ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានមានប្រសាសន៍លើកឡើងថា រាជរដ្ឋាភិបាលបានសន្សំសំចៃថវិការយៈពេល ៤ ឆ្នាំ ដោយក្នុង ១​ ឆ្នាំ បានសន្សំទុកប្រមាណ ៣០ លានដុល្លារ​ ដើម្បីត្រៀមរៀបចំព្រឹត្តិការណ៍ស៊ីហ្គេមលើកទី៣២ និងការប្រកួតកីឡាអាស៊ានប៉ារ៉ាហ្គេមលើកទី ១២។ 

សម្ដេចតេជោ បានមានប្រសាសន៍ដូច្នេះ ក្នុងពិធីប្រគល់សញ្ញាបត្រជូនដល់និស្សិតជ័យលាភី នៃសាកលវិទ្យាល័យភូមិន្ទកសិកម្ម,វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាម នៅថ្ងៃទី១៥ ខែឧសភា ឆ្នាំ២០២៣។

សម្តេចតេជោ បានលើកឡើងថា ព្រឹត្តិការណ៍ស៊ីហ្គេមនៅសល់តែ ២ ថ្ងៃទៀតនឹតត្រូវបានបញ្ចប់ […] កម្ពុជាកំពុងធ្វើជាម្ចាស់ផ្ទះរៀបចំការប្រកួតស៊ីហ្គេម ដោយជោគជ័យ។

ទាក់ទងនឹងព្រឹត្តិការណ៍ស៊ីហ្គេមលើកទី ៣២ នេះ សម្តេចតេជោ បានថ្លែងដូច្នេះថា ៖

“យើងមិនមែនគិតតែរឿងបញ្ហាឈ្នះចាញ់នោះជ្រុលហួសហេតុពេកទេ ប៉ុន្តែអ្វីដែលយើងគិតធំបំផុតគឺគិតទៅដល់ការធ្វើជាម្ចាស់ផ្ទះដែលផ្តល់ឱ្យភ្ញៀវមកកាន់ប្រទេសរបស់យើង ទទួលបាននូវសេចក្តីសុខ និងការស្វាគមន៍ពីសំណាក់ប្រជាពលរដ្ឋកម្ពុជា។”

សម្ដេចតេជោបានបញ្ជាក់ទៀតថា ការសម្រេចចិត្តរបស់សម្ដេច គឺត្រឹមត្រូវចំពោះការមិនគិតថ្លៃសំបុត្រ និងការផ្សព្វផ្សាយពីបណ្ដាញផ្សព្វផ្សាយនានា រួមជាមួយនឹងការផ្ដល់ការឧបត្ថម្ភដល់ប្រតិភូកីឡា និងកីឡាករដោយមិនគិតថ្លៃ។

សម្តេចតេជោបានថ្លែងបន្តថា យើងចំណាយប្រមាណ ៧ លានដុល្លារបន្ថែមទៀត ចាយទៅលើការស្នាក់ និងការហូបចុលនៅរបស់កីឡាករ កីឡាការនី ដែលមកពីបណ្តាប្រទេសចូលរួមក្នុងព្រឹត្តិការណ៍ស៊ីហ្គេម ដែលកម្ពុជាជាម្ចាស់ផ្ទះ កំពុងរៀបចំ។

ជុំវិញព្រឹត្តិការណ៍នេះ សម្តេចតេជោ បានថ្លែងដូច្នេះថា ៖

“ឯកឧត្តម អូន ព័ន្ធមុនីរ័ត្ន គឺជាអ្នកសេដ្ឋកិច្ច និងរដ្ឋមន្ត្រីសេដ្ឋកិច្ច និងហិរញ្ញវត្ថុដ៏ពូកែ។ គាត់មិនអាចច្បិចយកត្រឹមតែថវិកាឆ្នាំ ២០២៣ នោះទេ គាត់បានបង្កកថវិកាចំនួន ៤ ឆ្នាំ ក្នុងមួយឆ្នាំបង្កកថវិកាចំនួន ៣០ លានដុល្លារ ដូច្នេះហើយបានយើងមានប្រាក់សម្រាប់ចំណាយ ១១៨ លានដុល្លារ។ ការរៀបចំស៊ីហ្គេមគឺកាតព្វកិច្ចរបស់រដ្ឋសមាជិកអាស៊ាន ដែលរយៈពេល ២ ឆ្នាំម្តង ត្រូវផ្លាស់ប្តូរម្ចាស់ផ្ទះរៀបចំព្រឹត្តិការណ៍មួយនេះ។”

នៅពេលចប់ព្រឹត្តិការណ៍នេះ កម្ពុជាជឿជាក់ថា សកម្មភាពវិនិយោគ និងសកម្មភាពអាជីវកម្មពាណិជ្ជកម្មនៅកម្ពុជានឹងអាចទទួលបានកាន់តែសកម្ម និងមមាញឹកជាងមុន ពីព្រោះថាសក្តានុពលរបស់កម្ពុជាត្រូវបានបង្ហាញទៅកាន់គ្រប់ទីកន្លែងលើពិភពលោក ជាពិសេសចំពោះក្រុមអ្នកវិនិយោគទុនបរទេស។ កាន់តែសំខាន់បំផុតនោះ សម្រាប់ជោគវាសនារបស់កម្ពុជានាពេលអនាគត ដែលបន្សល់ទុកពីកេរ្តិ៍ឈ្មោះកម្ពុជាក្នុងនាមជាម្ចាស់ផ្ទះនៃព្រឹត្តិការណ៍ស៊ីហ្គេមលើកទី៣២ដោយមិនទាមទារការចំណាយទាំងអស់ពីក្រុមប្រតិភូកីឡាករ គឺអាចជួយបង្ហាញឲ្យកាន់តែច្បាស់អំពីភាពសុខដុមរមនីយកម្មនៃការរស់នៅរបស់ពលរដ្ឋកម្ពុជាដែលកំពុងជ្រកក្រោមដំបូលសន្តិភាព និងស្របទៅនឹងពាក្យស្លោកសម្រាប់ព្រឹត្តិការណ៍ឆ្នាំនេះគឺ «កីឡារស់ក្នុងសន្តិភាព ឬSPORTS LIVE IN PEACE»៕