ផ្អែកតាមស្ថិតិពាណិជ្ជកម្មនាំចូលរបស់គយក្នុងឆ្នាំ២០២៣ កម្ពុជាបាននាំចូលជីកសិកម្មពីបរទេស ជាពិសេស​ពីប្រទេសជិតខាងក្នុងទំហំទឹកប្រាក់ជាង ៣២៥លានដុល្លារអាមេរិក ដែលចំនួននេះ មានការ​កើនជាង ១៧% បើធៀបនឹងឆ្នាំ២០២២ ដែលមានត្រឹមប្រមាណ ២៧៦លានដុល្លារអាមេរិក។

ក្នុងនាមជាប្រទេស​ដែលផ្អែកសំខាន់លើវិស័យកសិកម្ម ការនាំចូលជីកសិកម្មក្នុងចំនួនដ៏ច្រើននេះចាត់ទុកថាជាការខាតបង់សេដ្ឋកិច្ចមួយផ្នែក។​ ជាដំណោះស្រាយ រាជរដ្ឋាភិបាលតាមរយៈក្រសួងកសិកម្ម រុក្ខាប្រមាញ់ និងនេសាទ ដែលជាសេនាធិកា បាន និងកំពុងជំរុញចលនាផលិតជីកសិកម្មនៅក្នុងស្រុកឱ្យបានច្រើន។

ជាផ្នែកមួយនៃការកាត់បន្ថយការនាំចូលជីកសិកម្មពីក្រៅប្រទេស ក្រុមហ៊ុនក្នុងស្រុកមួយបានចាប់ផ្ដើមផលិតជីសរីរាង្គ ដោយប្រើប្រាស់វត្ថុធាតុដើមដែលមាននៅក្នុងស្រុកស្រាប់។

លោកស្រី នាង គង្គា ដែលជាប្រធានទីផ្សារនៃក្រុមហ៊ុនជីសរីរាង្គបានឱ្យដឹងថា អ្នកស្រីបានចាប់ផ្ដើម ការផលិតជីសរីរាង្គនៅឆ្នាំ២០២២។​ មកដល់បច្ចុប្បន្ន ផលិតផលរបស់លោកស្រីមានទីផ្សារ និងពេញនិយមនៅតាមបណ្ដាខេត្ត ជាពិសេសតាមចំការដំណាំធំៗ។

បើតាមការរៀបរាប់របស់លោកស្រី ជីសរីរាង្គរបស់ខ្លួនធ្វើចេញពីវត្ថុធាតុដើមក្នុងស្រុក ដូចជា លាមកគោ លាមកមាន់ លាមកប្រចៀវជាដើម ដែលប្រភេទជីទាំងអស់នេះ​មានលទ្ធភាពក្នុងការ​កែប្រែដីកសិកម្មឱ្យមានជីវជាតិឡើងវិញ និងអាចបង្កបង្កើនផលបានច្រើន។

លើសពីការលក់ជីកសិកម្មជូនប្រជាកសិករ ក្រុមហ៊ុនរបស់លោកស្រីក៏មាននូវសេវាប្រឹក្សាយោបល់អំពីការប្រើប្រាស់ជីឱ្យសមស្របទៅនឹងលក្ខខណ្ឌជាក់ស្ដែងរបស់ដី តាមរយៈការប្រើម៉ាស៊ីនវាស់ស្ទង់គុណភាពដី។

សម្រាប់លោកស្រី ការប្រើប្រាស់ជីដែលផលិតបាននៅក្នុងស្រុក គឺជារឿងល្អ ព្រោះវាជាការគាំទ្រផលិតផលក្នុងស្រុក ជាពិសេសគឺលើកទឹកចិត្តឱ្យប្រជាកសិករងាកមកប្រើប្រាស់ជីសរីរាង្គជំនួសឱ្យជីគីមី។

ការប្រើប្រាស់ជីសរីរាង្គនេះទៀតសោត ក៏មានផលចំណេញច្រើនបើធៀបនឹងជីកសិកម្មនាំចូលដែលមានតម្លៃថ្លៃ។ ម្យ៉ាងទៀត វាជាការធានាមួយដល់ស្ថិរភាពនៃការធ្វើកសិកម្មរបស់ប្រជាជនកម្ពុជា ចៀសវាងនូវការប៉ះពាល់ដោយមើលមិនឃើញណាមួយចំពោះទីផ្សារជីកសិកម្មក្រៅប្រទេស។

ទាក់ទិននឹងចំណុចនេះដែរ ឯកឧត្តម បណ្ឌិត សួង ណយ អគ្គលេខាធិការរងចលនាភូមិមួយ ផលិតផល​មួយនៃទីស្ដីការគណៈរដ្ឋមន្ត្រីបានឱ្យដឹងថា ការប្រើប្រាស់ជីសរីរាង្គ ឬជីកំប៉ុសសម្រាប់ការដាំដុះនេះ ត្រូវបានលើកទឹកចិត្តពីរាជរដ្ឋាភិបាល។

ក្រៅពីការទិញជីសរីរាង្គមកប្រើប្រាស់ កសិករក៏អាចលាយជីកំប៉ុសដោយខ្លួនឯង ដោយប្រើប្រាស់ធនធានដែលមានស្រាប់ ដូចជា លាមកសត្វ និងរុក្ខជាតិជុំវិញផ្ទះ សំណល់ផ្ទះបាយ ជាដើម។ ធ្វើបែបនេះ កសិករផ្ទាល់អាចចំណេញថវិកា ហើយទិន្នផលដែលប្រមូលបានទៀតសោត ជាទិន្នផលដែលមានសុវត្ថិភាពទៀតផង៕