បរទេស ៖ យោងតាមប្រភពព័ត៌មានពី Nikkei Asia បានរាយការណ៍ថា រដ្ឋមន្ត្រីក្រសួងពាណិជ្ជកម្មអាមេរិក លោកស្រី Gina Raimondo និងរដ្ឋមន្ត្រីក្រសួងពាណិជ្ជកម្មចិន លោក Wang Wentao បានជួបពិភាក្សាគ្នានៅទីក្រុងប៉េកាំងកាលពីថ្ងៃច័ន្ទកន្លងទៅនេះ ស្ដីពីបញ្ហាពាណិជ្ជកម្ម និងឧស្សាហកម្មបន្ទះឈីប។

លើសពីនេះ គោលបំណងនៃកិច្ចប្រជុំនេះគឺដើម្បីបង្កើតក្រុមការងារមួយដើម្បីពិភាក្សាអំពីវិវាទពាណិជ្ជកម្ម ការវិនិយោគ និងចែករំលែកចំណេះដឹងអំពីបទប្បញ្ញត្តិនៃការនាំចេញដែលទាក់ទងនឹង semiconductors ។

យោងតាមសេចក្តីថ្លែងការណ៍របស់ក្រសួងពាណិជ្ជកម្មសហរដ្ឋអាមេរិកបានលើកឡើងថា មន្ត្រីជាន់ខ្ពស់រដ្ឋាភិបាល និងអ្នកតំណាងមកពីវិស័យឯកជននឹងចូលរួមនៅក្នុងក្រុមការងារថ្មីនេះ។​ កិច្ចប្រជុំនឹងត្រូវធ្វើឡើងពីរដងក្នុងមួយឆ្នាំនៅថ្នាក់អនុរដ្ឋមន្ត្រី ដោយចាប់ផ្តើមនៅសហរដ្ឋអាមេរិកនៅដើមឆ្នាំ២០២៤ ចំណែកឯការត្រួតពិនិត្យលើការនាំចេញបន្ទះឈីប និងផលិតផលសំខាន់ៗផ្សេងទៀតនឹងត្រូវបានពិភាក្សាដាច់ដោយឡែកពីគ្នានៅកម្រិតលេខាធិការ។

កាលពី​​ថ្ងៃ​អង្គារកន្លងទៅនេះ កិច្ច​ប្រជុំ​ត្រូវបាន​​ធ្វើ​ឡើងជាលើកដំបូង​នៅ​ទីក្រុង​ប៉េកាំង ដោយភាគីទាំងពីរបានឯកភាពលើជំនួបដោយផ្ទាល់រវាងរដ្ឋមន្ត្រីពាណិជ្ជកម្មរបស់ពួកគេយ៉ាងហោចណាស់ម្តងក្នុងមួយឆ្នាំ ដើម្បីទប់ស្កាត់ការកើនឡើងនៃភាពតានតឹងរវាងប្រទេសទាំងពីរ។ ទន្ទឹមនឹងនេះ កិច្ចព្រមព្រៀងនេះកើតឡើងចំពេលមានការព្រួយបារម្ភកាន់តែខ្លាំងឡើងលើភាពតានតឹងនៃភាគីទាំងសងខាង ដែលធ្វើឲ្យឱ្យប៉ះពាល់ដល់កំណើនសេដ្ឋកិច្ចរបស់សហរដ្ឋអាមេរិក និងចិន។

នៅក្នុងកិច្ចប្រជុំរវាងក្រសួងពាណិជ្ជកម្មប្រទេសទាំងពីរ លោកស្រី Raimondo លើកឡើងថា ការរឹតបន្តឹងរបស់អាមេរិកផ្តោតតែទៅលើបច្ចេកវិទ្យាដែលមានឥទ្ធិពលផ្ទាល់ទៅលើសន្តិសុខជាតិ និងសិទ្ធិមនុស្ស ហើយមិនមែនមានន័យថា ដើម្បីទប់ស្កាត់កំណើនសេដ្ឋកិច្ចរបស់ចិននោះទេ។ យ៉ាងណាមិញ សមាជិកសភាមួយចំនួនរបស់សភាអាមេរិកបានប្រឆាំងនឹងការបង្កើតក្រុមការងារថ្មីនេះជាមួយប្រទេសចិន ខណៈដែលភាគីទាំងពីរកំពុងព្រួយបារម្ភថា ភាពតានតឹងរវាងភាគីទាំងពីរអាចប៉ះពាល់ដល់ទំនាក់ទំនងសេដ្ឋកិច្ចលើសពីវិស័យ semiconductor ទៅទៀត។

ចាប់តាំងពីខែតុលា ឆ្នាំ២០២២ សហរដ្ឋអាមេរិក និងចិនមានភាពតានតឹងកាន់តែខ្លាំងឡើងលើការនាំចេញដែលទាក់ទងនឹង semiconductors ដោយសហរដ្ឋអាមេរិកបានហាមឃាត់ការនាំចេញបច្ចេកវិទ្យា និងឧបករណ៍បន្ទះឈីបទំនើបទៅកាន់ចិន។ ការ​នាំ​ចេញ​ឧបករណ៍​ផលិត​បន្ទះ​ឈីប​របស់​សហរដ្ឋ​អាមេរិក​ទៅ​កាន់​ប្រទេស​ចិន​បាន​ធ្លាក់​ចុះនៅឆមាសទី ១ ឆ្នាំនេះ។ នៅឆ្នាំនេះ ចិនបានដាក់កំហិតក្រុមហ៊ុនបច្ចេកវិទ្យារបស់ខ្លួនមិនឱ្យទិញផលិតផលដែលផលិតដោយក្រុមហ៊ុនបច្ចេកវិទ្យាអាមេរិក Micron Technologies និងបានទាមទារអាជ្ញាប័ណ្ណសម្រាប់ការនាំចេញសម្ភារៈ​ផលិត​បន្ទះ​ឈីបផងដែរ។ កាលពីខែសីហាកន្លងទៅនេះ សហរដ្ឋអាមេរិកបានប្រកាសពីវិធានការរឹតបន្តឹងលើការវិនិយោគរបស់អាមេរិកនៅក្នុងប្រទេសចិនក្នុងវិស័យដូចជា semiconductors បញ្ញាសិប្បនិម្មិត AI និង បច្ចេកវិទ្យា quantum ។

មិនត្រឹមតែប៉ុណ្ណោះ ចិនបានបាត់បង់តំណែងជាអ្នកនាំចេញទំនិញកំពូលទៅកាន់សហរដ្ឋអាមេរិកជាលើកដំបូងក្នុងរយៈពេល ១៥ ឆ្នាំនៅក្នុងឆមាសទី ១ ឆ្នាំនេះ។ លើសពីនេះ ការវិនិយោគផ្ទាល់របស់សហរដ្ឋអាមេរិកនៅក្នុងប្រទេសចិនក៏បានធ្លាក់ចុះជិត ៩០ ភាគរយចាប់តាំងពីខែមេសា ដល់ ខែមិថុនា ដែលជាកម្រិតទាបបំផុតចាប់តាំងពីឆ្នាំ១៩៩៨។

ទន្ទឹមនឹងនេះ លោកស្រី Raimondo ក៏បានលើកឡើងពីសារៈសំខាន់នៃទំនាក់ទំនងសេដ្ឋកិច្ចរវាងប្រទេសទាំងពីរ ដោយការធ្វើពាណិជ្ជកម្មជាមួយគ្នាជាង ៧០០ ពាន់លានដុល្លារ។ ក្រៅពីនេះ លោកស្រីក៏បានអំពាវនាវឱ្យមានទំនាក់ទំនងរឹងមាំនៅក្នុងវិស័យទេសចរណ៍ និងវិស័យពាណិជ្ជកម្ម ដែលប៉ះពាល់ដល់អាជីវកម្មរបស់អាមេរិកនៅប្រទេសចិន និងសន្តិសុខជាតិតិចតួចផងដែរ។ គេរំពឹងថា កិច្ចសហប្រតិបត្តិការរវាងចិន និងសហរដ្ឋអាមេរិកអាចនឹងរួមចំណែកដល់កំណើនសេដ្ឋកិច្ចពិភពលោកជាង ៥០ ភាគរយ ចំពេលមានការធ្លាក់ចុះនាពេលបច្ចុប្បន្ន។ ទោះជាយ៉ាងនេះក្តី គេកំពុងរង់ចាំមើលថា តើទំនាក់ទំនងរួមរវាងសហរដ្ឋអាមេរិក និងចិនមានភាពប្រសើរឡើង ឬយ៉ាងណាទៅ?