ព្រះសីហនុ ៖ ក្រុមការ​ងារ​រាជរដ្ឋាភិបាលចុះមូលដ្ឋានខេត្តព្រះសីហនុ បានបន្តយកចិត្តទុកដាក់​គិតគូរ​អំពីការ​រៀបចំក្រុង និងដោះស្រាយ​បញ្ហា​ប្រឈម​របស់ប្រជាពលរដ្ឋ​ឱ្យបានកាន់តែប្រសើរ​បន្ថែមទៀត ធ្វើយ៉ាងណា​ដើម្បីលើកកម្ពស់​កម្រិតជីវភាពពលរដ្ឋ​ក្នុង​ខេត្ត​នេះ និងជំរុញសេដ្ឋកិច្ចជាតិឱ្យកាន់តែរឹងមាំ ។​

នៅក្នុង​កិច្ច​ប្រជុំ​បូក​សរុប​លទ្ធផលការងារ​ប្រចាំឆមាសទី១ ឆ្នាំ២០២៥ និងលើកទិសដៅ​អនុវត្ត​បន្ត​កាលពីចុងសប្សាហ៍មុននេះ ឯកឧត្តមឧបនាយករដ្ឋមន្ត្រី សាយ សំអាល់ ប្រធានក្រុម​ការងារ​រាជរដ្ឋាភិបាល​ចុះមូលដ្ឋាន​ខេត្តព្រះសីហនុ បានដាក់ចេញនូវវិធានក្នុងការរៀបចំក្រុងព្រះសីហនុសម្រាប់អនុវត្តការងារបន្តទៀត ដោយបញ្ជាក់ថា ក្រុងស្រុកឃុំសង្កាត់ទាំងអស់អាចមានជីវិតរស់រវើកបានគឺត្រូវពឹងផ្អែកទៅលើសមត្ថភាព ភាពឆ្លាតវៃ របស់គណៈអភិបាលក្រុងស្រុកឃុំសង្កាត់ទាំងនោះ។ ទន្ទឹមនោះ ក៏ត្រូវគិតគូរអំពីស្ថានភាពសង្គម សេដ្ឋកិច្ច វប្បធម៌នៅមូលដ្ឋានផងដែរ ដើម្បីឱ្យក្រុងព្រះសីហនុកាន់តែមាន​ភាពរីកចម្រើន, លើកស្ទួយជីវភាពប្រជាពលរដ្ឋនិងជំរុញសេដ្ឋកិច្ចជាតិកាន់តែរឹងមាំ។

ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ ឯកឧត្តម សាយ សំអាល់ បានស្នើដល់សមាជិកអង្គប្រជុំឱ្យលើកជាមតិយោបល់ទាក់ទិនទៅនឹងការងារតាមដានការអនុវត្តយុទ្ធសាស្ត្របញ្ចកោណដំណាក់កាលទីមួយរបស់រាជរដ្ឋាភិបាលកម្ពុជានិងជួយរិះរកវិធីសាស្ត្រដើម្បីតម្រង់ទិសការអនុវត្តយុទ្ធសាស្ត្របញ្ចកោណ សម្រាប់ខេត្តព្រះសីហនុឱ្យកាន់តែល្អប្រសើរ ដោយឯកឧត្តម បានលើកឡើងថា ក្នុងរយៈពេល ២ឆ្នាំ នៃអាណត្តិទី៧នេះ យើងបានដើរលើផ្លូវដ៏ត្រឹមត្រូវក្នុងការអនុវត្តយុទ្ធសាស្ត្របញ្ចកោណដំណាក់កាលទីមួយរបស់រាជរដ្ឋាភិបាលកម្ពុជា ក្រោមកិច្ចខិតខំប្រឹងប្រែងយ៉ាងសកម្មរបស់យើងទាំងអស់គ្នានៅក្នុងខេត្តព្រះសីហនុ។

ឯកឧត្តមឧបនាយករដ្ឋមន្ត្រី បានស្នើឱ្យមានការយោគយល់និងចូលរួមពីសមាជិកអង្គប្រជុំទាំងអស់ដែលជាប្រតិបត្តិករនៃការអនុវត្តយុទ្ធសាស្ត្របញ្ចកោណ ឬអាចនិយាយបានថាជាប្រតិបត្តិករក្នុងការកសាងប្រទេសជាតិ ព្រមទាំងក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុដែលជាដៃគូយុទ្ធសាស្ត្រគ្រប់ជ្រុងជ្រោយក្នុងការតម្រង់ទិសអនុវត្តយុទ្ធសាស្ត្របញ្ចកោណនោះ ត្រូវយល់ឱ្យបានច្បាស់ពីគោលបំណងនៃយុទ្ធសាស្ត្របញ្ចកោណដំណាក់កាលទីមួយ។

លើសពីនេះ ឯកឧត្តម បានលើកឡើងថាគ្មានពេលវេលាណាដែលខ្មែររួបរួមសាមគ្គីភាព មានការឯកភាពជាតិគ្រប់ស្រទាប់វណ្ណៈដូចពេលនេះ ហើយក្នុងកាលៈទេសៈដ៍លំបាកដែលកម្ពុជាកំពុងជួបប្រទះ ក៍ជាពេលវេលាល្អសម្រាប់យើងក្នុងការរៀនរស់ដោយខ្លួនឯង ឯករាជ្យម្ចាស់ការ កសាងខឿនសេដ្ឋកិច្ចជាតិឱ្យរឹងមាំ។ ដោយឡែក ក្នុងក្របខណ្ឌខេត្តព្រះសីហនុ ក្រុមការងារចុះមូលដ្ឋាន អាជ្ញាធរ និងគណ​បក្ស​មូលដ្ឋាន ត្រូវបន្តផ្ដោតការយកចិត្តទុកដាក់លើការរៀបចំក្រុង ការងារលំនៅឋាន សំណង់អគារចាស់ សំណង់មិនរៀបរយ កំពង់ផែ រៀបចំឆ្នេរ កសាងហេដ្ឋារចនាសម្ព័ន្ធតភ្ជាប់ចាំបាច់ កសាងធនធានមនុស្សដោយពង្រឹងគ្រឹះស្ថានសិក្សា និងមតេយ្យសិក្សា ពង្រឹងការបម្រើសេវាសាធារណៈ និងគាំទ្រនៅតាមមូលដ្ឋានឃុំ សង្កាត់ បន្ថែមទៀត ពិសេសគិតគូរដល់បងប្អូនពលករចំណាកស្រុកដែលបានវិលមកមាតុប្រទេសវិញ ៕