បរទេស ៖ យោងតាមប្រភពពី Weforum បានលើកឡើងថា ស្វីស ​បាន​ជាប់​ឈ្មោះ​ជា​ប្រទេស​ដែល​មាន​ទេពកោសល្យ​ប្រកួត​ប្រជែង​ជាង​គេ​ក្នុង​ពិភពលោក​នៅឆ្នាំ២០២៣ ក្នុងនាមជាប្រទេសដែលផ្តល់គុណភាពខ្ពស់នៃជីវិត ប្រព័ន្ធអប់រំខ្ពស់ និងឱកាសការងារ។

គុណភាព​ជីវិត​ខ្ពស់​ក្នុង​ប្រទេស​ស្វីស​រក្សា​បាន​នូវ​ភាពជាប្រទេសដែលសម្បូរទៅដោយមនុស្សមានទេពកោសល្យ​កំពូលមួយនៅក្នុងពិភពលោក ជាមួយនឹងលក្ខណៈនៃប្រទេសដែលសម្បូរទៅដោយធម្មជាតិ។ ក្នុងរយៈពេលប៉ុន្មានទសវត្សរ៍កន្លងមកនេះ កិច្ចខិតខំប្រឹងប្រែងរបស់រដ្ឋាភិបាលស្ចីសធានាបាននូវការអភិវឌ្ឍន៍សេដ្ឋកិច្ចរបស់ប្រទេសឲ្យសមស្របជាមួយនឹងការអភិរក្សបរិស្ថាន និងការប្តេជ្ញាចិត្តចំពោះនិរន្តរភាព។ បន្ថែមពីនេះ លក្ខណៈពិសេសដូចជា ស្ថិរភាពនយោបាយ ភាពច្បាស់លាស់ផ្នែកច្បាប់ ការប្រកាន់ខ្ជាប់នូវការការពារកម្មសិទ្ធិបញ្ញា និងគោលការណ៍ទីផ្សារសេរី បានទាក់ទាញទាំងអ្នកវិនិយោគបរទេស និងអ្នកដែលមានទេពកោសល្យកំពូលៗមកពីជុំវិញពិភពលោក។ ក្រុមហ៊ុនសកលនានាបានបង្ហញាវត្តមានរបស់ពួកគេនៅទីនោះ ខណៈដែលក្រុមអ្នកជំនាញជាច្រើនបានអភិវឌ្ឍបន្ថែមនូវសមត្ថភាពរបស់ខ្លួន ដែលបានរួមចំណែកដល់សង្គមស្វីស និងអឺរ៉ុបទាំងមូល។ សម្រាប់ធុរកិច្ចក្នុងស្រុក ការនាំចេញដ៏រឹងមាំរបស់ប្រទេសគឺជាកត្តាជំរុញសម្រាប់ការច្នៃប្រឌិត និងធានាបាននូវភាពប្រកួតប្រជែងរបស់ពួកគេទូទាំងពិភពលោក។

មិនត្រឹមតែប៉ុណ្ណោះ យុទ្ធសាស្ត្រមួយនៃគោលនយោបាយស្វីសគឺការវិនិយោគ និងបណ្តុះទេពកោសល្យនាពេលអនាគត។ សេដ្ឋកិច្ចស្វីសមានស្ថិរភាពដែលធ្វើឲ្យលទ្ធភាពទទួលបានការថែទាំវេជ្ជសាស្រ្តប្រកបដោយប្រសិទ្ធភាព ​ប្រព័ន្ធ​អប់រំ​លំដាប់​ពិភពលោក ​និង​ការ​ធានា​រ៉ាប់រង​សុខភាព​។ បន្ថែមពីលើការយកចិត្តទុកដាក់លើនិរន្តរភាព ប្រជាជនស្វីសក៏មានការប្រុងប្រយ័ត្នខ្ពស់ចំពោះតុល្យភាពការងារ និងជីវិត ដើម្បីឱ្យមានតម្លៃពេលវេលាផ្ទាល់ខ្លួនរបស់ពួកគេ។ ដូច្នោះហើយ ពួកគេមានលក្ខខណ្ឌដ៏ល្អសម្រាប់អាជីព និងការពេញចិត្តក្នុងជីវិតរបស់ពួកគេ។

លើសពីនេះទៅទៀត ក្មេងៗដែលធំធាត់ឡើងនៅទីនោះអាចទទួលបានការអប់រំប្រកបដោយគុណភាពខ្ពស់តាំងពីឈានជើងចូលសាលារៀន ដែលអនុញ្ញាតឱ្យពួកគេរីកចម្រើនអាស្រ័យលើទេពកោសល្យរបស់ពួកគេម្នាក់ៗសម្រាប់ពេលអនាគត។ នៅពេលពួកគេមានអាយុប្រហែល ១២ ឆ្នាំ ពួកគេអាចជ្រើសរើសដាក់ពាក្យផ្នែកអត្តពលិក ឬ Gymi ដែលជាផ្លូវទៅកាន់មធ្យមសិក្សា និងធ្វើឲ្យសិស្សត្រៀមខ្លួនសម្រាប់សាកលវិទ្យាល័យ ហើយជម្រើសមួយទៀតគឺការអប់រំ និងបណ្តុះបណ្តាលវិជ្ជាជីវៈពិសេស (VET)។ វិធីសាស្រ្តទាំងពីរគឺល្អសម្រាប់ការអភិវឌ្ឍទេពកោសល្យវ័យក្មេង។ ស្របពេលដែល Gymi ផ្តោតលើកម្លាំងរាងកាយ VET គឺជាប្រព័ន្ធសិក្សាពីរផ្លូវដែលរួមបញ្ចូលនូវការរៀននៅថ្នាក់ និងកម្មសិក្សានៅពេលសិស្សមានអាយុ ១៤ ឆ្នាំ។ នៅអាយុ ១៥ ឆ្នាំ ពួកគេអាចសម្រេចចិត្តធ្វើកម្មសិក្សាពេញម៉ោង សម្រាប់ការបណ្តុះបណ្តាលលើការងារ និងការសិក្សាទ្រឹស្តីនៅសាលាវិជ្ជាជីវៈ។ វាគឺការជំរុញដ៏លឿនមួយដល់មនុស្សវ័យក្មេងអាចចូលទៅក្នុងកម្លាំងការងារបានកាន់តែងាយស្រួល ហើយពួកគេនៅតែអាចទៅរៀននៅសាកលវិទ្យាល័យ ៣ ឬ ៤ ឆ្នាំក្រោយ។

ទន្ទឹមនឹងនេះដែរ ស្វីស មានជម្រើសនៃសាកលវិទ្យាល័យជាច្រើន និងសាកលវិទ្យាល័យលំដាប់ថ្នាក់ពិភពលោក រួមមាន ETH និង EPFL ក៏ដូចជាស្ថាប័នស្រាវជ្រាវផងដែរ។ ការផ្តោតសំខាន់ខ្លាំងលើមុខវិជ្ជាដែលទាក់ទងនឹងវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ជួយឲ្យស្វីសបណ្តុះបណ្តាលបាននូវអ្នកជំនាញដែលមានជំនាញខ្ពស់។ នៅពេលដែលពួកគេបញ្ចប់ការសិក្សា យុវជនចូលទៅក្នុងទីផ្សារការងារដែលមាននូវហេដ្ឋារចនាសម្ព័ន្ធរឹងមាំ និងការយកចិត្តទុកដាក់ជារួមរបស់រដ្ឋាភិបាលស្វីសចំពោះការច្នៃប្រឌិត និងការស្រាវជ្រាវជាទូទៅ។ ការវិនិយោគលើការស្រាវជ្រាវ និងការអភិវឌ្ឍន៍ (R&D) ត្រូវបានគេផ្តល់អាទិភាពខ្ពស់ ដោយសារវាជំរុញដល់ការបង្កើតថ្មី ការច្នៃប្រឌិត និងការសហការរីកចម្រើន។

មួយវិញទៀតនោះ គឺកិច្ចសហប្រតិបត្តិការរវាងឧស្សាហកម្ម និងការសិក្សាត្រូវបានលើកទឹកចិត្តយ៉ាងទូលំទូលាយរវាងអ្នកសិក្សា និងឧស្សាហកម្មមិនថាក្រុមហ៊ុនធំៗ ឬអាជីវកម្ម start-up នោះទេ។ ជាឧទាហរណ៍ និស្សិតថ្នាក់អនុបណ្ឌិត និងបណ្ឌិតអាចទទួលបានសញ្ញាបត្រតាមរយៈប្រព័ន្ធសិក្សា-ឧស្សាហកម្មរួមគ្នានេះ តាមរយៈកម្មវិធីដែលផ្តល់ដោយស្ថាប័នស្រាវជ្រាវដូចជា IBM Research និងកម្មវិធីសិក្សាផ្សេងៗទៀត។ និស្សិតទាំងនោះអាចឈានជើងចូលទៅក្នុងការស្រាវជ្រាវនៃអង្គការឧស្សាហកម្មណាមួយ ដែលជាផ្លូវសម្រាប់ពួកគេទៅកាន់មុខតំណែងណាមួយនៅក្នុងក្រុមហ៊ុន បន្ទាប់ពីពួកគេបញ្ចប់ការសិក្សា។ កម្មវិធីបែបនេះជួយពង្រឹងសមត្ថភាពរបស់និស្សិតដែលមានជំនាញ និងអ្នកសិក្សា ឬ បុគ្គលិកមកពីបរទេសផងដែរ។

Zurich Lab ដែលជាផ្នែកមួយនៃ IBM Research បានបណ្តុះបណ្តាលយុវជនរាប់ពាន់នាក់តាមរយៈភាពជាដៃគូជាមួយសាកលវិទ្យាល័យក្នុងស្រុក​ ហើយមនុស្សជាច្រើនបានឈ្នះពានរង្វាន់ និងដឹកនាំគម្រោងលើបច្ចេកវិទ្យាឈានមុខគេ។ ស្ទើរតែរៀងរាល់ឆ្នាំ យុវជនម្នាក់ ឬច្រើននាក់នៅមន្ទីរពិសោធន៍ តែងតែទទួលបានការតែងតាំងសម្រាប់ពានរង្វាន់ “35 under 35 Innovators Award” ដ៏ល្បីល្បាញរបស់ MIT ។ Alain Vaucher អ្នកគីមីវិទ្យាបានបង្កើតប្រព័ន្ធ AI ដែលដាក់បញ្ចូលគ្នានូវរូបមន្តគីមីសម្រាប់ម៉ូលេគុលបានឈ្នះពានរង្វាន់នៅឆ្នាំ២០២២ ។

ទេពកោសល្យដ៏ខ្លាំងខ្លាទាំងនេះមិនត្រឹមតែរួមចំណែកនៅក្នុងប្រទេសស្វីសប៉ុណ្ណោះទេ ប៉ុន្តែនៅទូទៅអឺរ៉ុបផងដែរ ហើយ​វា​ជំរុញ​ឱ្យ​ក្រុមហ៊ុន​សកល​ជាច្រើន​មក​កាន់ប្រទេស​នេះ។ បន្ថែមពីនេះ អ្នកជំនាញមានសមត្ថភាពខ្ពស់ជាច្រើនបានមកប្រទេសស្វីស ដោយពួកគេពេញចិត្តចំពោះតុល្យភាពជីវិត និងការងារដ៏អស្ចារ្យដែលវប្បធម៌ស្វីសផ្តល់ជូន។ ជាលទ្ធផល ពួកគេបានរួមចំណែកដល់ស្វីសក្នុងការបន្តឈរជើងជាអ្នកដឹកនាំក្នុងការទាក់ទាញជនបរទេស ការវិនិយោគ និងអភិវឌ្ឍ ការច្នៃប្រឌិត និងសម្បូរទៅដោយមនុស្សមានទេពកោសល្យ៕