ភ្នំពេញ ៖ រាជរដ្ឋាភិបាលបានជូនជាចំណងដៃនូវថ្លូវថ្មីចំនួនខ្សែទៀតតភ្ជាប់ពីខេត្តកែបមកកាន់ផ្លូវជាតិលេខ​៣ ឆ្ពោះទៅរាជធានីភ្នំពេញ បាន​សម្រេចជិត១០០ភាគរយហើយ ដោយផ្លូវនេះគឺជា​កាត់ថ្មីមួយ​សម្រាប់បងប្អូន​ប្រជាពលរដ្ឋ​ដែលធ្វើ​ដំណើរពីភ្នំពេញទៅ​កាន់​ខេត្ត​កែប ដោយមិនចាំបាច់​ទៅកាន់ទីរួម​ខេត្តកំពត ឬ​កាត់តាមផ្លូវលេខ​៣១​ តានី ទូកមាសទៀតនោះទេ ។​

ការសាងសង់​ផ្លូវថ្មី​នេះ​បានជំរុញឱ្យ​សកម្មភាពទិញលក់​ និងតម្លៃដីធ្លីនៅតាមបណ្ដោយផ្លូវ​នោះ​មានកំណើនមួ​យ​កម្រិតទៀត ហើយ​រំពឹងថា​សក្ដានុពល​តាមបណ្ដោយផ្លូវ​ថ្មីនេះ នឹង​ធ្វើឱ្យ​មានការ​វិនិយោគដីធ្លីបន្ថែមទៀត ​ជាពិសេស​កសិកម្ម ឧស្សាហកម្ម និង​លំនៅឋាន ។

លោក​ លឹម រដ្ឋា ភ្នាក់ងារអចលនវត្ថុមួយរូប​ប្រចាំខេត្តកំពត-​កែប បានមានប្រសាសន៍ឱ្យដឹងតាមនៅថ្ងៃទី​១៥ ខែឧសភា ឆ្នាំ២០២៣ ថា តាមពិត​ទៅផ្លូ​វនេះ​ បានចាប់ផ្ដើមសាងសង់យូរហើយ ដែលរហូតមកដល់ពេលនេះ ​គឺគេបានចាក់​កៅស៊ូ​ស្ទើរតែរួចរាល់ទាំងស្រុង​ទៅហើយដែរ។

លោកបន្តថា ៖

“តាមរយៈការអភិវឌ្ឍ​ផ្លូវ​មួយ​នេះ បានធ្វើឱ្យតម្លៃដីធ្លីនិងការ​ទិញលក់​ដីធ្លី​នៅតាមបណ្ដោយផ្លូវ​មួយ​នេះ​មានសកម្មភាពល្អប្រសើរ ដោយកាលពីមុន​អ្នកទិញ​ដីមានឱកាស​ទទួលបានការទិញលក់​ក្នុង​តម្លៃ​ទាបត្រឹមតែមួយម៉ែត្រ​ការ៉េ ​៦ដុល្លារអាមេរិក​ប៉ុណ្ណោះ ប៉ុន្តែមកដល់ពេលនេះ តម្លៃដីធ្លី១០ដុល្លារអាមេរិក​ក្នុង​មួយ​ម៉ែត្រការ៉េ ក៏នៅតែពិបាករកដែរ។”

លោកបន្តទៀតថា ៖

“ចាប់តាំងពីគម្រោងផ្លូវ​នេះ​បានចាប់ផ្ដើម​អភិវឌ្ឍន៍​រហូតមកដល់ចាក់កៅស៊ូ និងជិត​រួចរាល់ ដីនៅតំបន់​ខ្លះ​បានដូរ​ម្ចាស់បួនប្រាំនាក់ទៅហើយ ដែល​មានន័យថា​សកម្មភាពទិញលក់​យក​ចំណេញ​គឺ​មាន​ភាព​ផុស​ផុល​ខ្លាំង ប៉ុន្តែ​សម្រាប់ដីដែលមាន​ទីតាំង​ឆ្ងាយពីផ្លូវ​បន្តិច ​ឬហៅថា​ដីនៅជាប់ផ្លូវ​ក្នុង​​​ គឺអាច​ទិញ​បាន​ក្នុង​តម្លៃទាប​ជាង​ដី​នៅជាប់ផ្លូវធំ ឬយើងអាចរកទិញពីម្ចាស់​ដើម​​បាន។”

លោក​ ជិន ណារិន ភ្នាក់ងារអចលនវត្ថុ​ប្រចាំខេត្តកំពត​ដែរនោះក៏បាននិយាយថា​ មួយរយៈចុងក្រោយ​នេះ នៅតំបន់ឆ្នេរ ​ជាពិសេស​ កំពត ​​និង កែប ហាក់​មានសក្ដានុពល​កាន់តែខ្លាំង ដោយមានគម្រោងធំៗមួយចំនួន​បាន​សម្លឹង​រក​ឱកា​ស​វិនិយោគ​ និងអភិវឌ្ឍន៍​ដែលជាការទាក់ទាញ​វិនិយោគិនជាតិអន្តរជាតិ​កាន់តែខ្លាំង​ឡើង​ថែម​ទៀត​មកកាន់ទឹកដី​នៃតំបន់ឆ្នេរ​សមុទ្រ។​

លោក​បន្តថា ក្នុង​រយៈ​ពេលចុងក្រោយ​នេះដែរ ឃើញថា​រាជរដ្ឋាភិបាលបានប្រឹងប្រែង​ក្នុងការអភិវឌ្ឍ​ហេដ្ឋា​រច​នាសម្ព័ន្ធថ្មីៗ ​និងលើកកម្រិតគុណភាព​ផ្លូវ​ចាស់ៗ​ដូចជា​ផ្លូវជាតិលេខ​៣១ ផ្លូវ​៣៣​ និង​ផ្លូវ​ថ្មីពីខេត្តកែប​ទៅ​ភ្នំ​ពេញ​​ដែលធ្វើ​ឱ្យកា​រធ្វើដំណើរពីរាជធានីភ្នំពេញ មកាន់ទឹកដីនៃខេត្តកំពត និ​ងកែប​កាន់​តែ​ងាយស្រួល ។​

រាជរដ្ឋាភិបាលក៏មានគម្រោងអភិវឌ្ឍន៍​ជាច្រើនទៀត​នៅក្នុង​ទឹកដីនៃខេត្តកំពត និងកែប ក៏ដូចជា​គម្រោង​ហេដ្ឋារចនាសម្ព័ន្ធតភ្ជាប់ពីរាជធានីភ្នំពេញទៅកាន់ខេត្តកែប និងខេត្តកំពត ហើយគម្រោងទាំង​នោះ គេរំពឹងថា​នឹង​ធ្វើឱ្យសក្ដានុពល​អចលនវត្ថុ ​​និង​ទេសចរណ៍ នៅតំបន់ឆ្នេរទាំងពីរ​នេះ​កាន់តែមានភាពទាក់ទាញ​បន្ថែម​ផងដែរ ៕