សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មន្ត្រីជាន់ខ្ពស់ និងជាប្រធានក្រុមការងារជំរុញការវិនិយោគក្នុងភូមិភាគឦសាន្ត ដែលមានរួមមានខេត្តចំនួន៤ (ក្រចេះ, ស្ទឹងត្រែង, មណ្ឌលគីរី និងរតនៈគីរី) បានជំរុញឱ្យថ្នាក់ដឹកនាំខេត្ត ត្រូវយកចិត្តទុកដាក់ខ្ពស់ និងបន្តថែទាំទាំងវិនិយោគិនចាស់ និងទាក់ទាញវិនិយោគិនថ្មីៗឱ្យចូលបណ្ដាក់ទុនវិនិយោគនៅក្នុងខេត្តរបស់ខ្លួនបន្ថែមទៀតឱ្យបានកាន់តែច្រើន។ ការជំរុញ និងលើកទឹកចិត្តដល់ថ្នាក់ដឹកនាំខេត្តទាំង៤ក្នុងតំបន់ភូមិភាគឦសាននេះ ត្រូវបានធ្វើឡើងនៅក្នុងកិច្ចប្រជុំផ្ទៃក្នុងលេខាធិការដ្ឋានក្រុមការងារជំរុញការវិនិយោគក្នុងភូមិភាគឦសាន កាលពីថ្ងៃទី ៨ ខែធ្នូ ឆ្នាំ២០២៥ ដោយមានការចូលរួមសមាសភាពពាក់ព័ន្ធក្នុងកម្មវិធីពិសេសជំរុញការវិនិយោគខេត្តភូមិភាគឦសាន ។
នៅក្នុងកិច្ចប្រជុំនោះដែរ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងភូមិភាគឦសាន្ត បានគូសរំលេចអំពីសារសំខាន់នៃការថែទាំវិនិយោគិនដែលមានស្រាប់ ហើយត្រូវបន្តទាក់ទាញ និងជំរុញការវិនិយោគថ្មីៗ ជាពិសេសគម្រោងវិនិយោគដែលមានគុណភាពខ្ពស់ មានការផ្ទេរចំណេះដឹង ជំនាញ និងបច្ចេកវិទ្យា ។
ជាមួយនឹងការកើនឡើងជាបន្តបន្ទាប់នៃការស្នើគម្រោងវិនិយោគ និងការផ្តល់គោលការណ៍វិនិយោគក្នុងក្របខណ្ឌកម្មវិធីពិសេសជំរុញការវិនិយោគក្នុងភូមិភាគឦសាន ឯកឧត្តមបណ្ឌិតសភាចារ្យ បានបញ្ជាក់ពីភាពចាំបាច់ក្នុងការពង្រឹងសមត្ថភាពរបស់មន្រ្តីប្រចាំការនៅតាមការិយាល័យនានារបស់ក្រុមការងារជំរុញការវិនិយោគក្នុងភូមិភាគឦសាន្ត ជាពិសេស ការិយាល័យកណ្តាល ដែលមានទីតាំងស្ថិតនៅ អគារមជ្ឈមណ្ឌលអភិវឌ្ឍន៍ធុរកិច្ច (BDC) ក៏ដូចជាការិយាល័យនៅតាមខេត្តទាំង៤នៃភូមភាគឦសាន ដើម្បីឆ្លើយតបទៅនឹងការកើនឡើងនៃទំហំការងារ តួយ៉ាង ការតាមដានការអនុវត្តគម្រោង និងការសម្រួលនីតិវិធីក្នុងការផ្តល់លិខិតអនុញ្ញាតចាំបាច់នានាប្រកបដោយប្រសិទ្ធភាព ។
ឯកឧត្តមបន្ថែមថា លេខាធិការដ្ឋាន ត្រូវពន្លឿនការរៀបចំប្រព័ន្ធគ្រប់គ្រងទិន្នន័យ និងព័ត៌មានពាក់ព័ន្ធការវិនិយោគក្នុងតំបន់ភូមិភាគឦសាន ដើម្បីប្រើប្រាស់ជាមូលដ្ឋានសម្រាប់ការតាមដានការអនុវត្តគម្រោង ក៏ដូចជាការចងក្រង និងការរក្សាទុកជាបណ្ណាសារសម្រាប់ជាមូលដ្ឋាននៃការអភិវឌ្ឍនាពេលអនាគត ។
ឯកឧត្តមបណ្ឌិតសភាចារ្យ ហ៊ាន សាហ៊ីប ក៏បានណែនាំឱ្យលេខាធិការដ្ឋានពង្រឹងកិច្ចសហការជាមួយក្រសួង-ស្ថាប័នពាក់ព័ន្ធ ដោយត្រូវបំពេញតួនាទីស្នូលក្នុងការផ្តល់ការសម្របសម្រួលជាកញ្ចប់ជូនដល់វិនិយោគិន/ក្រុមហ៊ុនវិនិយោគ ដើម្បីពង្រឹងមុខងារ និងតួនាទីជា «ច្រកចេញចូលតែមួយ» របស់ក្រុមការងារជំរុញការវិនិយោគក្នុងភូមិភាគឦសាន អនុលោមតាមស្មារតី «ជវភាពនៃប្រព័ន្ធតួអង្គតែមួយ» ប្រកបដោយតម្លាភាព និងប្រសិទ្ធភាព ។
លោក សាមុត លីម៉ា នាយកទីចាត់ការផែនការវិនិយោគនៃរដ្ឋបាលខេត្តក្រចេះបានថ្លែងថា សម្រាប់ខេត្តក្រចេះ តែងតែថែរក្សាវិនិយោគិនចាស់ៗ និងទាក់ទាញវិនិយោគិនថ្មីៗ ជាក់ស្ដែង រដ្ឋបាលខេត្តក្រចេះ រួមទាំងអាជ្ញាធរខេត្តបានសម្របសម្រួលដល់បណ្ដាវិនិយោគិនដែលចូលមកកាន់ខេត្តក្រចេះ ដូចជាជួយសម្រួលឱ្យដំណើរការវិនិយោគទៅដោយរលូន ទោះបីជាមិនទាន់ទទួលបានលិខិតអនុញ្ញាតផ្លូវការពីក្រុមប្រឹក្សាអភិវឌ្ឍន៍កម្ពុជាក្ដី ។
លោកបានបញ្ជាក់ផងដែរថា ចាប់តាំងពីរាជរដ្ឋាភិបាលប្រកាសជាផ្លូវការនូវកម្មវិធីពិសេសជំរុញការវិនិយោគក្នុងខេត្តភូមិភាគឦសាន ឃើញថា ខេត្តក្រចេះទទួលបានការចាប់អារម្មណ៍ពីសំណាក់វិនិយោគិនថ្មីចាស់ ទាំងក្នុង និងក្រៅប្រទេស ជាពិសេសទៅលើវិស័យកសិកម្ម និងកសិ-ឧស្សាហកម្ម ៕
Account
Security
Favourite Content