សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើម្បីស្វែងរកបញ្ហាប្រឈម និងដំណោះស្រាយរបស់អ្នកអភិវឌ្ឍន៍វិស័យសំណង់ និងអចលនទ្រព្យ ក្រសួងរៀបចំដែនដី នគរូបនីយកម្ម និងសំណង់ បានរៀបចំនូវកិច្ចប្រជុំពិសេសមួយ ក្រោមអធិបតីភាពឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី២២ ខែកក្កដា ២០២៤ នាទីស្ដីការក្រសួង ។
នៅក្នុងកិច្ចប្រជុំនេះ តំណាងវិស័យឯកជនផ្នែកសំណង់ និងអចលនទ្រព្យបានបង្ហាញពីបញ្ហាប្រឈមដែលលបានជួបប្រទះនាពេលកន្លងទៅ ក៏ដូចជាក្នុងពេលបច្ចុប្បន្ន ជម្រាបជូនទៅកាន់ឯកឧត្តម ឧបនាយករដ្ឋមន្ត្រី ដើម្បីពិភាក្សា និងស្វែងរកដំណោះស្រាយ ក៏ដូចជាស្នើសុំអន្តរាគមន៍ពីសំណាក់ឯកឧត្តមឧបនាយករដ្ឋមន្ត្រីដោយផ្ទាល់។
ជាការឆ្លើយតប ឯកឧត្តឧបនាយករដ្ឋមន្ត្រី សាយ សំអាល់ បានផ្ដល់នូវដំណោះស្រាយខ្លះៗជូនអង្គពិធី និងជម្រាបជូនលោកអ្នកឧកញ៉ា អ្នកឧកញ៉ា ឧកញ៉ា និងដែលជាអ្នកអភិវឌ្ឍន៍ផ្នែកសំណង់ និងអចលនទ្រព្យ តាមរយៈការអនុវត្តតាមវិធីសាស្ត្រសំខាន់ៗដែលពាក់ព័ន្ធមួយចំនួន ។
នៅក្នុងអង្គពិធីនោះដែរ ឯកឧត្តម តាន់ មុនីវណ្ណ តំណាងវិស័យឯកជន បានកោតសរសើរចំពោះសកម្មភាព និងលទ្ធផលការងាររបស់ក្រសួងរៀបចំដែនដី នគរូបនីយកម្ម និងសំណង់ រយៈពេលជិត១ឆ្នាំកន្លងមកនេះ ពោល គឺចាប់តាំងពីកកើតឡើងនូវរាជរដ្ឋាភិបាលអាណត្តិថ្មីទី៧ ។ ក្នុងនោះដែរឯកឧត្តមក៏បានស្នើសុំកិច្ចសហការបន្ថែមទៀតជាមួយក្រសួងរៀបចំដែនដី នគរូបនីយកម្ម និងសំណង់ ដើម្បីឱ្យកិច្ចការវិនិយោគកាន់តែមានភាពងាយស្រួលបន្ថែមទៀត ។
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី បានទទួលយកសំណើរបស់វិស័យឯកជនដើម្បីពិចារណា និងសិក្សាបន្ថែម ជាមួយនឹងជំរុញឱ្យក្រុមការងាររបស់ក្រសួង និងវិស័យឯកជន រៀបចំនូវជំនួបពិភាក្សានេះឱ្យបាន ៣ ទៅ ៤ដងក្នុងមួយឆ្នាំ ឬយ៉ាងហោចណាស់ ៣ខែម្ដង ដើម្បីស្វែងរកបញ្ហា និងដំណោះស្រាយនានា ក្នុងគោលដៅជំរុញការអភិវឌ្ឍលើវិស័យដីធ្លី អចលនទ្រព្យ និងសំណង់ ។
គួរបញ្ជាក់ថា នៅក្នុងកិច្ចប្រជុំនោះដែរ ក្រសួងរៀបចំដែនដី នគរូបនីយកម្ម និងសំណង់ ក៏បានបង្ហាញនូវបទដ្ឋានគតិយុត្តមួយចំនួនរបស់ក្រសួង និងវឌ្ឍនភាពនៃការចុះបញ្ជីដីធ្លីបង្ហើយជូនដល់អ្នកចូលរួមក៏ដូចជាផែនការសកម្មភាពរបស់ក្រសួងដែលនឹងត្រូវអនុវត្តបន្តនៅក្នុងឆមាសទី២ និងឆ្នាំបន្តបន្ទាប់ទៀត ៕
Account
Security
Favourite Content