សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រធានសមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យម និងជាប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានជំរុញឱ្យមានគម្រោងរៀបចំពិព័រណ៍ផលិតផលខ្មែរ ក៏ដូចជាការផ្សព្វផ្សាយឱ្យបានកាន់តែច្រើនដើម្បីឱ្យបានស្គាល់ពីផលិតផលក្នុងស្រុក ដើម្បីជំរុញការប្រើប្រាស់ឱ្យមានសម្ទុះកាន់តែខ្លាំងឡើងថែមទៀត។
ឧកញ៉ា តែ តាំងប៉ ប្រធាន (FASMEC) ក្នុងវេទិកាជំរុញការផលិត និងការគាំទ្រផលិតផលខ្មែរ ដែលមានបណ្តាអ្នកសារព័ត៌មានប្រមាណ ៣០ស្ថាប័ន នៅព្រឹកថ្ងៃទី០៨ ខែកញ្ញា ឆ្នាំ២០២៥ បានលើកឡើងពីគម្រោងរៀបចំពិព័រណ៍ផលិតផលខ្មែរ ដើម្បីជំរុញគាំទ្រការប្រើប្រាស់ផលិតផលខ្មែរនៅលើទីផ្សារក្នុងស្រុក ដែលនឹងប្រព្រឹត្តទៅនាចុងសប្ដាហ៍នេះ។
ឧកញ៉ា តែ តាំងប៉ បានមានប្រសាសន៍ថា ពិព័រណ័ផលិតផលខ្មែរ ឆ្នាំ២០២៥ នឹងរៀបចំឡើងរយៈពេល ៣ ថ្ងៃ ពីថ្ងៃទី១១ ដល់១៣ ខែកញ្ញា ក្រោមប្រធានបទ « ពង្រឹង និងពង្រីក សមត្ថភាពផលិតក្នុងស្រុក» ដោយមានសហគ្រាសក្នុងស្រុកប្រមាណ ៣០០ សហគ្រាសនឹងចូលរួមក្នុងកម្មវិធីពិព័រណ៍ ជំរុញការប្រើប្រាស់ផលិតផលខ្មែរ នៅមជ្ឈមណ្ឌលសាលសន្និបាត និងពិព័រណ៍កោះពេជ្រ។
លោកឧកញ៉ាបានបញ្ជាក់ថា៖
«ពិព័រណ៍ផលិតផលខ្មែរ ឆ្នាំ២០២៥ មានសហគ្រាសក្នុងស្រុកចូលរួមប្រមាណជាង ៣០០ សហគ្រាស មានផលិតផលចម្រុះជាច្រើនប្រភេទ ដែលនឹងយកទៅតាំងបង្ហាញ ក៏ដូចជាផ្សព្វផ្សាយដល់ពលរដ្ឋបានស្គាល់ និងជំរុញការប្រើប្រាស់ផលិតផលខ្មែរឱ្យមានសម្ទុះគាំទ្រកាន់តែខ្លាំងក្លាឡើងថែមទៀត ខណៈដែលបច្ចុប្បន្ននេះ ស្មារតីគាំទ្រផលិតផលក្នុងស្រុក កំពុងមានភាពពុះកញ្រ្ជោល ក្រោយកើតមានវិវាទជាមួយប្រទេសថៃ រហូតឈានដល់ការបិទព្រំដែន និងមានការធ្វើពហិការ លើការប្រើប្រាស់ផលិតផលនាំចូលពីប្រទេសថៃ»។
ប្រធាន FASMEC រូបនេះក៏បានលើកឡើងពីឱកាស និងបញ្ហាប្រឈម រួមទាំងដំណោះស្រាយ ក្នុងគោលបំណងជំរុញ និងបង្កើនការផលិតឱ្យបានកាន់តែច្រើន ជាពិសេសយកចិត្តទុកដាក់ទៅលើគុណភាព សុវត្ថិភាព ដើម្បីធ្វើយ៉ាងណាបំពេញតម្រូវការប្រើប្រាស់អំឡុងពេលពហិការ។
ជាមួយគ្នានេះ លោកឧកញ៉ាក៏បានបង្ហាញពីក្ដីរំពឹងថា តាមរយៈពិព័រណ៍ផលិតផលខ្មែរ ឆ្នាំ២០២៥ នេះ ពិតជាអាចទាក់ទាញសន្ទុះគាំទ្រពីមហាជនគ្រប់ទិសទីបានកាន់តែច្រើនជាងឆ្នាំកន្លងទៅ ដែលនឹងក្លាយជាចលករមួយដ៏សំខាន់សម្រាប់ទ្រទ្រង់កំណើនសេដ្ឋកិច្ចកម្ពុជាយ៉ាងប្រាកដ៕
Account
Security
Favourite Content