កោះកុង៖  រដ្ឋមន្រ្តីក្រសួងបរិស្ថាន ឯកឧត្តម អ៊ាង សុផល្លែត ក្នុងដំណើរទស្សនកិច្ច ចុះសួរសុខទុក្ខប្រជាសហគមន៍នៅតំបន់ការពារធម្មជាតិតាតៃក្រោមកាលពីថ្ងៃទី០៣ ខែកញ្ញា ឆ្នាំ២០២៣កន្លងទៅ បានជំរុញឱ្យប្រជាពលរដ្ឋចេះដាំដើមឈើ ចូលរួមការពារអភិរក្សព្រៃឈើ បង្កើនគម្របព្រៃឈើ និងអាចលក់កាបូនបង្កើនប្រាក់ចំណូលនៅក្នុងសហគមន៍។

ការជំរុញឱ្យមានការដាំដើមឈើកាន់តែច្រើន ដើម្បីឱ្យប្រជាសហគមន៍អាចទទួលបានប្រាក់ចំណូល និងផលប្រយោជន៍ពីការលក់កាបូននេះគឺ ជាយុទ្ធសាស្រ្តរបស់ក្រសួងបរិស្ថាន ដែលអនុវត្តស្របតាមយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជានៅក្នុងគោលដៅយុទ្ធសាស្រ្តទាំង ៥ ត្រង់ចំណុចទី១ ដែលធានាឱ្យបានកំណើនសេដ្ឋកិច្ចក្នុងអត្រាមធ្យមប្រចាំឆ្នាំក្នុងរង្វង់ ៧% ប្រកបដោយភាពធន់នឹងវិបត្តិនានា។

ឯកឧត្តម អ៊ាង សុផល្លែត បានថ្លែងថា ៖ «​ ដើម្បីធានានិរន្តភាពបរិស្ថាន និងជីវភាពសហគមន៍ ប្រជាសហគមន៍ ត្រូវនាំគ្នាដាំដើមឈើឱ្យបានច្រើន ពីព្រោះដើមឈើគឺជាប្រភពប្រាក់ចំណូល តាមរយៈការទាញចំណូលពីការលក់កាបូន ​ហើយចំណូលនេះនឹងជួយដល់ការអភិវឌ្ឍហេដ្ឋារចនាសម្ព័ន្ធ និងធ្វើឱ្យប្រជាពលរដ្ឋមានចំណូ​ល​​បន្ថែមលើសពីចំណូលតាមរយៈភ្ញៀវទេសចរនាពេលបច្ចុប្បន្ននេះ»។

លោក ទេព ម៉ាឡា ប្រធានសហគមន៍តំបន់ការពារធម្មជាតិតាតៃក្រោម ខេត្តកោះកុងបានអះអាងថា សហគមន៍បានចូលរួមការពារ និងអភិរក្សធនធានធម្មជាតិ ដោយមិនមានការកាប់រានព្រៃ ឬការដកហូតអនុផលព្រៃឈើលើសលប់ដូចកាលពីគ្រាមុនទៀតនោះទេ។

ប្រធានសហគមន៍រូបនេះបានបញ្ជាក់ថា ៖ «តំបន់នេះកំពុងមានការចាប់អារម្មណ៍ខ្លាំងពីភ្ញៀវទេសចរជាតិ ភ្ញៀវទេសចរអន្តរ​ជាតិ ក្នុងការមកទស្សនាធនធានធម្មជាតិ រួមមានដូចជា ទឹកជ្រោះ ទេសភាពដងព្រែក ភូមិបុរាណ និងការ​ជិះទូកលេងកម្សាន្តតាមដងព្រែក គឺជាចំណុចសក្តានុពលនៃ​ដែន​ជម្រក​សត្វព្រៃតាតៃ។ ដែនជម្រកសត្វព្រៃតាតៃដែលលាតសន្ធឹងចេញពីឃុំតាតៃក្រោមដល់ឃុំត្រពាំងរូង រហូតដល់សង្កាត់ស្មាច់មានជ័យ ហើយប្រជាសហគមន៍កំពុងទទួលបានចំណូលតាមរយៈវិស័យទេសចរណ៍ធម្មជាតិនេះ»។

សូមបញ្ជាក់ថា សហគមន៍តំបន់ការពារធម្មជាតិតាតៃក្រោម ត្រូវបានទទួលស្គាល់ជាផ្លូវការ ដោយក្រសួងបរិស្ថាន តាមប្រកាសលេខ ២៩០ ចុះថ្ងៃទី១៩ ខែកក្តដា ឆ្នាំ២០២៣ នេះ និងមានសមាជិកចំនួន ១៧៧គ្រួសារ រស់នៅភូមិអន្លង់វ៉ាក់ និងភូមិកោះអណ្ដែត ឃុំតាតៃក្រោម ស្រុកកោះកុង ដែលមានសក្តានុពលធម្មជាតិ ដូចជាព្រៃឈើ ព្រៃកោងកាង ទឹកធ្លាក់ ទេសភាពតាមដងព្រែក ភូមិបូរាណ រួមនឹងការនេសាទសមុទ្រ ដែលកំពុងទទួលបានការចាប់អារម្មណ៍អ្នកទេសចរមកទស្សនាជាបន្តបន្ទាប់។

តាមរយៈមន្ទីរបរិស្ថានខេត្តកោះកុង ក្នុងដែនជម្រកសត្វព្រៃតាតៃមានទីកន្លៃងទេសចរណ៍ចំនួន៣កន្លែង ទី១- ស្ថិតនៅក្នុងភូមិអន្ងង់រ៉ាក់ ឃុំ តាតៃក្រោម ស្រុកកោះកុងខេត្តកោះកុង ដែលមាន​ទឹកជ្រោះ​តាតៃ​នៅ​លើ​ដង​ព្រែកតាតៃ ការជិទូកកំសាន្តតាមដងព្រែកដែលអាចមើលឃើញសត្វព្រៃ ទេសភាពរុក្ខជាតិតាមដង​ស្ទឹង និងចំការដំណាំ ហើយ​តំបន់នេះស្ថិតក្រោមការគ្រប់គ្រងរបស់សហគមន៍អេកូទេសចរណ៍តាតៃ ដែល​មានចំងាយ២៣គីឡូមែត្រពីទីរួមខេត្ត។ ទី២- តំបន់សហគមន៍អេកូទេសចរណ៍​ត្រពាំង​វិញ​មាន​ទីតាំង​ស្ថិត​ក្នុងភូមិត្រពាំងរូង ឃុំត្រពាំងរូង ស្រុកកោះកុង ខេត្តកោះកុង ដែលមានសក្តានុពលលើទឹកធ្លាក់ សត្វព្រៃ​ ទេសភាពព្រៃភ្នំ និងទេសភាព​តាមដងព្រែក។ ចំណែកឯកទី៣- គឺនៅក្នុងភូមិស្មាញ់ង៉ាម សង្កាត់​ស្មាច់មាន​ជ័យ ក្រុងខេមរភូមិន្ទ ដែលមានសក្តានុពលលើផ្នែកទឹកធ្លាក់៕