សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមរយៈកម្មវិធីពិសេសជំរុញការវិនិយោគខេត្តព្រះសីហនុរបស់រាជរដ្ឋាភិបាលដែលបានប្រកាសឱ្យអនុវត្តន៍នៅដើមឆ្នាំ២០២៤ និងបន្តដល់ដំណាច់ឆ្នាំ២០២៥នេះឃើញថា មានគម្រោងជាច្រើនចាប់ផ្ដើមបណ្ដាក់ទុនវិនិយោគបន្តនៅខេត្តព្រះសីហនុ ដោយក្នុងនោះគម្រោងអគារជាប់គាំងប្រមាណជាង១២០គម្រោងក៏បានដំណើរការឡើងវិញផងដែរ ។
យោងតាមប្រសាសន៍ឯកឧត្តម ឡុង ឌីម៉ង់ អភិបាលរងខេត្ត និងជាអ្នកនាំពាក្យរដ្ឋបាលខេត្តព្រះសីហនុ បានមានប្រសាសន៍ថា តាមរយៈកម្មវិធីជំរុញការវិនិយោគខេត្តព្រះសីហនុរបស់រដ្ឋាភិបាលដែលបានដាក់ចេញតាំងពីដើមឆ្នាំ២០២៤មកឃើញថា មានគម្រោងជាង២៣០គម្រោងហើយបានទទួលការលើកទឹកចិត្ត និងបណ្ដាក់ទុនវិនិយោគដែលគិតជាទឹកប្រាក់ប្រមាណ ៦ពាន់លានដុល្លារអាមេរិក ។
ឯកឧត្តមបន្តថា ក្នុងចំណោមគម្រោងដែលត្រូវបានរាជរដ្ឋាភិបាលផ្ដល់ការលើកទឹកចិត្តឱ្យវិនិយោគនៅក្នុងខេត្តព្រះសីហនុ មានគម្រោងអគារជាប់គាំងប្រមាណជា ១២០គម្រោង ដោយខ្លះចាប់ផ្ដើមសាងសង់បន្ត ខ្លះទៀតក៏បានសាងសង់រួច និងខ្លះទៀតកំពុងត្រៀមខ្លួនដាក់ឱ្យដំណើរការប្រតិបត្តិការ ដូច្នេះ ការលើកទឹកចិត្តបន្ថែមចំពោះពន្ធអចលនទ្រព្យ និងពន្ធផ្សេងៗទៀត ដែលជាគោលការរបស់រាជរដ្ឋាភិបាល នឹងចូលរួមចំណែកលើកទឹកចិត្តជាច្រើនដល់អ្នកវិនិយោគ ម្ចាស់គម្រោង ម្ចាស់អគារ ម្ចាស់ទីតាំងជាដើម ដើម្បីឱ្យពួកគាត់មានឱកាសស្វែងរកដៃគូមកវិនិយោគនៅខេត្តព្រះសីហនុបន្ថែម ។
ឯកឧត្តមបន្ថែមថា ៖
«ដើមឡើយ គម្រោងអគារជាប់គាំងនៅក្នុងព្រះសីហនុមានចំនួន៣៦៥គម្រោង ប៉ុន្តែមកដល់ពេលនេះ បានដោះស្រាយប្រមាណ ១២០គម្រោងហើយ ដោយរំពឹងថាគម្រោងអគារជាប់គាំងដទៃទៀតនឹងត្រូវបានដោះស្រាយតាមរយៈកម្មវិធីជំរុញការវិនិយោគខេត្តព្រះសីហនុ និងការលើកទឹកចិត្តបន្ថែមចំពោះផ្នែកពន្ធរបស់រាជរដ្ឋាភិបាល។ ម្យ៉ាងទៀត ការដំណើរការឡើងវិញនូវអគារជាប់គាំងនៅក្នុងខេត្តព្រះសីហនុនេះដែឬ ក៏នឹងជួយលើកមុខមាត់ខេត្ត ក៏ដូចជាសោភណ្ឌភាពនៃទីក្រុងក្នុងខេត្តព្រះសីហនុ ដែលជាការទាក់ទាញទេសចរ ក៏ដូចជាវិនិយោគចូលមកបណ្ដាក់ទុនវិនិយោគបន្ថែម»។
អ្នកជំនាញនៃវិស័យអចលនទ្រព្យប្រចាំខេត្តព្រះសីហនុ បានលើកឡើងថា តាមរយៈកម្មវិធីជំរុញការវិនិយោគពិសេសនៅក្នុងខេត្តព្រះសីហនុ ឃើញថាមានគម្រោងអគារជាប់គាំងកន្លងមកជាច្រើន បានចាប់ផ្ដើមដំណើរការសាងសង់និងធ្វើប្រតិបត្តិការឡើងវិញ ដោយរំពឹងថាឆាប់ៗអគារជាប់គាំងទាំងអស់នឹងត្រូវបានដោះស្រាយហើយ មានសកម្មភាពប្រតិបត្តិការ ។
បើតាមប្រសាសន៍សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសសម្ពោធដាក់ឱ្យប្រើប្រាស់ជាផ្លូវការ ផ្លូវចំនួន៣ខ្សែ កាលពីថ្ងៃទី២៩ មេសា ២០២៥កន្លងទៅនេះបានបញ្ជាក់ថា រាជរដ្ឋាភិបាលបានយកចិត្តទុកដាក់លើអភិវឌ្ឍន៍ក្នុងតំបន់ឆ្នេរនៃព្រះរាជាណាចក្រកម្ពុជា ដោយខេត្តព្រះសីហនុ ជាខេត្តដែលមានសន្ទុះ វិនិយោគខ្លាំងជាងគេ ក្នុងចំណោមខេត្តជាប់ឆ្នេរសមុទ្រកម្ពុជា ។ ក្រៅពីនេះ ខេត្តកំពតនិងកែប ក៏កំពុងមានសក្ដានុពលក្នុងការទាក់ទាញវិនិយោគិន ដើម្បីវិនិយោគលើវិស័យឧស្សាហកម្ម ដោយក្នុងនោះសម្ដេចធិបតីបានបញ្ជាក់សម្ដេចបានចុះហត្ថលេខាលើការគម្រោងតំបន់សេដ្ឋកិច្ចពិសេសមួយចំនួន រួចហើយនៅក្នុងខេត្តកំពត និងមានគម្រោងធំមួយមានទុនវិនិយោគរាប់ពាន់លានដុល្លារអាមេរិក ត្រៀមបណ្ដាក់ទុននៅក្នុងខេត្តកំពតផងដែរ ៕
Account
Security
Favourite Content