ភ្នំពេញ ៖ បច្ចុប្បន្ននេះ អាជីវកម្មដែលផ្ដល់ផលប្រយោជន៍ចូលទៅក្នុងសង្គម គឺតែងទទួលបានការលើកទឹកចិត្តពីរាជរដ្ឋាភិបាល និងពីអ្នកពាក់ព័ន្ធផ្សេងទៀត។ ការធ្វើអាជីវកម្មរបៀបនេះគឺជាគំរូអាជីវកម្មថ្មីមួយដែលត្រូវបានប្រើប្រាស់យ៉ាងទូលំទូលាយ សំដៅជំរុញសេដ្ឋកិច្ចឱ្យកាន់តែរីកចម្រើន។

ជាក់ស្ដែង ថ្មីៗនេះ កម្មវិធីនៃគម្រោងពន្លឿនការប្រើប្រាស់ឌីជីថល់ដល់សហគ្រាសធុនមីក្រូ តូច និងមធ្យម សម្រាប់សេដ្ឋកិច្ចឌីជីថល និងយុទ្ធនាការធុរកិច្ចបរិយាបន្ន ត្រូវបានប្រារព្វឡើងក្រោមកា​រ​ចូលរួម​ពីសំណាក់សហគ្រិនវ័យក្មេង និងម្ចាស់អាជីវកម្មសរុបជិត៣០០នាក់ក្រោមអធិបតីភាព​របស់ឯកឧត្តម បណ្ឌិត ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងវាគ្មិនជំនាញផ្នែកធុរកិច្ចជាច្រើននាក់ទៀត។ 

ក្នុងឱកាសចូលរួមជាវាគ្មិនកិត្តិយសក្នុងកម្មវិធីខាងលើ លោកស្រី ចៅ លន់មូលីកា អគ្គនាយិការក្រុម​ហ៊ុន Cambodian Standard Development and Supply (CSDS) បានឱ្យដឹងថា កន្លងមក អាជីវកម្ម​របស់លោកស្រីបានរួមចំណែកជួយដល់សង្គមក្នុងរូបភាពជាច្រើន។

បង្កើតឡើងតាំងតែពីឆ្នាំ ២០០៩ អាជីវកម្មរបស់អ្នកស្រីបានជួយរកទីផ្សារជូនកសិករ តាមរយៈការចុះកិច្ចសន្យារកសិកម្ម និងជួយពង្រឹងចំណេះដឹងសាធារណៈជនអំពីសុវត្ថិភាពចំណីអាហារផងដែរ។

បើតាមលោកស្រី ចៅ លន់មូលីកា អាជីវកម្មរបស់លោកស្រី គឺជាអាជីវកម្មបរិយាបន្ន ដោយបាន​គោរព​តាម​គោល​ការណ៍តម្រូវគឺត្រូវមានចំណូលយ៉ាងហោចណាស់៤០% ដើម្បីធានាថាអាជីវកម្ម មាននិរន្តរភាពជាង ៤០% នៃអាជីវកម្មបានរួមចំណែកជួយដល់ប្រជាជនដែលមានចំណូលទាប និងជាង ១០% ទៀតជាអាជីវកម្មប្រកបទៅដោយភាពច្នៃប្រតិដ្ឋ។

នាយិការក្រុមហ៊ុនរូបនេះបានបន្តឱ្យដឹងទៀតថា៖

«រយៈពេល១៥ឆ្នាំមកនេះ យើងនៅតែផ្សារភ្ជាប់ជា មួយចក្ខុវិស័យដែលចង់ជំរុញឱ្យកសិករដាំដុះនូវដំណាំសុវត្ថិភាព ហើយអាចមានលទ្ធភាពផ្គត់ផ្គង់ទី ផ្សារក្នុងស្រុកបាន។»

យ៉ាងណាមិញ អាជីវកម្មរបស់លោកស្រីបានជាប់ជ័យលាភីជាអាជីវកម្មបរិយាបន្នកាលពីឆ្នាំ២០២២ កន្លងទៅ ដោយបានបំពេញតាមលក្ខខណ្ឌជាអាជីវកម្មដែលមានស្តង់ដារ។

សម្រាប់លោកស្រី ការក្លាយខ្លួនជាអាជីវកម្មបរិយាបន្ននេះជាជំហានដ៏សំខាន់មួយក្នុងការបន្តពង្រីក ខ្លួន ជាពិសេសបន្តជួយដល់ប្រជាកសិករក្នុងស្រុកបានកាន់តែច្រើនថែមទៀត។ ដើម្បីសម្រេចបាននូវចក្ខុវិស័យនេះ បច្ចុប្បន្នក្រុមហ៊ុនរបស់លោកស្រីបានធ្វើការជាមួយកសិករ ប្រមាណជា ១៣០០នាក់ និងបានចុះកុងត្រាជាមួយ ៣២សហគ្រាស។ លើសពីនោះទៅទៀត លោកស្រីបាននិងកំពុងអប់រំ ក៏ដូចជាបណ្ដុះបណ្ដាលកសិករឱ្យក្លាយទៅជាអ្នកដាំដុះដំណាំ សុវត្ថិភាព និងព្យាយាមផ្សព្វផ្សាយពីសុវត្ថិភាពចំណីអាហារទៅកាន់អ្នកបរិភោគ។

អ្វីដែលលោកស្រីកំពុងធ្វើបច្ចុប្បន្ននេះផងដែរ គឺជាការត្រៀមខ្លួនមួយ ដើម្បីនាំយកកសិផលសុវត្ថិ ភាពរបស់កម្ពុជា ចេញទៅកាន់ទីផ្សារអន្តរជាតិថែមទៀត។

គួរបញ្ជាក់ថា អាជីវកម្មបរិយាប័ន្ន (Inclusive Business – IB) គឺជាអាជីវកម្មឈរលើគោលការណ៍​ធុរកិច្ច ដែលផ្តល់ភាពច្នៃប្រឌិត និងដំណោះស្រាយជាប្រព័ន្ធ ដើម្បីឆ្លើយតបទៅនឹងបញ្ហាប្រឈម​ចាំបាច់របស់ប្រជាជនក្រីក្រ និងប្រជាជនដែលមានចំណូលទាប។

អាជីវកម្មបរិយាប័ន្នជាប្រភេទអាជីវកម្ម ដែលផ្តល់ប្រយោជន៍ដល់ប្រជាជនក្រីក្រ និងម្ចាស់អាជីវកម្ម ក៏ដូចជាគុណតម្លៃនៃការអភិវឌ្ឍចំពោះរដ្ឋាភិបាល និងសង្គម (ឈ្នះ-ឈ្នះ-ឈ្នះ)។ នេះបើយោងតាម ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍៕