ភ្នំពេញ ៖ ផ្សារមូលបត្រកម្ពុជា (ផមក) នឹងប្រកាសដាក់ឱ្យវិនិយោគិនប្រើប្រាស់នូវប្រព័ន្ធបើកគណនីជួញដូរតាមអនឡាញនៅថ្ងៃទី១៦ ខែវិច្ឆិកា ឆ្នាំ២០២៣ នេះតទៅ ហើយបន្ទាប់ពីដាក់ដំណើរការប្រព័ន្ធនេះ ការបើកគណនីរំពឹងថាកើនឡើងប្រមាណ ៣ម៉ឺន ទៅ ៥ម៉ឺនគណនី នៅក្នុងឆ្នាំ២០២៤ ខាងមុខនេះ ។

ប្រព័ន្ធបើកគណនីជួញដូរតាមអនឡាញ អនុញ្ញាតឱ្យវិនិយោគិនទទួលបានគណនីភា្លមៗរៀងរាល់ម៉ោងធ្វើការ។ ដើម្បីបើកគណនីជួញដូរតាមអនឡាញបាន វិនិយោគិនត្រូវដោនឡូតកម្មវិធីទួរសព្ទផ្សារហ៊ុន (Phsarhun) វិនិយោគិនត្រូវចុចលើពាក្យ បើកគណនីជួញដូរ បន្ទាប់មកត្រូវជ្រើសរើសក្រុមហ៊ុនមូលបត្រដែលខ្លួនពេញចិត្ត ហើយបំពេញព័ត៌មានមួយចំនួន ស្កេនអត្តសញ្ញាញប័ណ្ណ និងស្កេនមុខ។

បន្ទាប់ពីក្រុមហ៊ុនមូលបត្រពិនិត្យមើលព័ត៌មានរបស់អ្នកស្នើសុំរួចរាល់ នោះលេខអត្តសញ្ញាញវិនិយោគិន និងលេខគណនីជួញដូរ នឹងត្រូវបង្កើតឡើងភ្លាមៗ។ ដូចនេះ វិនិយោគិនកាន់តែមានភាពងាយស្រួល ឆាប់រហ័ស ចំណេញពេលវេលា និងការចំណាយផ្សេងៗ ដើម្បីទទួលបានគណនីជួញដូរ។ បន្ទាប់ពីបានគណនីជួញដូរ វិនិយោគិនអាចដាក់ប្រាក់ចូលគណនី និងជួញដូរបានភ្លាមៗផងដែរ។

ដើម្បីគាំទ្រ និងផ្សព្វផ្សាយឱ្យបានទូលំទូលាយពីការបើកគណនីតាមអនឡាញ ការស្នើសុំលេខអត្តសញ្ញាណវិនិយោគិននៅក្នុងប្រព័ន្ធនេះត្រូវបានលើកលែងកម្រៃស្នើសុំ (២ម៉ឺនរៀល) រហូតដល់ថ្ងៃទី៣១ ខែធ្នូ ឆ្នាំ២០២៣ ដោយអ្នកស្នើសុំអាចវាយអក្សរ MFS2023 ជាលេខកូដប្រូមូសិន នៅពេលបង់ប្រាក់។ បច្ចុប្បន្នវិនិយោគិនអាចស្នើ សុំបើកគណនីជួញដូរតាមអនឡាញ ជាមួយក្រុមហ៊ុនមូលបត្រចំនួនប្រាំមួយ រួមមាន ក្រុមហ៊ុន អេច ប៊ី ស៊ីឃ្យួរីធី, ក្រុមហ៊ុន កាណា ស៊ីឃ្យួរីធី, ក្រុមហ៊ុន កម្ពុ ស៊ីឃ្យួរីធី, ក្រុមហ៊ុន អេសប៊ីអាយ រ៉ូយ៉ាល់ ស៊ីឃ្យួរីធី, ក្រុមហ៊ុន ខេមបូឌា ស៊ីឃ្យួវីធី, និងក្រុមហ៊ុន អេស៊ីលីដា ស៊ីឃ្យួរីធី។

ប្រព័ន្ធបើកគណនីជួញដូរតាមអនឡាញ ត្រូវបានធ្វើបច្ចុប្បន្នភាព ដោយមានការតភ្ជាប់ទៅកាន់ប្រព័ន្ធរបស់និយ័តករមូលបត្រកម្ពុជា ដើម្បីអនុញ្ញាតឱ្យវិនិយោគិនទទួលបានលេខអត្តសញ្ញាណវិនិយោគិនភ្លាមៗ និងបានប្រើប្រាស់ថ្នាលផ្លាស់ប្តូរទិន្នន័យកម្ពុជា CamDX ដើម្បីផ្ទៀងផ្ទាត់អត្តសញ្ញាញវិនិយោគិន ដើម្បីភាពងាយស្រួល ឆាប់រហ័ស ប្រសិទ្ធិភាពខ្ពស់ និងសុវត្ថិភាពខ្ពស់។ ការបើកគណនីជួញដូរមូលបត្រតាមអនឡាញនេះ គឺជាផ្នែកមួយនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលថ្មី ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ផមក សង្ឃឹមថា ៖

“ក្នុងឆ្នាំ២០២៤ ខាងមុខនេះ យើងនឹងមានការបើកគណនីកើនឡើងប្រមាណ ៣ម៉ឺន ទៅ ៥ម៉ឺនគណនី (ឬស្មើនឹងជិត ១០០% នៃចំនួនគណនីបច្ចុប្បន្ន) បន្ទាប់ពីដាក់ដំណើរការប្រព័ន្ធនេះ។ ដូចនេះ ដើម្បីគាំទ្រវិនិយោគិនថ្មីៗ ដែលនឹងមានសំទុះកើនឡើងឆាប់រហ័សក្នុងពេលខាងមុខ ផ្សារមូលបត្រកម្ពុជា រួមជាមួយភាគីពាក់ព័ន្ធនានានឹងរៀបចំវគ្គបណ្តុះបណ្តាល និងកម្មវិធីនានា តាមគ្រប់រូបភាពដើម្បីបង្កើនសមត្ថភាពវិនិយោគិន និងទំនុកចិត្តក្នុងការវិនិយោគ ក៏ដូចជារៀបចំយន្តការនានា ក្នុងការសម្រួលដល់វិនិយោគិនឱ្យប្រកបដោយភាពងាយស្រួលក្នុងការវិនិយោគ មានប្រសិទ្ធភាព និងទទួលបានប្រាប់ចំណេញខ្ពស់៕”