ភ្នំពេញ ៖  រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានសម្តែងនូវការស្វាគមន៍ចំពោះកិច្ចសហប្រតិបត្តិការរវាងកម្ពុជា-រុស្ស៊ី លើវិស័យកសិកម្ម ដោយផ្តោតសំខាន់លើការជំរុញពាណិជ្ជកម្មកសិកម្ម ជាអាទិ៍ការនាំចេញផលិតផលកសិកម្មរបស់កម្ពុជាឆ្ពោះទៅកាន់ទីផ្សារប្រទេសរុស្ស៊ី និងការនាំជីកសិកម្មពីរុស្ស៊ីមកកម្ពុជាវិញ ។

ការប្រជុំពិភាក្សាលើកិច្ចសហប្រតិបត្តិការវិស័យកសិកម្ម ត្រូវបានលើកឡើងក្នុងឱកាស ឯកឧត្តម ឌិត ទីណា ជួបជាមួយ ឯកឧត្តម អាណាតូលី បូរ៉ូវីក (Anatoly BOROVIK) ឯកអគ្គរដ្ឋទូតសហព័ន្ធរុស្ស៊ី ប្រចាំនៅព្រះរាជាណាចក្រកម្ពុជា កាលពីថ្ងៃទី២៦ ខែកញ្ញា ឆ្នាំ២០២៣ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។ 

សូមបញ្ជាក់ថា បច្ចុប្បន្ននេះ ប្រទេសរុស្ស៊ី គឺជាប្រទេសមួយក្នុងចំណោមប្រទេសនាំចេញកំពូលទាំងបីនៅលើពិភពលោក និងបំពេញតម្រូវការរបស់ប្រទេសជាច្រើនសម្រាប់ជីអាសូត ប៉ូតាស្យូម និងផូស្វាត។ ប្រហែលមួយភាគបីនៃជីទាំងអស់ដែលផលិត ត្រូវបាននាំចេញស្មើនឹង៧ភាគរយនៃទីផ្សារពិភពលោក។ ទោះបីជាក្នុងគ្រាមានវិបត្តិក៏ដោយ ប្រទេសរុស្ស៊ី រក្សាបាននូវជំហរស្ថិរភាព ដែលត្រូវបានបញ្ជាក់ថាមិនត្រឹមតែដោយសារទុនបំរុងដ៏ធំនៃវត្ថុធាតុដើមធម្មជាតិប៉ុណ្ណោះទេ ប៉ុន្តែក៏មានមូលដ្ឋានផលិតកម្មទំនើប និងបច្ចេកវិទ្យាផងដែរ។ ក្នុងចំណោមអ្នកប្រើប្រាស់ជាប្រចាំសំខាន់ៗនៃជីកសិកម្មរុស្ស៊ី មានអតិថិជនក្នុងស្រុក ប្រទេសចិន និងបណ្តាប្រទេសនៅអាមេរិកឡាទីន។

យោងតាម​ទិន្នន័យ​របស់​ក្រសួង​កសិកម្ម​រុក្ខាប្រមាញ់ និង​នេសាទ​ក្នុង​ឆ្នាំ ២០២០ កម្ពុជា​បាន​នាំចូល​ថ្នាំ​កសិកម្ម​ចំនួន ១០៣ ០០៥ ​តោន និង​ជី​កសិកម្ម​ចំនួន​ ១ ៤០៦ ៧៧៥ ​តោន​។ ដោយឡែកផលិតកម្មក្នុងវិស័យកសិកម្មនៅកម្ពុជាក្នុងឆ្នាំ២០២១ បានពិនិត្យឃើញថា មានសន្ទុះកើនឡើងគួរឱ្យកត់សម្គាល់ រីឯតម្រូវការថ្នាំកសិកម្មនិងជីកសិកម្មវិញ យោងតាមលិខិតអនុញ្ញាតនាំចូលមាន ថ្នាំកសិកម្មចំនួន១០៣,០០៥តោន និងជីកសិកម្មចំនួន ១,៤​០​​៦​​,៧៧៥តោន។

តាមការកត់សម្គាល់ តម្លៃជីកសិកម្មកសិកម្មឡើងថ្លៃខ្ពស់ក្នុងឆ្នាំ២០២២ ដោយតម្លៃជីក្នុងមួយតោនឡើងដល់ចន្លោះពី ៥១០-៧៨៣ដុល្លារ។ មូលហេតុចម្បងមួយទៀត គឺមកពីវិបត្តិសង្រ្គាមរុស្ស៊ី-អ៊ុយក្រែន ដោយហេតុថា    រុស្ស៊ីជាប្រទេស ដែលផលិតជីកសិកម្មច្រើនជាងគេ។

របាយការណ៍​ពី​ក្រសួងពាណិជ្ជកម្មបាន​បង្ហាញថា ការនាំ​ចូល​ជី​កសិកម្ម និង​ថ្នាំ​សម្លាប់សត្វ​ល្អិត​ឬ​ស្មៅ នៅក្នុង    ​រយៈពេល​ ១២​ ​ខែ​ឆ្នាំ​២០២២​ កន្លងទៅ មាន​ទំហំ​ទឹកប្រាក់​សរុប​ជាង ៤៨០ ​លាន​ដុល្លារ កើនឡើង​ប្រមាណ ៦​ ភាគរយ បើ​ធៀប​នឹង​រយៈពេល​ដូចគ្នា​កាលពី​ឆ្នាំ​ ២០២១។

យោងតាមតារាងតម្លៃជីគីមីកសិកម្មតាមឆ្នាំនីមួយៗ ដែលរៀបចំដោយនាយកដ្ឋាននីតិកម្មកសិកម្មនៃក្រសួងកសិកម្ម តម្លៃជីកសិកម្មបានបង្ហាញថាមានតម្លៃធ្លាក់ចុះជាបន្តបន្ទាប់ ចាប់ពីខែមករា ឆ្នាំ២០២៣មក។ ក្នុងនោះ ជីអ៊ុយរ៉េ ធ្លាក់ថ្លៃពី ៣៥ដុល្លារ  មកត្រឹម ២៣,៥ដុល្លារក្នុងមួយបាវ , ជីដេអាប៉េ (DAP:១៨-៤៦-0) ធ្លាក់ពី៤២ ដុល្លារ  មកត្រឹម  ៣៦ ដុល្លារក្នុងមួយបាវ។  គឺដោយសារកត្តាប្រេងឥន្ធនៈឡើងថ្លៃធ្វើឲ្យតម្លៃដឹកជញ្ជូនក៏ឡើងថ្លៃ និងវិបត្តិសង្រ្គាមរុស្ស៊ី-អ៊ុយក្រែន ក៏ជាកត្តាប៉ះពាល់ដល់ទីផ្សារនាំចេញ ជីកសិកម្មពីប្រទេសរុស្ស៊ី៕