដើម។

ផលិតផលទាំងនេះត្រូវបានដាក់លក់នៅលើទីផ្សារក្នុងស្រុក ផ្សារទំនើបធំៗ និងបណ្តាភោជនីយដ្ឋានមួយចំនួននៅទូទាំងប្រទេស ខណៈដែលក្រុមហ៊ុនដ៏បានធ្វើការនាំចេញផលិតផលរបស់ខ្លួនទៅកាន់ប្រទេសកូរ៉េកាលពីខែឧសភា ឆ្នាំ២០២៤នេះ។

លោក ជា ចិត្រា នាយកគ្រប់គ្រងទូទៅនៃក្រុមហ៊ុន PPF Yummy Manufacturing បានប្រាប់ AMS Economy ថា ៖

“យើងបាននាំចេញផលិតផលចំនួន៥០០ គីឡូក្រាមទៅកាន់ប្រទេសកូរ៉េខាងត្បូងរួចហើយ ខណៈដែលពេលនេះយើងបានត្រៀមសម្រាប់នាំចេញទៅប្រទេសកូរ៉េជាថ្មីម្ដងទៀតក្នុងពេលឆាប់ៗខាងមុខនេះ ហើយក្រៅពីនាំចេញទៅកូរ៉េ កាលពីពេលកន្លងទៅនេះ ក្រុមហ៊ុន PPF Yummy Manufacturing ក៏បាននាំចេញទៅជប៉ុន ស្វីស អាមេរិក អូស្រាលី និងញូវវែលសេឡង់ផងដែរ រួមមានផលិតផលហូបបានភ្លាមៗ ដូចជា បុកកន្ទុយហេសត្រីឆ្អើរ សរុប៧មុខ និងប្រភេទសាច់ប្រឡាក់គ្រឿង៩មុខមាន សាច់មាន់ សាច់ជ្រូក សាច់គោ ជាដើម »។

លោកនាយកគ្រប់គ្រងក្រុមហ៊ុន PPF បានឱ្យដឹងផងដែរថា៖ កាលពីពេលកន្លងទៅនេះ ក្រុមហ៊ុនក៏បានសហការជាមួយក្រុមហ៊ុនសូណាត្រាធ្វើជ្រក់ម្រេចដោយប្រើប្រាស់ម្រេចខ្ចីនៅកំពត ហើយលក់ចេញទៅជប៉ុន។ ក្រៅពីនេះក៏មានធ្វើអំបិលបង្គាលីងគ្រឿងឱ្យក្រុមហ៊ុនផ្សេងមួយទៀតសម្រាប់លក់នៅកម្ពុជា និងធ្វើគ្រឿងផ្សំ (Cooking Paste)  លក់ជាផ្លូវការទៅណូវែលសេឡង់ និងសហរដ្ឋអាមេរិក ចំណែកប្រហុកត្រីរ៉ស់ និងប្រហុកត្រីកំភ្លាញ នាំចេញទៅណូវែលសេឡង់។ បន្ថែមមពីនេះ ក្រៅពីនាំចេញជាផ្លូវការនូវផលិតផលដូចបានលើកឡោះងខាងលើនេះ ក្រុមហ៊ុនក៏បាននាំចេញក្រៅផ្លូវការទៅជាង១០ប្រទេសទៀតតាម DHL ផងដែរ។

សូមរំលឹកដែរថា ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលធ្លាប់បានអញ្ជើញចុះពិនិត្យខ្សែច្រវាក់ផលិតកម្មរោងចក្រក្រុមហ៊ុន PPF Yummy Manufacturing នៅក្នុងខណ្ឌ សែនសុខ រាជធានី ក៏បានលើកទឹកចិត្តឱ្យក្រុមហ៊ុនផលិតចំណីអាហារក្នុងស្រុកមួយនេះ ស្វែងរកអ្នកជំនាញម្ហូបខ្មែរ ដើម្បីលើកកម្ពស់ការកែច្នៃ និងការទទួលស្គាល់ម្ហូបខ្មែរលើឆាកអន្តរជាតិ ដោយនាំយកម្ហូបដែលមានរសជាតិដ៏សម្បូរបែបរបស់កម្ពុជាលក់ជូនដល់អតិថិជនទូទាំងពិភពលោក។

ឯកឧត្តមរដ្ឋមន្ត្រីក៏បានលើកទឹកចិត្តក្រុមហ៊ុនផលិតចំណីអាហារក្នុងស្រុកផ្សេងទៀត ឱ្យផ្តោតលើការលើកកម្ពស់ស្តង់ដារគុណភាព អនាម័យ និងសុវត្ថិភាពចំណីអាហារ ដោយអាចយកគំរូពីសិប្បកម្ម PPF Yummy Manufacturing ។

ឯកឧត្តមរដ្ឋមន្ត្រីក៏បានផ្តល់អនុសាសន៍មួយចំនួនសម្រាប់ការអភិវឌ្ឍរបស់ក្រុមហ៊ុន រួមមានការបន្តលើកកម្ពស់អនាម័យ និងស្តង់ដារ, ការស្រាវជ្រាវ និងប្រៀបធៀបរសជាតិជាមួយផលិតផលរបស់ប្រទេសជិតខាងដើម្បីបង្កើតរស់ជាតិពិសេស, ព្រមទាំងការផ្តោតលើសុខភាព និងបង្ហាញព័ត៌មានអំពីកម្រិតអាហារូបត្ថម្ភលើស្លាកសញ្ញាផលិតផលជាដើម។

ឯកឧត្តមរដ្ឋមន្ត្រីបានមានប្រសាសន៍ថា ៖

«សិប្បកម្ម PPF Yummy Manufacturing ប្រៀបដូចជា “មេដែកធំ” មួយ ដែលមិនត្រឹមតែបង្កើតការងារសម្រាប់បុគ្គលិកជាង៣០នាក់របស់ខ្លួនប៉ុណ្ណោះទេ ប៉ុន្តែក៏សម្រាប់កសិករជាច្រើនដែលផ្គត់ផ្គង់វត្ថុធាតុដើមដល់ក្រុមហ៊ុននេះផងដែរ»។

ឯកឧត្តមបានលើកទឹកចិត្តក្រុមហ៊ុនឱ្យសហការជាមួយស្ថាប័នស្រាវជ្រាវ ដូចជា មន្ទីរពិសោធន៍ និងសាកលវិទ្យាល័យ ដើម្បីធ្វើការស្រាវជ្រាវ និងអភិវឌ្ឍន៍លើមុខផលិតផល និងពង្រីកបច្ចេកវិទ្យាចំណីអាហារថ្មីៗបន្ថែមទៀត៕