បរទេស ៖ យោងទៅតាមប្រភពព័ត៌មានពី BBC បានរាយការណ៍ថា ការស្ទាបស្ទង់ពីកំណើនសេដ្ឋកិច្ចអាមេរិកនៅតែបន្តបង្ហាញសញ្ញាព្រមានអំពីវិបត្តិសេដ្ឋកិច្ចដែលនឹងអាចធ្លាក់ចុះនាពេលអនាគតដ៏ខ្លី ខណៈដែលម្ចាស់​អាជីវកម្ម​មួយ​ចំនួន​​យល់​ស្រប​ថា​សេដ្ឋកិច្ច​អាមេរិក​កាន់​តែ​អាក្រក់​ទៅៗ។

បើទោះបីជាអាមេរិកមិនទាន់ស្ថិតក្នុងវិបត្តិសេដ្ឋកិច្ចជាផ្លូវការនៅឡើយ ប៉ុន្តែសន្ទស្សន៍សេដ្ឋកិច្ចបានធ្លាក់ចុះក្នុងរយៈពេល ១០ ខែជាប់ៗគ្នា។ សមាសធាតុទាំង ១០ របស់សន្ទស្សន៍សេដ្ឋកិច្ច​មានចំនួន ៧ រួចទៅហើយបានធ្លាក់ចុះនៅក្នុងខែធ្នូកន្លងទៅនេះ ហើយនៅតែបង្ហាញជាសញ្ញានៃការធ្លាក់ចុះសេដ្ឋកិច្ច។

លោក Ataman Ozyildirim នាយកជាន់ខ្ពស់នៃក្រុមប្រឹក្សាសន្និសីទផ្នែកសេដ្ឋកិច្ចបាននិយាយថា ៖ ភាពទន់ខ្សោយបានរីករាលដាលក្នុងចំណោមសូចនាករឈានមុខគេនៅក្នុងខែធ្នូ ដែលបង្ហាញពីស្ថានភាពកាន់តែយ៉ាប់យ៉ឺនសម្រាប់ទីផ្សារការងារ ការផលិត ការសាងសង់លំនៅដ្ឋាន និងទីផ្សារហិរញ្ញវត្ថុនៅក្នុងប៉ុន្មានខែខាងមុខ។ សកម្មភាពសេដ្ឋកិច្ចអាចនឹងជាប្រែទៅជាអវិជ្ជមាននៅក្នុងត្រីមាសខាងមុខនេះ និងត្រីមាសចុងក្រោយនៃឆ្នាំ២០២៣។​

តាមរយៈការស្តង់មតិដោយក្រុមប្រឹក្សាខាងសេដ្ឋកិច្ចពាណិជ្ជកម្ម  អ្នកសេដ្ឋកិច្ចប្រហែល ៥២ ភាគរយបានវិភាគឃើញថា ឱកាសច្រើនជាង ៥០/៥០ ដែលសហរដ្ឋអាមេរិកនឹងធ្លាក់ចូលក្នុងវិបត្តិសេដ្ឋកិច្ចនៅឆ្នាំនេះ។​ សកម្មភាពសេដ្ឋកិច្ចរបស់សហរដ្ឋអាមេរិកបានបង្ហាញពីសញ្ញាអវិជ្ជមានក្នុងរយៈពេលប៉ុន្មានខែថ្មីៗនេះ ខណៈដែលធនាគារកណ្តាល Fed បានដំឡើងអត្រាការប្រាក់ដើម្បីកាត់បន្ថយអតិផរណា។

ទោះបីជាយ៉ាងណាក្តី​ ក្រុមហ៊ុនជាច្រើនកំពុងប្រឈមនឹងផលប៉ះពាល់ពីអត្រាការប្រាក់ខ្ពស់ និងលទ្ធភាពនៃការចំណាយរបស់អ្នកប្រើប្រាស់ទាប។ ថ្មីៗនេះ មានការកាត់បន្ថយការងារធំនៅតាមបណ្តាធនាគារ និងក្រុមហ៊ុនបច្ចេកវិទ្យាដូចជា Amazon និងTwitter។ កំណើនការខ្ចីប្រាក់កាន់តែខ្ពស់កំពុងវាយលុកក្រុមហ៊ុននានាក្នុងវិស័យអចលនទ្រព្យ និងធនាគារ ខណៈពេលដែលការឡើងថ្លៃតម្លៃរស់នៅកំពុងធ្វើឱ្យប៉ះពាល់ដល់ហិរញ្ញវត្ថុគ្រួសារ ដោយបង្កើនការព្រួយបារម្ភដល់អ្នកប្រើប្រាស់ក្នុងការចំណាយ ដែលជាកត្តាជំរុញដ៏ធំបំផុតនៃសេដ្ឋកិច្ចសហរដ្ឋអាមេរិក។

ស្របពេលនេះដែរខាង Fed បាននិយាយថា ការទប់ទល់អតិផរណាកំពុងមានភាពល្អបន្តិច ប៉ុន្តែគោលនយោបាយរឹតបន្តឹងរូបិយវត្ថុ និងការដំឡើងការប្រាក់នាពេលអនាគតនឹងនៅតែអនុវត្ត។ កិច្ចប្រជុំសម្រាប់គណៈកម្មាធិការកំណត់អត្រាការប្រាក់របស់ Fed នឹងចាប់ផ្តើមនៅថ្ងៃទី ៣១ ខែមករាខាងមុខនេះ​ ដោយមានការរំពឹងទុកថា ធនាគារកណ្តាលអាចនឹងដំឡើងអត្រាការប្រាក់មួយភាគបួន។ មុនពេលកិច្ចប្រជុំមកដល់ Fed នឹងបង្ហាញទិន្នន័យសេដ្ឋកិច្ចបន្ថែមដើម្បីត្រួតពិនិត្យមើលឡើងវិញលើ ទិន្នន័យ GDP សម្រាប់ត្រីមាសទីបួន និងរបាយការណ៍ចំណាយប្រើប្រាស់ផ្ទាល់ខ្លួនរបស់ប្រជាពលរដ្ឋ៕