សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ផ្លែឈើចម្រុះមុខ និងផលិតផលខ្មែរជាច្រើនមុខ នឹងត្រូវដាក់តាំងបង្ហាញនៅក្នុងព្រឹត្តិការណ៍ផ្លែឈើបាត់ដំបង (Battambang Fruits Event 2025) ដែលនឹងចាប់ផ្តើមពីថ្ងៃទី២៧ ខែមិថុនា ដល់ថ្ងៃទី៣ ខែកក្កដា ឆ្នាំ២០២៥ នៅបរិវេណមុខសាលាខេត្តបាត់ដំបង។
ការរៀបចំឱ្យមានព្រឹត្តិការណ៍នេះក្នុងគោលបំណងបង្ហាញអំពីទិន្នផលផ្លែឈើខ្មែរ ដែលមាននៅក្នុងខេត្តបាត់ដំបង ក៏ដូចជាលើកស្ទួយផលិតផលខ្មែរ ជួយជំរុញឱ្យទទួលបានការគាំទ្រកាន់តែច្រើនពីសំណាក់មហាជនទូទៅ។
គួរជម្រាបថា មួយរយៈនេះ ដោយសារជម្លោះព្រំដែនកម្ពុជា-ថៃ រហូតដល់មានការបិទព្រំដែន រាល់ទំនិញ និងផលិតផលផ្លែឈើ មិនអាចចរាចរចេញចូលបាន។ ដូច្នេះ នេះជាឱកាសល្អដែលប្រជាពលរដ្ឋងាកមកទទួលស្គាល់ និងគាំទ្រផលិតផលក្នុងស្រុកក្នុងស្មារតីខ្មែរជួយខ្មែរ។
ទាក់ទងនឹងព្រឹត្តិការណ៍ផ្លែឈើបាត់ដំបងនេះដែរ ផ្លែឈើជាច្រើនរួមមានដូចជា ទុរេន សាវម៉ាវ មង្ឃុត ផ្លែប័រ (ស្រុកសំឡូត) ដូងខ្ទិះ ក្រូចថ្លុង ក្រូចពោធិ៍សាត់ ម្នាស់ ម្រេច និងផលិតផលផ្លែឈើក្នុងខេត្ត នឹងត្រូវយកទៅបង្ហាញ និងលក់ជូនសាធារណជន។ កាន់តែពិសេសជាងនេះទៀត នឹងមានប៊ូហ្វេទុរេនបាត់ដំបងមកពីស្រុកសំឡូត រយៈពេល ៣ថ្ងៃ ចាប់ពីថ្ងៃទី២៧ ដល់ថ្ងៃទី២៩ ខែមិថុនា ឆ្នាំ២០២៥ ដែលមានការរៀបចំនៅក្នុងរោងម៉ាស៊ីនត្រជាក់។
ឯកឧត្ដម សុខ លូ អភិបាលខេត្តបាត់ដំបង បានមានប្រសាសន៍ថា៖ កម្មវិធីប៊ូហ្វេទុរេន ក្នុងព្រឹត្តិការណ៍ផ្លែឈើបាត់ដំបង ២០២៥ ដើម្បីឱ្យបងប្អូនប្រជាពលរដ្ឋមានឱកាសទទួលទានទុរេនដ៏មានឱជារសផ្អែមឆ្ងាញ់ ជាទុរេនរបស់អ្នកស្រុកសំឡូតផ្ទាល់១០០% មានប្រភពច្បាស់លាស់ ព្រមទាំងផ្លែឈើជាច្រើនមុខទៀតផងដែរ។
ឯកឧត្តមអភិបាលខេត្តបានបញ្ជាក់ថា៖
« ផ្លែឈើទាំងនោះ ដែលចូលរួមក្នុងព្រឹត្តិការណ៍នេះ ត្រូវបានត្រួតពិនិត្យគុណភាពដោយសាខាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តបាត់ដំបង»។
សូមបញ្ជាក់ផងដែរថា នៅក្នុងព្រឹត្តិការណ៍ប្រចាំឆ្នាំខាងលើនេះ ក្រៅពីការបង្ហាញផ្លែឈើ ក៏នឹងមានការតាំងលក់ផលិតផលរបស់ផលិតផលភូមិ១ផលិតផល១ជាច្រើនស្តង់ ក៏ដូចជាបង្អែមផ្លែឈើចម្រុះដែលជាស្នាដៃអ្នកបាត់ដំបងផ្ទាល់ផងដែរ៕
Account
Security
Favourite Content