បរទេស៖ យោងតាមប្រភពព័ត៌មានពីរ៉យទ័រ បានរាយការណ័ថា តម្លៃប្រេងបានធ្លាក់ចុះរយៈពេល ៣ ថ្ងៃជាប់ៗគ្នា  ដោយសាររដ្ឋាភិបាលអាម៉េរិកបិទប្រតិបត្តិការមួយចំនួនដែលកាន់តែបង្កជាក្ដីព្រួយបារម្ភទៅដល់សេដ្ឋកិច្ចពិភពលោក ខណៈដែលមានការរំពឹងអំពីការកើនឡើងនៃការផ្គត់ផ្គង់ប្រេងកាន់តែច្រើននៅខែក្រោយ។

នៅថ្ងៃព្រហស្បត្តិ៍សប្ដាហ៍នេះ តម្លៃប្រេងឆៅ Brent បានធ្លាក់ចុះ ១% ឬ នៅសល់ត្រឹមតែ ៦៥,៣៥ ដុល្លារក្នុងមួយបារ៉ែល ខណៈដែលតម្លៃប្រេងឆៅ West Texas Intermediate (WTI) ធ្លាក់ចុះ ០,៩%  ឬ ៦១,៧៨ ដុល្លារក្នុងមួយបារ៉ែល។

ជាមួយនឹងការប្រែប្រួលតម្លៃប្រេងសកលដែលធ្លាក់ចុះក្នុងរយៈពេល៣ថ្ងៃជាប់ៗគ្នានេះ អ្នកទីផ្សារបានមើលឃើញថា ផលិតកម្មប្រេងរបស់អាម៉េរិកអាចនឹងនៅទ្រឹងប្រសិនបើតម្លៃស្ថិតនៅជិត ៦០ ដុល្លារក្នុងមួយបារ៉ែល ប៉ុន្តែរំពឹងថា OPEC + នឹងជំរុញផលិតកម្មក្នុងខែវិច្ឆិកា ប្រហែលដូចគ្នានឹងការបន្ថែម ៥ សែនបារ៉ែលក្នុងមួយថ្ងៃ (ក្នុងខែកញ្ញា) បើទោះបីជាតម្រូវការរបស់សហរដ្ឋអាម៉េរិក និងអាស៊ីចាប់ផ្តើមធ្លាក់ចុះក៏ដោយ។ យ៉ាងណាមិញ OPEC បានបញ្ជាក់ថា របាយការណ៍ប្រព័ន្ធផ្សព្វផ្សាយអំពីផែនការបង្កើនទិន្នផល ៥ សែនបារ៉ែលក្នុងមួយថ្ងៃ គឺជាការយល់ច្រឡំ ខណៈដែលចំនួននៃការបន្ថែមទិន្នផលប្រេងមិនទាន់បានសម្រេចនៅឡើយ។

កាលពី​សប្តាហ៍​មុន​ តម្លៃ​ប្រេងក៏មាន​សម្ពាធ​ដោយ​ការ​កើនឡើងនៃចំនួនស្តុកប្រេងឆៅច្រើន​​ជាង​ការ​រំពឹង​ទុក​។ រដ្ឋបាលព័ត៌មានថាមពលរបស់សហរដ្ឋអាម៉េរិក (EIA) បានលើកឡើងថា ក្រុមហ៊ុនថាមពលបានបន្ថែមប្រេងឆៅចំនួន ១,៨ លានបារ៉ែលទៅក្នុងស្តុកកាលពីចុងខែកញ្ញា ដែលលើសពីការព្យាករណ៍ ១លានបារ៉ែល។

លោក Phil Flynn អ្នកវិភាគជាន់ខ្ពស់នៅក្រុមហ៊ុន Price Futures Group បានលើកឡើងថា ចំនួនស្តុកប្រេងឆៅបានកើនឡើងបន្ទាប់ពីការធ្លាក់ចុះនៃការនាំចេញ ដែលបង្ហាញពីសញ្ញានៃតម្រូវការប្រេងទន់ខ្សោយ។ មិនត្រឹមតែប៉ុណ្ណោះ រដ្ឋាភិបាលអាម៉េរិកបានបិទប្រតិបត្តិការជាច្រើនរបស់ខ្លួន ខណៈដែលការបែងចែកបក្សពួកបានរារាំងសភា និងសេតវិមានពីការសម្រេចលើកិច្ចព្រមព្រៀងផ្តល់មូលនិធិមួយចំនួន។ ជាមួយគ្នានេះ ទីភ្នាក់ងាររដ្ឋាភិបាលអាម៉េរិកបានព្រមានថា បញ្ហានេះនឹងអាចរារាំងដល់ការចេញផ្សាយរបាយការណ៍ការងារក្នុងខែកញ្ញា ដែលគេរង់ចាំមើលយ៉ាងដិតដល់ក្នុងចំណោមរឿងរ៉ាវផ្សេងៗទៀត។ បន្ថែមពីនេះ កាលពីខែកញ្ញា សកម្មភាពនៃផលិតកម្មរបស់អាម៉េរិកបានកើនឡើង ប៉ុន្តែការបញ្ជាទិញថ្មីៗ និងទីផ្សារការងារបែរជាធ្លាក់ចុះទៅវិញ។

លោក Tamas Varga អ្នកវិភាគរបស់ក្រុមហ៊ុន PVM Oil Associates បាននិយាយថា សង្គ្រាមអ៊ុយក្រែន-រុស្ស៊ីអាចនឹងរំខានដល់ការផ្គត់ផ្គង់ និងការនាំចេញនៅក្នុងប្រទេសរុស្ស៊ី។ ឧបនាយករដ្ឋមន្ត្រីរុស្ស៊ី Alexander Novak លើកឡើងថា បញ្ហាផ្គត់ផ្គង់ប្រេងឥន្ធនៈនៅលើទីផ្សារក្នុងស្រុកជាទូទៅគឺស្ថិតនៅក្រោមការគ្រប់គ្រងរបស់រដ្ឋ ប៉ុន្តែតំបន់មួយចំនួនកំពុងជួបប្រទះនឹងការខ្វះខាតប្រេងឥន្ធនៈ៕