សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ ផលិតផលប្រើប្រាស់កែច្នៃចេញពីសរសៃអំបោះជាវត្ថុធាតុដើមភាគច្រើនត្រូវបានគេយល់ថា ជាផលិតផលដែលពិបាកបង្កើត និងផលិតឡើងបំផុត ដែលក្រៅពីមានចំណេះ ជំនាញ ផ្នែកអំបោះចាក់ដោយដៃ គឺតម្រូវឲ្យមានភាពអំណត់ អត់ធ្មត់ ផ្ចិតផ្ចង់ និងត្រូវការចំណាយពេលវេលាយូរក្នុងការផលិតចេញជាផលិតផលសម្រេចដែលអាចប្រើប្រាស់បាន និងប្រាកដថាល្អស្អាត មានសោភ័ណភាពគួរជាទីទាក់ទាញ។
កញ្ញា សៃ អមរាម៉ារី បុច្ចុប្បន្នជាបុគ្គលិកបម្រើការងារនៅស្ថាប័នធនាគារឯកជនមួយកន្លែងនៅក្រុងសៀមរាប ដោយទំនេរពីការងារ កញ្ញាក៏បានព្យាយាមបន្ថែមមុខរបរមួយទៀតគឺការចាក់សម្លៀកបំពាក់ ក៏ដូចជាសម្ភារប្រើប្រាស់ និងលម្អរផ្សេងៗទៀត ដែលជាការងារចំណូលចិត្ត សម្រាប់ដាក់លក់តាម បណ្ដាញសង្គម facebook ដោយទទួលបានចំណូលគួរសមបន្ថែមពីលើប្រាក់បៀរវត្សរ៍។
កញ្ញា ម៉ារី បានបញ្ជាក់ប្រាប់ AMS ថា ៖
« កាលដំបូងឡើយដែលខ្ញុំសម្រេចចិត្តចាប់យកផ្នែកនេះ ដោយហេតុថាការស្រលាញ់នូវរបស់អ្វីដែលធ្វើឡើងដោយដៃ ហើយណាមួយវាក៏ជាមុខរបរមួយ ដែលមិនសូវមានអ្នកចាប់យកធ្វើជាអាជីព ដូច្នេះហើយទើបខ្ញុំចង់ធ្វើឲ្យគ្រប់គ្នាបានស្គាល់ពីការងារ និងជំនាញក្នុងវិស័យចាក់សរសៃអំបោះមួយនេះឲ្យបានកាន់តែច្រើន »
ជាការគួរឲ្យកត់សម្គាល់ ចំពោះផលិតផលសម្រេច ក៏ដូចជាសម្ភារប្រើប្រាស់នានាដែលបង្កើតចេញពីសរសៃអំបោះក្រោយទឹកដៃដ៏ប៉ុនប្រសប់របស់កញ្ញា ម៉ារី ដែលបានដាក់លក់នាពេលបច្ចុប្បន្ននេះរួមមានដូចជា អាវ សំពត់ បូរ កាបូបដៃ កាបូបស្ពាយ ខ្សែរចងសក់ មួក សម្លៀកបំពាក់ឈុតសមហរាប់កូនក្មេង សម្លៀកបំពាក់ឈុតហែលទឹករបស់មនុស្សពេញវ័យជាដើម ដោយស្ទើរតែគ្រប់ម៉ូតទាំងអស់សុទ្ធតែមានភាពស្រស់ស្អាត និងទាក់ទាញសម្រាប់អ្នកនិយមសម្លៀកបំពាក់ និងផលិតផលសរសៃអំបោះ ហើយគ្រប់អតិថិជនទាំងអស់ក៏អាចកម្ម៉ង់បានចំពោះទំហំ ម៉ូដ និងពណ៌តាមសេចក្ដីត្រូវការ។
ទាក់ទងទៅនឹងតម្លៃវិញ ផលិតផលដែលត្រូបានផលិតឡើងដោយដៃក្រោមការចាក់សរសៃអំបោះទាំងអស់ដូចដែលបានរៀបរាប់ខាងលើនេះត្រូវបានដាក់លក់ក្នុងតម្លៃចាប់ពី ៩-៣២ ដុល្លារ អាស្រ័យទៅតាមម៉ូដ និងទំហំ។ សម្រាប់អតិថិជនដែលធ្វើការកម៉្មង់ត្រូវរង់ចាំរយៈពេលចន្លោះពី ៣-៤ ថ្ងៃ ដើម្បីចាក់ទៅតាមការចង់បាន និងប្រកបដោយសោភ័ណភាពគួរជាទីពេញចិត្ត ដែលយ៉ាងហោចណាស់ក្នុងរយៈពេល១ខែ កញ្ញាអាចទទួលចាក់បានប្រមាណ ៨-១០អាវ ឬសំពត់ ដែលជាប្រភពចំណូលបន្ថែមប្រចាំខែរបស់កញ្ញាបានយ៉ាងរីករាយ។
ពាក់ព័ន្ធទៅនឹងសម្ភារៈសម្រាប់ចាក់ និងវត្ថុធាតុដើមនៅក្នុងមុខអាជីពមួយនេះត្រូវបានកញ្ញាបញ្ជាក់ប្រាប់ថា ហាក់មិនមានអ្វីច្រើនពេកនោះទេ ពោលគឺត្រូវការចាំបាច់បំផុតនូវសរសៃអំបោះ (អាស្រ័យតាមពណ៌ដែលមានតម្រូវការ) ម្ជុល(ពីលេខតូចដល់លេខធំ) ម៉ែត្រ កន្ត្រៃ និងសម្ភារៈបន្ទាប់បន្សំមួយចំនួនដែលកញ្ញាអាចទិញនៅតាមផ្សារក្នុងស្រុក ហើយសម្ភារៈចាំបាច់មួយចំនួនទៀតត្រូវកម្ម៉ង់ទិញពីក្រៅប្រទេសបន្ថែម។
ជាមួយនឹងការបង្ហើបប្រាប់ពីការចាប់យកអាជីពខាងលើធ្វើជាមុខរបររកចំណូលបន្ថែមនេះ កញ្ញា អមរាម៉ារី បានប្រាប់ឲ្យដឹងថា កញ្ញាបានចេះជំនាញចាក់សរសៃអំបោះនេះតាមរយៈបងស្រីម្នាក់បង្ហាត់បង្ហាញ ហើយក៏បានព្យាយាម និងរៀនបន្ថែមតាមរយៈបណ្តាញ Youtue។ គិតរហូតមកដល់ពេលបច្ចុប្បន្ន កញ្ញា ម៉ារី ទើបតែបានចាប់ដំណើរការអាជីវកម្មខ្នាតតូចមួយនេះបានប្រមាណ ៩ខែប៉ុណ្ណោះ ដែលគាត់បានធ្វើវាតែម្នាក់ឯងនៅពេលទំនេរពីការងារដោយប្រើដើមទុនដំបូងត្រឹមតែ ៤ម៉ឺនរៀលប៉ុណ្ណោះទៅលើការទិញសរសៃអំបោះចំនួន ២ដុំ ជាមួយនឹងម្ជុលចំនួន១ប៉ុណ្ណោះ ហើយក្រោយមកក៏បានទិញបន្ថែមនូវវត្ថុធាតុដើមចាំបាច់ផ្សេងៗជាបន្តបន្ទាប់រហូតមកដល់ពេលបច្ចុប្បន្ននេះ។
យ៉ាងណាមិញ នៅក្នុងអាជីវកម្ម ក៏ដូចជាអាជីពមួយនេះក៏មានផលវិបាកខ្លះដែរ ជាពិសេសពាក់ព័ន្ធទៅនឹងពេលវេលានៃការចាក់ ព្រោះនៅពេលមានភ្ញៀវកម្ម៉ង់អាវចាក់ ឬជាឈុតច្រើន គឺត្រូវការប្រើពេលយូរទម្រាំចាក់គ្រប់ការកម្ម៉ង់របស់ភ្ញៀវម្នាក់។ ម៉្យាងវិញទៀត ដោយសារតែកញ្ញាជាប់រវល់ជាមួយនឹងការងារជាបុគ្គលិកស្ថាប័នធនាគារឯកជនដែលត្រូវបំពេញការងារប្រចាំថ្ងៃផងនោះ បានជះឥទ្ធិពល ឬបង្កឲ្យមានភាពយឺតយ៉ាវ ក្នុងការចាក់ជូនភ្ញៀវ ប៉ុន្តែភ្ញៀវ ឬអតិថិជនភាគច្រើនក៏យល់ពីភាពលំបាក ហើយស្ម័គ្រចិត្តរង់ចាំ ក្រោមភាពយោគយល់ផងដែរ។ នេះគឺជាអ្វីដែលកញ្ញា ម៉ារី បានលើកឡើង។
ជាការចូលរួម និងលើកទឹកចិត្តឲ្យមានការបង្កើតឡើងនូវអាជីវកម្មខ្នាតតូចផ្ទាល់ខ្លួន កញ្ញា សៃ អមរាម៉ារី បានបង្ហាញពីទស្សនទានថា ៖
« សម្រាប់អ្នកដែលស្រឡាញ់អាជីពមួយនេះ នាងខ្ញុំសូមលើកទឹកចិត្តឱ្យខិតខំ ជឿជាក់លើខ្លួនឯង កុំបោះបង់ក្តីស្រម៉ៃ ឱ្យតែយើងចង់ចេះ ចង់ដឹង ចង់រៀន ថ្ងៃណាមួយយើងនឹងអាចទទួលបាននូវភាពជោគជ័យដែលយើងចង់បាន ទោះតិច ឬច្រើន ប៉ុន្តែវាជាសមិទ្ធលដែលយើងបានបង្កើតឡើង »
« ដោយឡែក ចំពោះបងៗ ឬប្អូនៗ ដែលកំពុងចាប់យកជំនាញនេះធ្វើជាអាជីព ខ្ញុំក៏សូមលើកទឹកចិត្ត រួមគ្នាបង្កើតនូវម៉ូដថ្មី ឬរបស់ប្លែកៗបន្ថែមទៀត ដើម្បីបង្ហាញឱ្យគេឃើញថាស្នាដៃកូនខ្មែរ ជាពិសេសស្នាដៃស្ត្រីខ្មែរ ក៏មិនអន់ជាងសាសន៍គេដទៃ ឬផលិតផលដែលបង្កើតចេញដោយម៉ាស៊ីននោះដែរ យើងត្រូវរួមគ្នាដើម្បីធ្វើឱ្យវិស័យមួយនេះកាន់តែមានអ្នកស្គាល់ច្រើន និងឲ្យតម្លៃកាន់តែទូលំទូលាយជាងនេះ»
ជីវប្រវត្តិ: ជានិស្សិតនៃសាលកវិទ្យាល័យភូមិន្ទភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍។ បច្ចុប្បន្ន ជាអ្នករាយការណ៍ព័ត៌មាននៅ AMS Economy ។
របាយការណ៍ថ្មីៗ
មើលទាំងអស់ ➧
ព័ត៌មានទូទៅ
មើលទាំងអស់ ➧
បុរសម្នាក់កែច្នៃត្រឡោកដូងទៅជាធ្យូងអនាម័យ ជួយដល់សុខមាលភាពប្រជាជន
ធុរកិច្ចបរិយាបន្ន, ព្រឹត្តិការណ៍, សេដ្ឋកិច្ច
• 26/04/2024
ជំនួសឱ្យការយកឈើទៅដុត បុរសម្នាក់បានប្រមូលយកត្រឡោកដូងដែលគេកោសសាច់រួច ទៅដុតឱ្យចេញជាធ្យូងអនាម័យ។
Hilltribe Organics ជួយបង្កើនប្រាក់ចំណូលជនជាតិភាគតិចនៅប្រទេសថៃជាង ៥០០ ដុល្លារក្នុងមួយខែពីការចិញ្ចឹមមាន់យកស៊ុតសរីរាង្គ
ធុរកិច្ចបរិយាបន្ន, ព្រឹត្តិការណ៍, សេដ្ឋកិច្ច
• 26/04/2024
Hilltribe Organics បានរួមបញ្ចូលជនជាតិដើមភាគតិចដែលចិញ្ចឹមមាន់យកស៊ុតទៅក្នុងខ្សែសង្វាក់តម្លៃនៃផលិតផលសរីរាង្គរបស់ខ្លួន និងបានជួយបង្កើនប្រាក់ចំណូលរបស់ពួកគេបីដង ឬជាង ៥០០ ដុល្លារក្នុងមួយខែ
Doi Kham ក្រុមហ៊ុនធុរកិច្ចបរិយាបន្នថៃផ្តោតសំខាន់ជួយគាំទ្រជីវភាពក្រុមកុលសម្ព័ន្ធភ្នំ
ធុរកិច្ចបរិយាបន្ន, ព្រឹត្តិការណ៍, សេដ្ឋកិច្ច
• 26/04/2024
Doi Kham បានជួយគាំទ្រដល់ក្រុមពលរដ្ឋកុលសម្ព័ន្ធជាច្រើនរយពាន់គ្រួសារតាមរយៈការទទួលទិញគ្រាប់កាហ្វេដែលមានគុណភាពខ្ពស់ដោយផ្ទាល់ពីសហគមន៍ទាំងនេះ
កម្មវិធីពិសេសរបស់ AMS ECONOMY
ព័ត៌មានសង្ខេប
Account
Security
Favourite Content