សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ស្ងាត់មួយរយៈធំ ស្ថាបនិក Facebook និងជាប្រធានប្រតិបត្តិក្រុមហ៊ុន Meta លោក Mark Zuckerberg កំពុងសម្ងំរៀបចំមន្ទីរពិសោធដ៏សំងាត់មួយដើម្បីអភិវឌ្ឍបច្ចេកវិទ្យាលើសពី AI នាពេលបច្ចុប្បន្នដែលអាចមានសមត្ថភាពគិត និងមានទំនាក់ទំនងដូចទៅនឹងមនុស្សពិតៗ។
ដកស្រង់ចេញពីកាសែត The Bloomberg នៅសប្តាហ៍នេះបានសរសេរថា បុរសមហាសេដ្ឋីពាន់លានដុល្លាររូបនេះបានចំណាយពេលផ្ទាល់ខ្លួនដើម្បីសម្រេចតាមផែនការនៃការអភិវឌ្ឍបច្ចេកវិទ្យាកំពូលថ្មីមួយទៀតលើសពី AI ដែលគេស្គាល់ថាជា Human-Level Artificial Intelligence (HLAI) ឬ Artificial General Intelligence (AGI)។ បច្ចេកវិទ្យានេះសំដៅលើការអភិវឌ្ឍបច្ចេកវិទ្យាដែលអាចឲ្យ AI មានការគិត និងការទំនាក់ទំនងឲ្យស្មើទៅនឹងកម្រិតដែលមនុស្សលោកអាចធ្វើបាន។
ប្រភពដែលជិតស្និទ្ធទៅនឹងគម្រោងការអស្ចារ្យនេះបានប្រាប់ដែរថា បច្ចុប្បន្ន លោក Zuckerberg កំពុងជ្រើសរើសក្រុមការងារផ្នែកស្រាវជ្រាវ និងវិស្វករព័ត៌មានវិទ្យាខ្លាំងៗដោយផ្ទាល់ ហើយលោកនឹងបង្កើតក្រុមការងារមួយដែលមានសមាជិកប្រមាណ ៥០នាក់ រួមទាំងប្រធានផ្នែកស្រាវជ្រាវ AI ម្នាក់ផង។
មន្ទីរពិសោធថ្មីនេះត្រូវបានគេដឹងថា នឹងត្រូវរៀបចំឡើងនៅក្នុងទីតាំងអគារស្នាក់ការកណ្តាលនៃក្រុមហ៊ុន Meta នៅសួន Mento Park ។ ដូច្នេះ ក្រុមការងារនឹងអាចធ្វើការយ៉ាងកៀកបំផុតជាមួយនឹងលោក Zuckerberg តែម្តង។ ជាមួយគ្នានេះ គេក៏សង្កេតឃើញដែរថា ផែនការសំងាត់ចុងក្រោយនេះត្រូវបានរៀបចំឡើងក្រោយពេលដែលគម្រោងការ Llama 4 ដែលទើបតែបានអភិវឌ្ឍរួចរាល់ដោយក្រុមការងារ Meta នោះ នៅមិនទាន់ពេញចិត្តលោក Zuckerberg ដូចទៅនឹងការរំពឹងទុកនៅឡើយនោះទេ ខណៈដែលប្រធានប្រតិបត្តិរូបនេះទាមទារឲ្យ Meta អាចបង្ហាញបច្ចេកវិទ្យា AI យ៉ាងដ៏អស្ចារ្យថ្មីមួយទៀតនៅត្រឹមចុងឆ្នាំនេះ។
សូមរំលឹកដែរថា នៅក្នុងសេចក្តីប្រកាសមួយរបស់ក្រុមហ៊ុនទៅកាន់និយោជិតកាលពីដើមឆ្នាំនេះ លោក Zuckerberg បានព្រមានថា ការងាររាប់ពាន់ទៀតអាចត្រូវបានកាត់បន្ថយនៅឆ្នាំ២០២៥ ដែលជាផ្នែកមួយនៃការបញ្ឈប់ការងារប្រចាំឆ្នាំ។ ក្នុងន័យនេះគេជឿជាក់ថា ជាមួយនឹងបច្ចេកវិទ្យា AI បច្ចុប្បន្ននេះ ក្រៅពីក្លាយទៅជាការងារស្នូលនៃយុទ្ធសាស្ត្ររបស់ក្រុមហ៊ុនហើយនោះ សម្រាប់មន្ទីរពិសោធន៍សំងាត់ថ្មីនេះគឺជាហេតុផលនៃការផ្លាស់ប្តូរដ៏សំខាន់នៅក្នុងទិសដៅដែលស្ថិតនៅពីក្រោយការបញ្ឈប់ការងាររាប់ពាន់របស់ Meta លើកនេះ៕
Account
Security
Favourite Content